 |
(vovworld) – ວັນທີ 21/12, ຫວຽດນາມ ແລະ ກຳປູເຈຍ ໄດ້ອອກຖະແຫຼງການຮ່ວມເນື່ອງໃນໂອກາດການຢ້ຽມຢາມ ຫວຽດນາມ ຢ່າງເປັນທາງການຂອງທ່ານນາຍົກລັດຖະມົນຕີລາຊະອານາຈັກ ກຳປູເຈຍ Samdec Techno Hun Sen, ແຕ່ວັນທີ 20 – 21/12/2016. ຖະແຫຼງການຮ່ວມໄດ້ຊີ້ແຈ້ງວ່າ: ໃນໄລຍະຢູ່ຢ້ຽມຢາມ ຫວຽດນາມ, ທ່ານນາຍົກລັດຖະມົນຕີ Samdec Techno Hun Sen ໄດ້ເຈລະຈາກັບທ່ານນາຍົກລັດຖະມນົຕີ ຫງວຽນຊວນຟຸກ, ເຂົ້າຢ້ຽມຂ່ຳນັບທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ, ທ່ານປະທານປະເທດ ເຈີ່ນດ້າຍກວາງ, ພົບປະກັບທ່ານນາງປະທານສະພາແຫ່ງຊາດ ຫງວຽນທິກິມເງິນ, ຢ້ຽມຢາມນະຄອນ ໂຮ່ຈີມິນ ແລະ ແຂວງ ດົ່ງນາຍ. ໃນການຢ້ຽມຢາມຄັ້ງນີ້, ນາຍົກລັດຖະມົນຕີ 2 ປະເທດໄດ້ເຊັນ ເອກະສານຮ່ວມມື 3 ສະບັບເຊິ່ງລວມມີ: ສັນຍາຊ່ວຍເຫຼືອກັນດ້ານນິຕິທຳກ່ຽວກັບອາຍາລະຫວ່າງ ຫວຽດນາມ ແລະ ກຳປູເຈຍ, ສັນຍາກ່ຽວກັບການມອບສົ່ງຜູ້ຖືກຕັດສິນຈຳຄຸກລະຫວ່າງ ຫວຽດນາມ ແລະ ກຳປູເຈຍ, ແລະ ຂໍ້ຕົກລົງຮ່ວມມືລະຫວ່າງຄະນະກຳມະການຊົນເຜົ່າ ລະຫວ່າງຄະນະກຳມະການຊົນເຜົ່າ ຫວຽດນາມ ກັບກະຊວງພິທີການ ແລະ ສາສະໜາ ລາຊະອານາຈັກ ກຳປູເຈຍ. ການນຳຂັ້ນສູງ 2 ປະເທດໄດ້ແລກປ່ຽນຄຳເຫັນຢ່າງເລິກເຊິ່ງ, ກ້ວາງຂວາງກ່ຽວກັບການພົວພັນມິດຕະພາບ ແລະ ການຮ່ວມມືຮອບດ້ານລະຫວ່າງ ສສ ຫວຽດນາມ ແລະ ລາຊະອານາຈັກ ກຳປູເຈຍ ແລະ ບັນດາບັນຫາສາກົນ, ພາກພື້ນເຊິ່ງຕ່າງຝ່າຍຕ່າງມີຄວາມສົນໃຈ. 2 ຝ່າຍໄດ້ເຫັນດີເປັນເອກະສັນໂດຍຖືວ່າການປັບປຸງ ແລະ ພັດທະນາການພົວພັນມິດຕະພາບ, ການຮ່ວມມື ຫວຽດນາມ - ກຳປູເຈຍ ມີຄວາມໝາຍສຳຄັນພິເສດສຳລັບ 2 ປະເທດ, ໃຫ້ຄຳໝັ້ນສັນຍາສືບຕໍ່ປັບປຸງ ແລະ ພັດທະນາການພົວພັນລະຫວ່າງ 2 ປະເທດຕາມທິດນຳ “ປະເທດບ້ານໃກ້ເຮືອນຄຽງອັນດີງາມ, ນ້ຳໃຈມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານ, ເຄົາລົບເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ, ບໍ່ແຊກແຊງເຂົ້າວຽກງານພາຍໃນຂອງກັນ ແລະ ບໍ່ອະນຸຍາດໃຫ້ບໍ່ວ່າກຳລັງທີ່ເປັນປໍລະປັກໃດໆນຳໃຊ້ຜືນແຜ່ນດິນຂອງປະເທດຕົນເພື່ອນາບຂູ່ເຖິງຄວາມສະຫງົບຂອງປະເທດອື່ນ, ແກ້ໄຂບັນດາບັນຫາເກີດຂຶ້ນລະຫວ່າງ 2 ປະເທດດ້ວຍມາດຕະການສັນຕິພາບ. 2 ຝ່າຍເຫັນດີເປັນເອກະສັນສົມທົບກັນຈັດຕັ້ງບັນດາການເຄື່ອນໄຫວສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ກຳປູເຈຍ (24/6/1967 – 24/6/2017). 2 ຝ່າຍເປັນເອກະສັນກັນຍົກສູງວົງເງິນການຄ້າ 2 ປະເທດໃຫ້ບັນລຸຄາດໝາຍ 5 ຕື້ USD ໃນປີ 2017, ຕັດສິນໃຈແກ້ໄຂເສັ້ນ ຊາຍແດນບັນດາຕອນ ທີ່ຍັງຄົງເພື່ອປະຕິບັດສຳເລັດວຽກງານປັກຫຼັກໝາຍຊາຍແດນທາງບົກ ແນໃສ່ສ້າງຊາຍແດນລະຫວ່າງ 2 ປະເທດກາຍເປັນຊາຍແດນແຫ່ງສັນຕິພາບ, ສະຖຽນລະພາບ, ມິດຕະພາບ, ການຮ່ວມມື ແລະ ພັດທະນາແບບຍືນຍົງ.