ທ່ານນາຍົກລັດຖະມົນຕີ ຟ້າມມິງຈິ໊ງ: ລັດຖະບານສືບຕໍ່ສ້າງເງື່ອນໄຂຢ່າງສຸດຂີດເພື່ອໃຫ້ນະຄອນ ໂຮ່ຈີມິນ ແລະ ບັນດາແຂວງຍູ້ໂລກລະບາດໂຄວິດ - 19 ຖອຍໄປໂດຍໄວ
(VOVWORLD) - ຕອນຄ່ຳວັນທີ 23 ກໍລະກົດ, ທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ເປັນປະທານກອງປະຊຸມແບບທາງໄກ ລະຫວ່າງຄະນະປະຈຳລັດຖະບານ ກັບ 21 ແຂວງ, ນະຄອນທາງພາກໃຕ້ ແລະ ຕອນໃຕ້ພາກກາງ ທີ່ໂຄວິດ - 19 ພວມແຜ່ລະບາດຢ່າງສັບສົນ ເພື່ອຕີລາຄາກ່ຽວກັບສະພາບການ ພາຍຫຼັງປະຕິບັດການແຍກຫ່າງສັງຄົມຕາມຄຳສັ່ງຂອງນາຍົກລັດຖະມົນຕີ ແລະ ໂທລະເລກອອກວັນທີ 21 ກໍລະກົດ ຂອງຄະນະປະຈຳຄະນະເລຂາສູນກາງພັກທີ່ໄດ້ປະກາດໃຊ້ໃນວັນທີ 21 ກໍລະກົດ ກ່ຽວກັບການສືບຕໍ່ເພີ່ມທະວີວຽກງານປ້ອງກັນ, ຕ້ານໂລກລະບາດໂຄວິດ - 19.
 ທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໊ງ ກ່າວຄຳເຫັນທີ່ກອງປະຊຸມ (ພາບ: TTXVN) |
ສະຫຼຸບກອງປະຊຸມ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໊ງ ຢັ້ງຢືນວ່າໃຫ້ບຸລິມະສິດອັນດັບໜຶ່ງໃຫ້ນະຄອນ ໂຮ່ຈີມິນ ແລະ ບັນດາແຂວງທີ່ໂລກລະບາດພວມມີການຜັນແປຢ່າງສັບສົນໃນຈຸດເວລານີ້ ແມ່ນປ້ອງກັນ, ຕ້ານໂລກລະບາດໂຄວິດ - 19, ແຕ່ບ່ອນໃດຕອບສະໜອງໄດ້ຄວາມຮຽກຮ້ອງຕ້ອງການ, ຄວາມປອດໄພໃນການປ້ອງກັນ, ຕ້ານໂລກລະບາດ ຍັງສືບຕໍ່, ຟື້ນຟູການຜະລິດ. ລັດຖະບານ ສືບຕໍ່ສ້າງເງື່ອນໄຂຢ່າງສຸດຂີດເພື່ອໃຫ້ນະຄອນ ໂຮ່ຈີມິນ ແລະ ບັນດາແຂວງ ຍູ້ໂລກລະບາດໃຫ້ຖອຍໄປໂດຍໄວ, ນຳຊີວິດ ແລະ ການຜະລິດກັບຄືນສູ່ເປັນປົກກະຕິໂດຍໄວ. ເພື່ອປ້ອງກັນ, ຕ້ານໂລກລະບາດຢ່າງມີປະສິດທິຜົນໃນໄລຍະຈະມາເຖິງ, ທ່ານນາຍົກລັດຖະມົນຕີສະເໜີໃຫ້ບັນດາທ້ອງຖິ່ນ ຈົ່ງເພີ່ມທະວີການເຄື່ອນໄຫວຂອງບັນດາໜ່ວຍງານປ້ອງກັນ, ຕ້ານໂລກລະບາດໂຄວິດ - 19 ໃນຊຸມຊົນ; ສືບຕໍ່ສ້າງຕັ້ງບັນດາສູນກູ້ໄພກູ້ຊີບ, ຊ່ວຍເຫຼືອປະຊາຊົນ ແລະ ວິສາຫະກິດ; ກະກຽມແຫຼ່ງຊັບພະຍາກອນມະນຸດ, ພື້ນຖານທາງດ້ານວັດຖຸ, ປະກອບວັດຖຸອຸປະກອນການແພດຢ່າງທັນການ ແລະ ພຽງພໍ ເພື່ອຮັບປະກັນການສັບຊ້ອນແຫຼ່ງກຳລັງໃຫ້ເໝາະສົມ, ມີປະສິດທິຜົນ ແລະ ປະຢັດມັດທະຍັດ, ໃນນັ້ນ ຖືການປົກປັກຮັກສາສຸຂະພາບ ແລະ ຊີວິດອິນຊີຂອງປະຊາຊົນ ແມ່ນສຳຄັນເໜືອກວ່າສິ່ງໃດໝົດ.