(VOVWORLD) -ເນື່ອງໃນໂອກາດການຢ້ຽມຢາມທາງລັດຖະກິດຢູ່ຍີ່ປຸ່ນຂອງທ່ານປະທານປະເທດຫວຽດນາມ ເຈີ່ນດ້າຍກວາງ ໃນລະຫວ່າງວັນທີ 29 ພຶດສະພາ - 02 ມິຖຸນາ, ວັນທີ 31 ພຶດສະພາ, ທ່ານປະທານປະເທດ ເຈີ່ນດ້າຍກວາງ ແລະ ທ່ານນາຍົກລັດຖະມົນຕີຍີ່ປຸ່ນ Shinzo Abe ໄດ້ອອກຖະແຫຼງການຮ່ວມລະຫວ່າງສອງປະເທດ.
 ທ່ານປະທານປະເທດ ເຈີ່ນດ້າຍກວາງ ແລະ ທ່ານນາຍົກລັດຖະມົນຕີຍີ່ປຸ່ນ Shinzo Abe |
ຕາມຖະແຫຼງການຮ່ວມ, ການນຳສອງທ່ານ ຢັ້ງຢືນວ່າ ພ້ອມແລ້ວທີ່ຈະພ້ອມກັນນຳ ການພົວພັນຄູ່ຮ່ວມມືຍຸດທະສາດເລິກເຊິ່ງກວ້າງຂວາງລະຫວ່າງຫວຽດນາມ ແລະ ຍີ່ປຸ່ນ ກ້າວເຂົ້າສູ່ໄລຍະພັດທະນາຕໍ່ໄປຢ່າງແທດຈິງ ແລະ ມີປະສິດທິຜົນກວ່າອີກໃນທຸກຂົງເຂດ; ພ້ອມທັງແບ່ງປັນວ່າ ຈະຕັດສິນໃຈສົມທົບກັນ ເພື່ອແນໃສ່ຮັບປະກັນສັນຕິພາບ, ສະຖຽນລະພາບ ແລະ ຄວາມວັດທະນາຖາວອນຢູ່ພາກພື້ນ.
ໃນການຮ່ວມມືດ້ານປ້ອງກັນຊາດ - ປ້ອງກັນຄວາມສະຫງົບ, ການນຳສອງທ່ານ ຢັ້ງຢືນເຈດຕະນາ ເພີ່ມທະວີການຮ່ວມມື ເພື່ອແນໃສ່ຮັບມືກັບອາດຊະຍາກຳແບບໃໝ່.
ກ່ຽວກັບການຮ່ວມມືດ້ານເສດຖະກິດ, ການນຳສອງທ່ານ ຢືນຢັນຮັບຮອງເອົາ “ຂໍ້ລິເລີ່ມຮ່ວມລະຫວ່າງ ຫວຽດນາມ - ຍີ່ປຸ່ນ” ແລະ “ຄະນະກຳມະການປະສົມຫວຽດນາມ - ຍີ່ປຸ່ນ ກ່ຽວກັບການຮ່ວມມືດ້ານ ອຸດສາຫະກຳ, ການຄ້າ ແລະ ພະລັງງານ.
ໄປຄຽງຄູ່ກັນນັ້ນ, ການນຳສອງທ່ານ ກໍໄດ້ຢືນຢັນຄືນໃໝ່ວ່າ ພ້ອມແລ້ວທີ່ຈະສືບຕໍ່ສົມທົບກັນຢ່າງແໜ້ນແຟ້ນ ເພື່ອຜັນຂະຫຍາຍ “ວິໄສທັດໄລຍະກາງ ແລະ ໄລຍະຍາວ ຂອງການຮ່ວມມື ລະຫວ່າງກະສິກຳ ຫວຽດນາມ - ຍີ່ປຸ່ນ.
ພ້ອມກັນນັ້ນ, ການນຳສອງທ່ານ ກໍໄດ້ສະແດງຄວາມ ຊົມເຊີຍຕໍ່ບັນດາບາດກ້າວພັດທະນາຢ່າງຕັ້ງໜ້າຂອງການພົວພັນລະຫວ່າງ ອາຊຽນ - ຍີ່ປຸ່ນ. ເລື່ອງລົງນາມໃນສັນຍາຄູ່ຮ່ວມມືຮອບດ້ານ ແລະຂ້າມປາຊີຟິກ (CPTPP); ພ້ອມທັງຢັ້ງຢືນວ່າ ພ້ອມແລ້ວທີ່ຈະສວມບົດບາດເປັນເຈົ້າພາທາງໃນເລື່ອງນຳສັນຍາ CPTPP ໃຫ້ມີຜົນສັກສິດໄວທີ່ສຸດເທົ່າທີ່ຈະໄວໄດ້.
ກ່ຽວກັບສະພາບການຢູ່ທະເລຕາເວັນອອກ, ການນຳສອງທ່ານ ສືບຕໍ່ສະແດງຄວາມວິຕົກກັງວົນ; ພ້ອມທັງແບ່ງປັນຄວາມຮັບຮູ້ວ່າ ເພື່ອຮັບປະກັນສັນຕິພາບ ແລະ ສະຖຽນລະພາບຢູ່ພາກພື້ນ, ບັນດາຄວາມມານະພະຍາຍາມທາງການທູດຄວນມຸ່ງໄປເຖິງການປະຕິບັດກົດໝາຍສາກົນຢ່າງຄົບຖ້ວນ ລວມມີ ສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ ປີ 1982 ( UNCLOS) ເພື່ອທະເລຕາເວັນອອກມີສັນຕິພາບ ແລະສະຖຽນລະພາບ.
ນອກຈາກນັ້ນ, ການນຳສອງທ່ານ ກໍຊົມເຊີຍບາດກ້າວຢ່າງຕັ້ງໜ້າ ຫວ່າງມໍ່ໆມານີ້, ລວມມີການພົບປະຂັ້ນສຸດຍອດລະຫວ່າງ ສ.ເກົາຫຼີ ແລະ ສປປ.ເກົາຫຼີ ແລະ ຢືນຢັນຄືນໃໝ່ຄວາມສຳຄັນຂອງການປະຕິຮູບສະພາຄວາມໝັ້ນຄົງສະຫະປະຊາຊາດ ອີກດ້ວຍ.