ຕໍ່ໜ້າຄວາມຫຍຸ້ງຍາກ ແລະ ສິ່ງທ້າທາຍທີ່ໄດ້ວາງອອກໃນປະຈຸບັນ, ທ່ານນາຍົກລັດຖະມົນຕີຖືວ່າ ບັນດາພື້ນຖານເສດຖະກິດ APEC ຄວນຮ່ວມແຮງຮ່ວມໃຈ, ຮ່ວມມືກັນປະດິດຄິດສ້າງຢ່າງ

ມີປະສິດທິຜົນ ເພື່ອພ້ອມກັນພັດທະນາວັດທະນາຖາວອນ ແລະ ຍືນຍົງ.

        ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ຊົມເຊີຍບັນດາລັດຖະມົນຕີ ແລະ ຜູ້ແທນປຶກສາຫາລືບັນດາຫົວຂໍ້ບຸລິມະສິດ ທີ່ກອງປະຊຸມລັດຖະມົນຕີການເງິນ APEC 2017, ໃນນັ້ນມີຫົວຂໍ້ “ ການເງິນໃຫ້ພື້ນຖານໂຄງລ່າງ ” ເພື່ອແນໃສ່ເພີ່ມທະວີການເຂົ້າຮ່ວມຂອງພາກເອກະຊົນ ເຂົ້າໃນບັນດາໂຄງການລົງທຶນພື້ນຖານໂຄງລ່າງ, ເປັນຕົ້ນແມ່ນຮູບການຮ່ວມມືພາກລັດ ແລະ ພາກເອກະຊົນ ( PPP ); ຫົວຂໍ້ “ ຄວາມອ່ອນແອລົງຂອງພື້ນຖານ ພາສີອາກອນ ແລະ ເຄື່ອນຍ້າຍຜົນກຳໄລ ” ເພື່ອແນໃສ່ປັບປຸງກະແສທຶນ, ຍົກສູງລັກສະນະໂປ່ງໃສຂອງສະພາບແວດລ້ອມແຫ່ງການດຳເນີນທຸລະກິດ; ຫົວຂໍ້ “ ການເງິນ ແລະ ການປະກັນຄວາມສ່ຽງຈາກໄພພິບັດທຳມະຊາດ ” ເພື່ອແນໃສ່ສະກັດກັ້ນ ແລະ ຫຼຸດຜ່ອນການກະທົບຈາກໄພທຳມະຊາດ. ແລະ ຫົວຂໍ້ “ ການເງິນກວມລວມ ” ມຸ່ງໄປເຖິງການແບ່ງປັນບົດຮຽນ, ຂໍ້ສະເໜີແນະ, ນະໂຍບາຍແກ້ໄຂຄວາມຫຍຸ້ງຍາກໃນການສຳຜັດກັບສິນເຊື່ອ ແລະ ສະໜອງບັນດາການບໍລິການດ້ານການເງິນໃຫ້ປະຊາຊົນ, ບັນດາອົງການຈັດຕັ້ງວິສາຫະກິດ, ຊາວກະສິກອນ, ສະຫະກອນ, ປະກອບສ່ວນຫຼຸດຜ່ອນຄວາມທຸກຍາກ, ພັດທະນາໃຫ້ທົ່ວເຖິງ. ທ່ານນາຍົກລັດຖະມົນຕີ ຫງວຽນຊວນຟຸກ ກ່າວວ່າ

        “ບັນດາຄວາມຫຍຸ້ງຍາກ, ສິ່ງທ້າທາຍແມ່ນໃຫຍ່ຫຼວງທີ່ສຸດ ເມື່ອບັນດາແຫຼ່ງກຳລັງດ້ານການເງິນຂອງພວກເຮົາຍັງຈຳກັດຢູ່. ສິ່ງດັ່ງກ່າວແມ່ນຮຽກຮ້ອງໃຫ້ພວກເຮົາຕ້ອງມີການຮ່ວມແຮງຮ່ວມໃຈກັນ, ທັງແມ່ນຄວາມມານະພະຍາຍາມຮັກສາສິ່ງແວດລ້ອມສັນຕິພາບ, ສະຖຽນລະພາບ, ທັງແມ່ນການແບ່ງປັນບົດຮຽນ, ຮ່ວມມືປະດິດຄິດສ້າງຢ່າງມີປະສິດທິຜົນ ເພື່ອພ້ອມກັນພັດທະນາວັດທະນາຖາວອນ ແລະ ຍືນຍົງ. ໃນໄລຍະຜ່ານມາ, ບັນດາລັດຖະມົນຕີການເງິນ APECໄດ້ຮ່ວມມືຢ່າງຕັ້ງໜ້າ, ມຸ່ງໄປເຖິງບັນດາເປົ້າໝາຍກ່ຽວກັບການຍູ້ແຮງຮ່ວມສຳພັນເສດຖະກິດຢ່າງເລິກເຊິ່ງ, ກວ້າງຂວາງ, ຊຸກຍູ້ການເຕີບໂຕຢ່າງມີຫົວຄິດປະດິດສ້າງ ແລະ ກວມລວມ, ຍົກສູງກຳລັງຄວາມສາມາດແກ້ງແຍ້ງຂອງບັນດາວິສາຫະກິດຂະໜາດນ້ອຍ ແລະ ກາງ. APEC 2017  ແມ່ນປີທຳອິດແຫ່ງການປະຕິບັດຍຸດທະສາດປ່ຽນແປງໃໝ່ວິວັດທະນາການລັດຖະມົນຕີການເງິນ APEC ”