ທ່ານນາຍົກລັດຖະມົນຕີ ຟ້າມມິງຈິງ ເຂົ້າຮ່ວມພິທີມອບ - ຮັບ ໃບຢັ້ງຢືນສິລະປະຟ້ອນ ແຊ່ວ ຊາວເຜົ່າຜູ້ໄທ ເປັນມໍລະດົກວັດທະນະທຳບໍ່ເປັນວັດຖຸຂອງມວນມະນຸດຈາກອົງການ UNESCO
(VOVWORLD) -ຕອນຄ່ຳວັນທີ 24 ກັນຍາ, ຢູ່ເທດສະບານເມືອງ ເຫງຍໂລ້, ແຂວງ ອຽນບາຍ, ທ່ານນາຍົກລັດຖະມົນຕີຫວຽດນາມ ຟ້າມມິງຈິງ ໄດ້ເຂົ້າຮ່ວມພິທີມອບ - ຮັບ ໃບຢັ້ງຢືນສິລະປະຟ້ອນ ແຊ່ວ ຊາວເຜົ່າຜູ້ໄທ ເປັນມໍລະດົກວັດທະນະທຳບໍ່ເປັນວັດຖຸຂອງມວນມະນຸດຈາກອົງການ UNESCO. ເຂົ້າຮ່ວມພິທີດັ່ງກ່າວ ຍັງມີທ່ານນາງ Pauline Tamesis ຜູ້ປະສານງານ ສປຊ ປະຈຳ ຫວຽດນາມ; ທ່ານ Christian Manhart ຫົວໜ້າຜູ້ຕາງໜ້າ UNESCO ແລະ ບັນດາແຂກສາກົນ.
 ພິທີມອບ - ຮັບ ໃບຢັ້ງຢືນສິລະປະຟ້ອນ ແຊ່ວ ຊາວເຜົ່າຜູ້ໄທ ເປັນມໍລະດົກວັດທະນະທຳບໍ່ເປັນວັດຖຸຂອງມວນມະນຸດຈາກອົງການ UNESCO |
ກ່າວຄຳເຫັນທີ່ພິທີ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ຢັ້ງຢືນວ່າ ວັດທະນະທຳແມ່ນພື້ນຖານທາງດ້ານຈິດໃຈຂອງສັງຄົມ, ທັງແມ່ນເປົ້າໝາຍ, ທັງແມ່ນກຳລັງແຮງພາຍໃນ, ແມ່ນກຳລັງໜູນ ກໍຄືແຫຼ່ງກຳລັງສຳຄັນ ເພື່ອພັດທະນາປະເທດຊາດ.
 ທ່ານນາຍົກລັດຖະມົນຕີ ຟ້າມມິງຈິງ ກ່າວຄຳເຫັນທີ່ພິທີ |
ພັກ, ລັດ ຫວຽດນາມ ຍາມໃດກໍກຳນົດການພັດທະນາວັດທະນະທຳ ໃຫ້ທຽບເທົ່າກັບເສດຖະກິດ, ການເມືອງ, ສັງຄົມ. ເພື່ອສືບຕໍ່ສ້າງພະລັງຊີວິດໃໝ່, ແຜ່ຂະຫຍາຍ ແລະ ສົ່ງແຫຼ່ງກຳລັງອັນແຮງກ້າແກ່ຄຸນຄ່າຂອງສິລະປະຟ້ອນແຊ່ວ ຊາວເຜົ່າຜູ້ໄທ, ທ່ານນາຍົກລັດຖະມົນຕີ ສະເໜີໃຫ້ອຳນາດການປົກຄອງ, ປະຊາຊົນ ແລະ ປະຊາຄົມຊາວເຜົ່າຜູ້ໄທ ຢູ່ບັນດາແຂວງເຂດ ໄຕບັກ, ກະຊວງວັດທະນະທຳ, ກິລາ ແລະ ທ່ອງທ່ຽວ ສົມທົບກັນຜັນຂະຫຍາຍ “ໂຄງການເຄື່ອນໄຫວແຫ່ງຊາດ ກ່ຽວກັບການອະນຸລັກຮັກສາ ແລະ ເສີມຂະຫຍາຍຄຸນຄ່າຂອງ ສີລະປະຟ້ອນ ແຊ່ວ ຊາວເຜົ່າຜູ້ໄທ - ມໍລະດົກວັດທະນະທຳບໍ່ເປັນວັດຖຸ” ຢ່າງເຂັ້ມງວດ ແລະ ມີປະສິດທິຜົນ, ຖືກຕ້ອງຕາມຄຳໝັ້ນສັນຍາກັບ UNESCO; ນຳມໍລະດົກວັດທະນະທຳເປັນສັບສົມບັດ, ຫັນແຫ່ງກຳລັງບົ່ມຊ້ອນໃຫ້ກາຍເປັນແຫຼ່ງກຳລັງພັດທະນາປະເທດຊາດ, ຍົກສູງຊີວິດທາງດ້ານວັດຖຸ ແລະ ຈິດໃຈຂອງປະຊາຊົນ.