(ພາບປະກອບ: TTXVN)

  ຕາມເວັບໄຊສະຖິຕິ worldometers.info ແລ້ວ, ໄລ່ຮອດເວລາ 1 ໂມງ 30 ນາທີຂອງວັນທີ 27 ພະຈິກ (ຕາມເວລາ UTC), ທົ່ວໂລກຢັ້ງຢືນມີຜູ້ຕິດເຊື້ອພະຍາດໂຄວິດ - 19 ລວມທັງໝົດກວ່າ 260,85 ລ້ານຄົນ, ໃນນັ້ນມີຜູ້ເສຍຊີວິດກວ່າ 5,2 ລ້ານຄົນ. ອາເມລິກາ ສືບຕໍ່ແມ່ນປະເທດຢັ້ງຢືນມີຈຳນວນຜູ້ຕິດເຊື້ອ ແລະ ເສຍຊີວິດຍ້ອນໂລກລະບາດດັ່ງກ່າວຫຼາຍທີ່ສຸດໃນໂລກ ດ້ວຍກວ່າ 799.000 ຄົນເສຍຊີວິດ ໃນຈຳນວນຜູ້ຕິດເຊື້ອທັງໝົດກວ່າ 49 ລ້ານຄົນ; ຖັດຈາກນັ້ນແມ່ນ ອິນເດຍ ແລະ ບຣາຊິນ. ໃນ 24 ຊົ່ວໂມງຜ່ານມາ, ທົ່ວໂລກຢັ້ງຢືນມີຜູ້ຕິດເຊື້ອໃໝ່ຕື່ມອີກເກືອບ 560.000 ຄົນ, ມີຜູ້ຫາຍດີກວ່າ 394.500 ຄົນ ແລະ ມີ 6.287 ຄົນເສຍຊີວິດ.

        ພາຍຫຼັງທີ່ວົງການນັກວິທະຍາສາດ ກວດພົບເຊື້ອໄວຣັດກາຍພັນໃໝ່ຈາກ SARS – CoV – 2 ແມ່ນ B.1.1.529 ດ້ວຍຈຳນວນກາຍພັນສູງທີ່ສຸດ, ວັນທີ 26 ພະຈິກ, ອົງການອະນາໄມໂລກ ໄດ້ຈັດກອງປະຊຸມ ແລະ ຕັ້ງຊື່ໃຫ້ເຊື້ອໄວຣັດກາຍພັນນີ້ວ່າ Omicron, ພ້ອມທັງ ຖະແຫຼງວ່າ ນີ້ແມ່ນເຊື້ອໄວຣັດກາຍພັນທີ່ “ເປັນໜ້າວິຕົກກັງວົນ”. ໄລ່ມາຮອດປັດຈຸບັນ, ເຊື້ອໄວຣັດກາຍພັນ Omicron ໄດ້ກວດພົບຢູ່ ອາຟະລິກາດໃຕ້, ບົດສະວານາ, ອິດສະຣາແອັນ, ແບນຊິກ ແລະ ເຂດປົກຄອງພິເສດ ຮົ່ງກົງ (ຈີນ).