ທ່ານນາຍົກລັດຖະມົນຕີ ຟ້າມມິງຈິງ: ຮອດວັນທີ 30 ກັນຍາ ຜ່ອນຜັນການແຍກຫ່າງສັງຄົມເທື່ອລະກ້າວໂດຍມີການຄວບຄຸມ
(VOVWORLD) - ຕອນເຊົ້າວັນທີ 25 ກັນຍາ, ຢູ່ຮ່າໂນ້ຍ, ທ່ານນາຍົກລັດຖະມົນຕີ ຟ້າມມິງຈິງ, ຫົວໜ້າຄະນະຊີ້ນຳແຫ່ງຊາດກ່ຽວກັບການປ້ອງກັນ, ຕ້ານໂລກລະບາດໂຄວິດ - 19 ໄດ້ເປັນປະທານກອງປະຊຸມທາງໄກກັບ 63 ແຂວງ, ນະຄອນ ໃນທົ່ວປະເທດ.
 ທ່ານນາຍົກລັດຖະມົນຕີ ຟ້າມມິງຈິງ ເປັນປະທານກອງປະຊຸມທາງໄກກັບ 63 ແຂວງ, ນະຄອນ ໃນທົ່ວປະເທດ (ພາບ: sggp.org.vn) |
ກອງປະຊຸມຖືກຈັດຂຶ້ນແມ່ນເພື່ອແນ່ໃສ່ຕີລາຄາກ່ຽວກັບສະພາບການ, ການຜັນແປຂອງໂລກລະບາດໂຄວິດ - 19 ໃນ 2 ອາທິດຜ່ານມາ, ໝາກຜົນຂອງການປະຕິບັດບັນດາໜ້າທີ່, ມາດຕະການ, ຊີ້ແຈ້ງເຫດຜົນ, ບົດຮຽນປະສົບການກ່ຽວກັບການຊີ້ນຳ, ນຳພາ, ການຈັດຕັ້ງປະຕິບັດ; ນັບແຕ່ການກຳນົດເປົ້າໝາຍ, ໜ້າທີ່, ມາດຕະການທີ່ແທດເໝາະໃນໄລຍະຈະມາເຖິງ. ທ່ານນາຍົກລັດຖະມົນຕີ ຟ້າມມິງຈິງ ກໍຮຽກຮ້ອງໃຫ້ທົ່ວປະເທດຈົ່ງພະຍາຍາມນັບແຕ່ນີ້ຮອດວັນທີ 30 ກັນຍາ ຈະຜ່ອນຜັນການແຍກຫ່າງສັງຄົມໂດຍມີການຄວບຄຸມເທື່ອລະກ້າວເພື່ອຟື້ນຟູການພັດທະນາເສດຖະກິດ - ສັງຄົມ.
ຜູ້ນຳໜ້າລັດຖະບານ ກໍໃຫ້ຮູ້ວ່າ ວັນທີ 24 ກັນຍາ, ຄະນະປະຈຳສະພາແຫ່ງຊາດໄດ້ຕົກລົງຕໍ່ຂໍ້ສະເໜີຂອງລັດຖະບານກ່ຽວກັບການປະກາດໃຊ້ນະໂຍບາຍໜູນຊ່ວຍຊາວຜູ້ອອກແຮງງານ ແລະ ຜູ້ນຳໃຊ້ແຮງງານທີ່ຖືກຜົນກະທົບຈາກໂລກລະບາດໂຄວິດ - 19 ຈາກກອງທຶນປະກັນການວ່າງງານ.