(VOVWORLD) - ຕອນເຊົ້າວັນທີ 9 ທັນວາ, ຢູ່ຮ່າໂນ້ຍ, ຄະນະພັກການທະຫານສູນກາງ, ກະຊວງປ້ອງກັນປະເທດຫວຽດນາມ ຈັດຕັ້ງກອງປະຊຸມການທະຫານ ແລະ ການເມືອງທົ່ວກອງທັບປີ 2019.
 ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກກ່າວຄໍາເຫັນທີ່ກອງປະຊຸມ (ພາບ: TTXVN) |
ກ່າວຄໍາເຫັນທີ່ກອງປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ສະເໜີໃຫ້ທົ່ວກອງທັບ ຍາມໃດກໍຕ້ອງມີສະຕິລະວັງຕົວ, ເປັນເຈົ້າການກໍາແໜ້ນສະພາບການ, ຕີລາຄາ ແລະ ຄາດຄະເນສະພາບການໃຫ້ຖືກຕ້ອງ, ໂດຍສະເພາະແມ່ນບັນດາບັນຫາສັບສົນທີ່ເກີດຂຶ້ນໃໝ່, ເປັນເສນາທິການຢ່າງທັນການໃຫ້ແກ່ພັກ, ລັດ ມີນະໂຍບາຍຮັບມື, ແກ້ໄຂບັນດາກໍລະນີທີ່ກ່ຽວຂ້ອງເຖິງດ້ານການທະຫານ, ການປ້ອງກັນຊາດຢ່າງມີໄຊ; ບໍ່ປະໃຫ້ຢູ່ໃນທ່າຮັບຢ່າງເດັດຂາດ, ປົກປັກຮັກສາເອກະລາດ, ອະທິປະໄຕ, ຄວາມເປັນເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດຢ່າງໝັ້ນຄົງໜັກແໜ້ນ, ໂດຍສະເພາະແມ່ນຢູ່ທະເລ. ໄປຄຽງຄູ່ກັນນັ້ນ, ກະຊວງປ້ອງກັນປະເທດ ຕ້ອງສືບຕໍ່ເຊື່ອມຊຶມແນວທາງການຕ່າງປະເທດເປັນເອກະລາດ, ເປັນເຈົ້າຕົນເອງຂອງພັກຢ່າງເລິກເຊິ່ງ, ຍົກສູງປະສິດທິຜົນວຽກງານພົວພັນດ້ານປ້ອງກັນຊາດກັບຕ່າງປະເທດ; ກະກຽມຢ່າງລອບຮອບຖີ່ຖ້ວນ ແລະ ຈັດຕັ້ງບັນດາການເຄື່ອນໄຫວປ້ອງກັນຊາດ, ການທະຫານໃນປີ 2020 ເມື່ອຫວຽດນາມ ເປັນປະທານ ອາຊຽນ; ຊຸກຍູ້ການພົວພັນຮ່ວມມືດ້ານປ້ອງກັນຊາດກັບບັນດາປະເທດ, ໂດຍສະເພາະແມ່ນບັນດາປະເທດບ້ານໃກ້ເຮືອນຄຽງ, ບັນດາປະເທດ ອາຊຽນ ແລະ ເພື່ອນມິດທີ່ເປັນມູນເຊື້ອ. ເປັນເຈົ້າການເຂົ້າຮ່ວມບັນດາກົນໄກຮ່ວມມືດ້ານປ້ອງກັນຊາດຫຼາຍຝ່າຍ, ເປີດກວ້າງການຮ່ວມມືກັບ ສະຫະພາບເອີຣົບ; ສືບຕໍ່ເຂົ້າຮ່ວມບັນດາການເຄື່ອນໄຫວຮັກສາສັນຕິພາບ, ຍົກສູງທີ່ຕັ້ງບົດບາດ, ອິດທິພົນຊື່ສຽງຂອງປະເທດຊາດ ແລະ ກອງທັບໃນປະຊາຄົມສາກົນ.