ຕອນບ່າຍວັນທີ 02 ເມສາ, ຢູ່ສຳນັກງານລັດຖະບານ, ທີ່ ຮ່າໂນ້ຍ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ເປັນປະທານກອງປະຊຸມຄັ້ງທີ 2 ຄະນະຊີ້ນຳການສ້າງແຜນຮ່າງພັດທະນາເສດຖະກິດເອກະຊົນ.

        ກ່າວຄຳເຫັນຢູ່ທີ່ນີ້, ທ່ານນາຍົກລັດຖະມົນຕີ ຟ້າມມິງຈິງ ເນັ້ນໜັກວ່າ: ສະພາບການ ຫວຽດນາມ ໃນປະຈຸບັນ ຮຽກຮ້ອງຕ້ອງມີຫຼາຍໜ້າທີ່ບຸກທະລຸໃນການພັດທະນາເສດຖະກິດຂອງ ຫວຽດນາມ. ໃນນັ້ນ, ເສດຖະກິດເອກະຊົນແມ່ນກຳລັງຫຼັກແຫຼ່ງສ້າງວັດຖຸ, ຊັບສິນ, ປະກອບສ່ວນສຳຄັນເຂົ້າໃນການເຕີບໂຕເສດຖະກິດ, ສ້າງວຽກເຮັດງານທຳ, ຍົກສູງສະມັດຕະພາບແຮງງານ. ທ່ານນາຍົກລັດຖະມົນຕີສະເໜີປ່ຽນແປງໃໝ່ຈິນຕະນາການ, ສ້າງຄວາມເຫັນດີເຫັນພ້ອມດ້ານຄວາມຮັບຮູ້, ປຸກລຸກຄວາມໄວ້ເນື້ອເຊື່ອໃຈ, ສ້າງກຳລັງໜູນໃໝ່, ບັນຍາກາດໃໝ່ເພື່ອພັດທະນາເສດຖະກິດເອກຊົນ.

        ທ່ານນາຍົກລັດຖະມົນຕີກໍ່ສະເໜີວິສາຫະກິດພາກເອກະຊົນຍູ້ແຮງວິທະຍາສາດ, ເຕັກໂນໂລຊີ, ນະວັດຕະກຳ, ການຫັນເປັນດີຈີຕອນ, ຫັນເປັນສີຂຽວ, ດຳເນີນທຸລະກິດແບບຍືນຍົງ; ເພີ່ມທະວີການເຊື່ອມຕໍ່ລະຫວ່າງວິສາຫະກິດພາກເອກະຊົນ; ສ້າງຈັນຍາບັນໃນການດຳເນີນທຸລະກິດ, ໜ້າທີ່ຄວາມຮັບຜິດຊອບຕໍ່ສັງຄົມ.