ທ່ານນາງນາຍົກລັດຖະມົນຕີ ເຢຍລະມັນ Angela Merkel  (ພາບ: TTXVN)

ການຢ້ຽມຢາມຄັ້ງນີ້ ແມ່ນເພື່ອແນໃສ່ເລີ່ມເຄື່ອນໄຫວການພົວພັນສອງຝ່າຍຄືນໃໝ່ ພາຍຫຼັງຖືກຢຸດສະຫງັກໃນສະໄໝອຳນາດການປົກຄອງຂອງທ່ານອະດີດປະທານາທິບໍດີ Donald Trump.

        ຕາມແຜນການ, ທ່ານນາງນາຍົກລັດຖະມົນຕີ ເຢຍລະມັນ Angela Merkel  ຈະມີການພົບປະກັບ ທ່ານຮອງປະທານາທິບໍດີ Kamala Harris ເພື່ອປຶກສາຫາລືກ່ຽວກັບການພົວພັນສອງຝ່າຍ, ຫຼັງຈາກນັ້ນ ທ່ານນາງ Angela Merkel ຈະເຂົ້າຮ່ວມການປຶກສາຫາລືກັບຜູ້ຕາງໜ້າວົງການວິສາຫະກິດ ອາເມລິກາ ແລະ ຮັບໃບປະກາດສະນີຍະບັດ ປະລິນຍາເອກ ກິດຕິມະສັກຂອງມະຫາວິທະຍາໄລ Johns Hopkins.

        ເຫດການສຳຄັນທີ່ສຸດໃນລາຍການເຄື່ອນໄຫວຄັ້ງນີ້ ແມ່ນການປຶກສາຫາລືກັບທ່ານປະທານາທິບໍດີ Joe Biden ຢູ່ ທຳນຽບຂາວ ໃນວັນທີ 15 ກໍລະກົດ. ທ່ານປະທານາທິບໍດີ Joe Biden ພ້ອມດ້ວຍພັນລະຍາ, ທ່ານນາງປະລິນຍາເອກ Jill Biden ຈະຈັດຕັ້ງງານລ້ຽງຕ້ອນຮັບທ່ານນາງນາຍົກລັດຖະມົນຕີ Angela Merkel ພ້ອມດ້ວຍ ສາມີ ແມ່ນທ່ານສາດສະດາຈານ, ປະລິນຍາເອກ Joanchim Sauer.