ທ່ານນາຍົກລັດຖະມົນຕີຫງວຽນເຕິ໋ນຢຸງອອກຈາກມີລານໄປຢ້ຽມຢາມສຳນັກວາຕີກັງ
Thanh Chung ນັກຂ່າວ VOV ໃຫ້ຂ່າວຈາກມີລານ -
ທ່ານນາຍົກລັດຖະມົນຕີ ຫງວຽນເຕິ໋ນຢຸງ ພົບປະກັບສັນທະປາປາ Benedict XVI.
(ພາບ: nguyenphutrong.net)
(vovworld) - ຕອນບ່າຍວັນທີ 18/10 (ຕາມເວລາຫວຽດນາມ), ທ່ານນາຍົກລັດຖະມົນຕີ ຫງວຽນເຕິ໋ນຢຸງ ພ້ອມກັບຄະນະຜູ້ແທນຂັ້ນສູງຫວຽດນາມໄດ້ເດີນທາງອອກຈາກນະຄອນ ມີລານ, ສິ້ນສຸດການເຂົ້າຮ່ວມກອງປະຊຸມຂັ້ນສູງເວທີປາໄສຮ່ວມມືອາຊີ - ເອີລົບ (ASEM) 10 ແລະ ເດີນທາງໄປນະຄອນຫຼວງ ໂຣມ, ເລີ່ມຕົ້ນການຢ້ຽມຢາມສຳນັກວາຕີກັງ.
ກ່ອນໜ້ານັ້ນ, ຕອນຄຳ່ວັນທີ 17/10 (ຕາມເວລາຫວຽດນາມ), ກອງປະຊຸມຂັ້ນສູງເວທີປາໄສຮ່ວມມືອາຊີ - ເອີລົບ (ASEM) 10 ໄດ້ອັດລົງ, ພາຍຫຼັງດຳເນີນການເຮັດວຽກມາເປັນເວລາ 2 ວັນ. ກອງປະຊຸມໄດ້ຮັບຮອງເອົາຖະແຫຼງການຂອງທ່ານປະທານດ້ວຍຂໍ້ຕົກລົງທີ່ສຳຄັນຫຼາຍຢ່າງ, ສົ່ງສານທີ່ແຂງແຮງເຖິງບັນດາການນຳ ASEM ກ່ຽວກັບຄວາມຕັດສິນໃຈເພີ່ມທະວີການພົວພັນຄູ່ຮ່ວມມືອາຊີ - ເອີລົບ. ບັນດາການນຳກໍ່ຮັບຮອງເອົາຂໍ້ລິເລີ່ມໃໝ່ອີກ 27 ສະບັບ.
ຢູ່ນອກ ASEM 10, ທ່ານ ນາຍົກລັດຖະມົນຕີ ຫງວຽນເຕິ໋ນຢຸງ ກໍ່ໄດ້ພົບປະກັບການນຳບາງປະເທດ. ເມື່ອພົບປະກັບທ່ານປະທານາທິບໍດີມຽນ ມາ U Thein Sein, ການນຳສອງທ່ານໄດ້ເຫັນດີເປັນເອກະພາບຈັດຕັ້ງກອງປະຊຸມຄັ້ງທີ 8 ຄະນະກຳມະການປະສົມຫວຽດນາມ - ມຽນມາ ແລະ ລົງນາມໃນສັນຍາສົ່ງເສີມ ແລະ ອາລັກຂາການລົງທຶນໂດຍໄວ. ສອງຝ່າຍເຫັນດີສືບຕໍ່ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສພາກພື້ນ ແລະ ສາກົນ. ສອງຝ່າຍກໍ່ເຫັນດີສືບຕໍ່ຊຸກຍູ້ຄວາມສາມັກຄີ, ເສີມຂະຫຍາຍບົດບາດໃຈກາງຂອງອາຊຽນໃນອົງປະກອບພາກພື້ນ, ປະກອບສ່ວນຮັບປະກັນສັນຕິພາບ, ສະຖຽນລະພາບ, ຄວາມປອດໄພໃນການເດີນທະເລ ແລະ ການບິນຢູ່ທະເລຕາເວັນອອກ.
ທີ່ການພົບປະກັບທ່ານນາຍົກລັດຖະມົນຕີໄທ. ນາຍົກລັດຖະມົນຕີທັງສອງທ່ານ ໄດ້ແລກປ່ຽນບັນດາມາດຕະການເພື່ອນຳການພົວພັນລະຫວ່າງຫວຽດນາມ - ໄທ ໃຫ້ພັດທະນາຢ່າງມີປະສິດທິຜົນກວ່າ. ໄທຢືນຢັນຈະສືບຕໍ່ສົມທົບກັນຢ່າງແໜ້ນແຟ້ນກັບຫວຽດນາມ ແລະ ບັນດາປະເທດອາຊຽນໃນການກໍ່ສ້າງປະຊາຄົມອາຊຽນສາມັກຄີ; ເຫັນດີເປັນເອກະສັນນຳກັນວ່າ, ໃນບົດບາດເປັນປະເທດປະສານການພົວພັນອາຊຽນ - ຈີນນັ້ນ, ໄທຈະປະກອບສ່ວນເຂົ້າໃນການປະຕິບັດຖະແຫຼງການກ່ຽວກັບການປະພືດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ເຈລະຈາເພື່ອບັນລຸໄດ້ຂໍ້ກຳນົດກ່ຽວກັບການປະພືດຂອງຝ່າຍຕ່າງໆຢູ່ທະເລຕາເວັນອອກ (COC) ໂດຍໄວ.
ນອກນັ້ນທ່ານ ນາຍົກລັດຖະມົນຕີ ຫງວຽນເຕິ໋ນຢຸງ ຍັງມີການພົບປະກັບປະທານາທິບໍດີມົງໂກນ, ປະທານາທິບໍດີ ບູນດາຣີ ແລະ ທ່ານນາຍົກລັດຖະມົນຕີນອກແວອີກ.
Thanh Chung ນັກຂ່າວ VOV ໃຫ້ຂ່າວຈາກມີລານ