(VOVWORLD) - ໂຄງການເພື່ອແນໃສ່ເຊື່ອມຕໍ່ຍຸດທະສາດບັນດາມະຫາວິທະຍາໄລ ຫວຽດນາມ ກັບບັນດາມະຫາວິທະຍາໄລ ອາເມລິກາ, ໜູນຊ່ວຍບັນດາມະຫາວິທະຍາໄລຂອງສອງຝ່າຍ ສ້າງແຜນການຮ່ວມມືຢ່າງແທດຈິງ, ມີປະສິດທິຜົນ ແລະ ຍືນຍົງ.
 ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໃຫ້ການຕ້ອນຮັບຄະນະຜູ້ແທນ ມະຫາວິທະຍາໄລ21 ແຫ່ງ ທີ່ມີຊື່ສຽງແຖວໜ້າ ອາເມລິກາ (ພາບ: VOV) |
ຕອນເຊົ້າວັນທີ 31 ມີນາ, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ໃຫ້ການຕ້ອນຮັບຄະນະຜູ້ແທນ ມະຫາວິທະຍາໄລ21 ແຫ່ງ ທີ່ມີຊື່ສຽງແຖວໜ້າ ອາເມລິກາ ເຊິ່ງພວມເຂົ້າຮ່ວມໂຄງການແລກປ່ຽນວິຊາການສຶກສາ ສາກົນ 2025 ຢູ່ ຫວຽດນາມ. ໂຄງການເພື່ອແນໃສ່ເຊື່ອມຕໍ່ຍຸດທະສາດບັນດາມະຫາວິທະຍາໄລ ຫວຽດນາມ ກັບບັນດາມະຫາວິທະຍາໄລ ອາເມລິກາ, ໜູນຊ່ວຍບັນດາມະຫາວິທະຍາໄລຂອງສອງຝ່າຍ ສ້າງແຜນການຮ່ວມມືຢ່າງແທດຈິງ, ມີປະສິດທິຜົນ ແລະ ຍືນຍົງ.
ເມື່ອແລກປ່ຽນກັບຄະນະ, ທ່ານນາຍົກລັດຖະມົນຕີ ຟ້າມມິງຈິງ ສະເໜີບັນດາມະຫາວິທະຍາໄລຂອງສອງປະເທດສົມທົບກັນສ້າງບັນດາແຜນການ, ໂຄງການຮ່ວມມືທີ່ມີລັກສະນະຍາວນານ, ຍືນຍົງ, ແທດຈິງ ແລະ ມີປະສິດທິຜົນດ້ວຍຮູບແບບທີ່ອຸດົມສົມບູນ, ມີຫົວຄິດປະດິດສ້າງ, ມີໄຫວພິບຄື: ແລກປ່ຽນນັກສຶກສາ, ຄູອາຈານ, ເຊື່ອມຕໍ່ການບຳລຸງສ້າງ, ບັນດາໂຄງການຄົ້ນຄ້ວາລວມ, ບັນດາຂົງເຂດໃໝ່ເພື່ອຊ່ວຍຫວຽດນາມຂຸດຄົ້ນທະເລ, ອາວະກາດ, ເຂດໃຕ້ດິນ, ອາເມລິກາ ພິຈາລະນາເປີດກວ້າງໂຄງການສະໜອງທຶນການສຶກສາ, ໃຫ້ບຸລິມະສິດຄ່າຮຽນໃຫ້ແກ່ນັກສຶກສາ, ນັກຄົ້ນຄ້ວາ ຫວຽດນາມ.
ສ່ວນຝ່າຍອາເມລິກາ, ທ່ານເອກອັກຄະລັດຖະທູດ ອາເມລິກາ ປະຈຳ ຫວຽດນາມ ແລະ ຜູ້ຕາງໜ້າບັນດາມະຫາວິທະຍາໄລອາເມລິກາ ໄດ້ຕີລາຄາສູງຍຸດທະສາດພັດທະນາຂອງ ຫວຽດນາມ, ເປັນຕົ້ນແມ່ນໃນຂົງເຂດການສຶກສາ, ບຳລຸງສ້າງ, ທ່ານໃຫ້ຮູ້ວ່າພ້ອມແລ້ວທີຈະຮ່ວມມື, ຮ່ຽງບ່າຮ່ຽງໄຫຼ່ພ້ອມກັບ ຫວຽດນາມ ປະຕິບັດບັນດາຍຸດທະສາດພັດທະນາເສດຖະກິດ - ສັງຄົມ, ພິເສດແມ່ນໃນການສຶກສາ, ບຳລຸງສ້າງ, ວິທະຍາສາດ, ເຕັກໂນໂລຢີ ແລະ ນະວັດຕະກຳ, ຍົກສູງຄຸນນະພາບແຫຼ່ງຊັບພະຍາກອນມະນຸດ, ປະກອບສ່ວນເຮັດໃຫ້ການພົວພັນຄູ່ຮ່ວມມືຍຸດທະສາດ ຮອບດ້ານ ຫວຽດນາມ - ອາເມລິກາ ເລິກເຊິ່ງກ່ວາອີກ.