(vovworld) - ຕອນ​ບ່າຍ​ວັນ​ທີ 19/05/2016, ​ເນື່ອງ​ໃນ​ໂອກາດ​ກອງ​ປະຊຸມ​ຂັ້ນ​ສູງ ອາ​ຊຽນ - ລັດ​ເຊຍ ຢູ່ Sochi ສະຫະພັນ ລັດ​ເຊຍ, ທ່ານ​ນາຍົກລັດຖະມົນຕີ ຫວຽດນາມ ຫງວຽນຊວນ​ຟຸກ ມີ​ບັນ​ດາ​ການ​ພົບ​ປະ 2 ຝ່າຍ​ກັບ​ທ່ານ​ນາ​ຍົກ​ລັດຖະມົນຕີ ກຳປູ​ເຈຍ Samdech Hun Sen, ທ່ານ​ປະທານາທິບໍດີ ອິນ​ໂດ​ເນ​ເຊຍ Joko Widodo ​​ແລະ ທ່ານ​ປະທານາທິບໍດີ ມຽນມາ Htin Kyaw. ທີ່ການພົບປະກັບທ່ານນາຍົກລັດຖະມົນຕີ ກຳປູເຈຍ Samdech Hun Sen, ນາຍົກລັດຖະມົນຕີ 2 ທ່ານຢືນຢັນວ່າ: ລັດຖະບານ 2 ປະເທດ ຫວຽດນາມ ແລະ ກຳປູເຈຍ ສືບຕໍ່ສະຫງວນບຸລິມະສິດສູງໃຫ້​ແກ່ການປັບປຸງ ແລະ ເພີ່ມທະວີການພົວພັນ ຖານບ້ານໃກ້ເຮືອນຄຽງ ອັນດີງາມ ມິດຕະພາບທີ່​ເປັນ​ມູນ​ເຊື້ອ, ການ​ຮ່ວມ​ມື​ຮອບດ້ານ, ຄວາມ​ໝັ້ນຄົງ​​ຍາວນານ​ລະຫວ່າງ 2 ປະ​ເທດ.

        ທີ່​ການ​ພົບ​ປະ​ກັບ​ທ່ານ​ປະທານາທິບໍດີ ອິນ​ໂດ​ເນ​ເຊຍ Joko Widodo, ການ​ນຳ 2 ທ່ານ​ເນັ້ນ​ໜັກ​ວ່າ: ​ໃນ​ໄລຍະ​ຈະ​ມາ​ເຖິງ, 2 ຝ່າຍ​ຄວນ​ສືບ​ຕໍ່​ຊຸກຍູ້​ການ​ພົບ​ປະ​ແລ​ກປ່ຽນ​ຄະນະ​ຜູ້​ແທນ​ທຸກ​ຂັ້ນ, ​ເພີ່ມ​ທະວີ​ການ​ຮ່ວມ​ມື​ດ້ານ​ປ້ອງ​ກັນຊາ​ດປ້ອງ​ກັນ​ຄວາມ​ສະ​ຫງົບ. ກ່ຽວ​ກັບ​ບັນດາ​ບັນຫາ​ພາກ​ພື້ນ, 2 ຝ່າຍ​ເນັ້ນ​ໜັກ​ວ່າ ຄວນ​ເພີ່ມ​ທະວີ​ຄວາມ​ສາມັກຄີ ​ແລະ ຮັກສາ​ບົດບາດ​ເປັນ​ໃຈ​ກາງຂອງ ອາ​ຊຽນ ​ໃນ​ບັນດາ​ບັນຫາ​ໃຫຍ່​ທີ່​ກ່ຽວຂ້ອງ​​ເຖິງ​ຄວາ​ມສະຫງົບ, ຜົນ​ປະ​ໂຫຍ​ດຂອງ​ແຕ່ລະ​ປະ​ເທດ ​ແລະ ຂອງ​ພາກ​ພື້ນ; ຢືນຢັນ​ຄວາມ​ສຳຄັນ​ຂອງ​ເລື່ອງ​ຮັບປະກັນ​ສັນຕິ​ພາບ, ສະຖຽນ​ລະ​ພາບ, ຄວາມ​ໝັ້ນຄົງ​ປອດ​ໄພ, ຄວາມ​ເສລີ​ໃນ​ການ​ເດີນ​ທະ​ເລ, ການບິນ​ຢູ່​ທະ​ເລ​ຕາ​ເວັນ​ອອກ, ປະຕິບັດ​ຖະ​ແຫຼ​ງການ​ກ່ຽວ​ກັບ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (DOC) ​ແລະ ລົງ​ນາມ​ໃນ​ປະມວນ​ຂໍ້​ກຳນົດ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (COC) ​ໂດຍ​ໄວ​ ກໍ່​ຄື​ແກ້​ໄຂ​ບັນດາ​ການ​ຂັດ​ແຍ້​ງກັນ​ບົນ​ທະ​ເລ ​ໂດຍ​ອີງ​ໃສ່​ກົດໝາຍ​ສາກົນ, ​ໃນ​ນັ້ນ​ມີ​ສົນ​ທິສັນຍາ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ວ່າ​ດ້ວຍທະ​ເລ​ປີ 1982.