ທ່ານນາງຮອງປະທານປະເທດ ດັ້ງທິງອກທິ້ງ ຕ້ອນຮັບຄະນະສໍານັກຂ່າວສານ ອາເມລິກາ ລາຕີນ Prensa Latina
(VOVWORLD) - ຕອນບ່າຍວັນທີ 9 ກັນຍາ, ຢູ່ທໍານຽມປະທານປະເທດ, ທ່ານນາງຮອງປະທານປະເທດຫວຽດນາມ ດັ້ງທິງອກທິ້ງ ໄດ້ໃຫ້ການຕ້ອນຮັບຄະນະການນໍາສໍານັກຂ່າວສານ ອາເມລິກາ ລາຕີນ Prensa Latina ຂອງປະເທດ ກູບາ ໂດຍທ່ານປະທານ Luis Enrique Gonzalez Acosta ນໍາໜ້າ ເຊິ່ງພວມມີການຢ້ຽມຢາມ ແລະ ເຮັດວຽກຢູ່ຫວຽດນາມ.
 ທ່ານນາງຮອງປະທານປະເທດຫວຽດນາມ ດັ້ງທິງອກທິ້ງ ຕ້ອນຮັບທ່ານປະທານສໍານັກຂ່າວສານ ອາເມລິກາ ລາຕີນ Prensa Latina Luis Enrique Gonzalez Acosta |
ກ່າວຄໍາເຫັນທີ່ການຕ້ອນຮັບ, ທ່ານນາງຮອງປະທານປະເທດດັ້ງທິງອກທິ້ງ ໃຫ້ຮູ້ວ່າ: ປີ 2020, ຫວຽດນາມ ແລະ ກູບາ ສະເຫຼີມສະຫຼອງວັນສ້າງຕັ້ງການພົວພັນທາງການທູດຄົບຮອບ 60 ປີ, ສະນັ້ນ ສະເໜີໃຫ້ສໍານັກຂ່າວສານຫວຽດນາມ ແລະ Prensa Latina ຕ້ອງເພີ່ມທະວີການແບ່ງປັນຂໍ້ມູນຂ່າວສານກ່ຽວກັບບັນດາການເຄື່ອນໄຫວສະເຫຼີມສະຫຼອງທີ່ຖືກຈັດຕັ້ງຂຶ້ນຢູ່ສອງປະເທດ, ພ້ອມທັງສະໜອງຂໍ້ມູນຂ່າວສານຢ່າງທັນການ, ຊັດເຈນ, ພາວະວິໄສໃຫ້ບັນດາເພື່ອນມິດໃນພາກພື້ນ ແລະ ສາກົນ ກ່ຽວກັບສະພາບການເສດຖະກິດ-ສັງຄົມຂອງແຕ່ລະປະເທດ, ໂດຍສະເພາະແມ່ນສາຍພົວພັນມິດຕະພາບທີ່ເປັນມູນເຊື້ອລະຫວ່າງຫວຽດນາມ - ກູບາ.
ທ່ານ Luis Enrique Gonzalez Acosta ຢັ້ງຢືນວ່າ ຈະສືບຕໍ່ແລກປ່ຽນ, ສົມທົບກັບສໍານັກຂ່າວສານຫວຽດນາມຢ່າງແໜ້ນແຟ້ນ ເພື່ອປະກອບສ່ວນຈັດຕັ້ງພິທີສະເຫຼີມສະຫຼອງສາຍພົວພັນທາງການທູດລະຫວ່າງສອງປະເທດໃນປີ 2020 ຄົບຮອບ 60 ປີ ຢ່າງສໍາເລັດຜົນ, ນໍາການພົວພັນລະຫວ່າງສໍານັກຂ່າວສານສອງປະເທດຂຶ້ນສູ່ລະດັບສູງໃໝ່, ສົມກັບເປັນສາຍພົວພັນດ້ານການເມືອງລະຫວ່າງສອງປະເທດ.