(ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ເຂົ້າຮ່ວມກອງປະຊຸມຄົບຄະນະບັນດາການນຳ BRICS ເປີດກວ້າງ)

ວັນທີ 24 ຕຸລາ, ເນື່ອງໃນໂອກາດເຂົ້າຮ່ວມກອງປະຊຸມບັນດາການນຳ BRICS ເປີດກວ້າງ, ຢູ່ Kazan, ສະຫະພັນ ລັດເຊຍ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ພົບປະ 2 ຝ່າຍກັບການນຳປະເທດຈຳນວນໜຶ່ງ.

ທີ່ການພົບປະເຈລະຈາກັບທ່ານປະທານາທິບໍດີ ເວເນຊູເອລາ Nicolas Maduro, ການນຳ 2 ທ່ານໄດ້ເຫັນດີສືບຕໍ່ຊຸກຍູ້ການຮ່ວມມື 2 ປະເທດໃຫ້ເລິກເຊິ່ງ, ມີປະສິດທິຜົນ ແລະ ຮອບດ້ານກວ່າເກົ່າ ໃນຂົງເຂດເສດຖະກິດ, ການຄ້າ, ການລົງທຶນ, ກະສິກຳ, ນ້ຳມັນອາຍແກັດ, ໂທລະຄົມ; ແລະ ພິຈາລະນາເປີດກວ້າງການຮ່ວມມືອອກສູ່ຂົງເຂດໃໝ່, ມີຄວາມສາມາດບົ່ມຊ້ອນ.

ທີ່ການພົບປະກັບທ່ານປະທານາທິບໍດີ ສ.ເບລາຣຸດ Aleksander Lukashenko, ທ່ານນາຍົກລັດຖະມົນຕີ ຟ້າມມິງຈິງ ເນັ້ນໜັກວ່າ, 2 ພື້ນຖານເສດຖະກິດສາມາດເພີ່ມເຕີມໃຫ້ແກ່ກັນ, ສະເໜີຍູ້ແຮງການຂຸດຄົ້ນບັນດາຄວາມສາມາດບົ່ມຊ້ອນຮ່ວມມືດ້ານເສດຖະກິດ - ການຄ້າ 2 ຝ່າຍ…

ເມື່ອແລກປ່ຽນກັບທ່ານປະທານາທິບໍດີ ອູເບກິດສະຖານ Shavkat Mirziyoyev, ການນຳ 2 ທ່ານໄດ້ເຫັນດີຊອກຫາບັນດາມາດຕະການເປີດກວ້າງການຮ່ວມມືໄປສູ່ບັນດາຂົງເຂດ, ຄື: ນ້ຳມັນອາຍແກັດ, ການສຶກສາ - ບຳລຸງສ້າງ, ຄົ້ນຄວ້າເປີດສາຍການບິນໂດຍກົງໄປເຖິງບັນດາສະຖານທີ່ຕ່າງໆຂອງ 2 ປະເທດ.

ແລະກໍ່ໃນວັນດຽວກັນ, ທ່ານນາຍົກລັດຖະມົນຕີ ຟ້າມມິງຈິງ ກໍ່ໄດ້ພົບປະສັ້ນໆກັບການນຳບັນດາປະເທດ: ອາຟະລິກາໃຕ້, ອາແຊັກໄປຊານ, ອີຣານ, ສ.ກົງໂກ; ພົບປະກັບທ່ານເລຂາທິການໃຫຍ່ສະຫະປະຊາຊາດ Antonio Guterres; ລັດຖະມົນຕີການຕ່າງປະເທດ ອິນໂດເນເຊຍ, ໄທ, ອາຣັບບີ ຊະອຸດີ, ກຸຍບາ…

ຕອນຄ່ຳວັນທີ 24 ຕຸລາ, ເຮືອບິນໄດ້ນຳສົ່ງທ່ານນາຍົກລັດຖະມົນຕີ ຟ້າມມິງຈິງ ແລະ ຄະນະຜູ້ແທນຂັ້ນສູງ ຫວຽດນາມ ເດີນທາງອອກຈາກ Kazan, ສິ້ນສຸດການໄປປະຕິບັດງານເຂົ້າຮ່ວມກອງປະຊຸມບັນດາການນຳກຸ່ມ BRICS ເປີດກວ້າງ, ດ້ວຍຫົວຂໍ້ “BRICS ແລະ ຊີກໃຕ້ໜ່ວຍໂລກ: ພ້ອມກັນສ້າງໂລກທີ່ດີງາມກວ່າ”.