ທ່ານປະທານປະເທດ ຫວຽດນາມ  ເລືອງເກື່ອງ ກ່າວຄຳເຫັນທີ່ພິທີ (ພາບ:  VOV)

ຕອນບ່າຍວັນທີ 13 ພະຈິກ ຕາມເວລາທ້ອງຖິ່ນ, ຢູ່ທຳນຽບປະທານາທິບໍດີ ເປຣູ ຢູ່ນະຄອນຫຼວງ Lima ພາຍຫຼັງສິ້ນສຸດກອງປະຊຸມພົບປະສົນທະນາຢ່າງຈົບງາມ, ທ່ານປະທານາທິບໍດີ ນາງ Dina Ercilia Boluarte Zegarra ໄດ້ເປັນປະທານພິທີປະດັບຫຼຽນໄຊ “ຕາເວັນແຫ່ງ ເປຣູ” ຊັ້ນ  Grand Cross ໃຫ້ແກ່ທ່ານປະທານປະເທດ ຫວຽດນາມ ເລືອງເກື່ອງ. ກ່າວຄຳເຫັນທີ່ພິທີ, ທ່ານປະທານປະເທດ ຫວຽດນາມ ເລືອງເກື່ອງ ກ່າວວ່າ:

        “ຫຼຽນໄຊອັນສູງສົ່ງເຊິ່ງຂ້າພະເຈົ້າເປັນກຽດໄດ້ຮັບໃນມື້ນີ້ແມ່ນແຫຼ່ງກຳລັງໃຈ, ລະດົມກຳລັງໃຫ້ແກ່ຂ້າພະເຈົ້າຕ້ອງພະຍາຍາມຫຼາຍກວ່າອີກ, ພ້ອມກັບເພື່ອນມິດ ເປຣູ ເພີ່ມພູນຄູນສ້າງສາຍພົວພັນຮ່ວມມື ຫວຽດນາມ - ເປຣູ ໃຫ້ນັບມື້ນັບພັດທະນາຢ່າງແທດຈິງ, ມີປະສິດທິຜົນຢ່າງບໍ່ຢຸດຢັ້ງ, ມຸ່ງໄປເຖິງລະດັບສູງໃໝ່, ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ ແລະ ການພັດທະນາຢ່າງວັດທະນາຖາວອນຢູ່ສອງພາກພື້ນ ແລະ ໃນໂລກ.”

        ນີ້ແມ່ນລາງວັນອັນສູງສົ່ງ, ສະແດງໃຫ້ເຫັນນ້ຳໃຈອັນພິເສດຂອງລັດ ແລະ ປະຊາຊົນ ເປຣູ ທີ່ມີຕໍ່ ຫວຽດນາມ ກໍຄືຖືການພົວພັນຮ່ວມມືມິດຕະພາບລະຫວ່າງສອງປະເທດເປັນສຳຄັນ ໃນໂອກາດສະເຫຼີມສະຫຼອງ 30 ປີແຫ່ງວັນສ້າງຕັ້ງສາຍພົວພັນທາງການທູດ (1994 – 2024).

        ຫຼັງຈາກນັ້ນ, ການນຳ ເປຣູ ແລະ ຫວຽດນາມ ກໍ່ໄດ້ພົບປະກັບສື່ມວນຊົນສອງປະເທດເພື່ອແຈ້ງໝາກຜົນກອງປະຊຸມພົບປະສົນທະນາ.

        ກ່າວຄຳເຫັນໃນການຖະແຫຼງຂ່າວ, ທ່ານປະທານາທິບໍດີ ນາງ Dina Ercilia Boluarte Zegarra ຢັ້ງຢືນວ່າ ໃນສາມທົດສະວັດຜ່ານມາ, ສອງປະເທດໄດ້ປັບປຸງການພົວພັນມິດຕະພາບ, ການຮ່ວມມື ແລະ ຄວາມເຂົ້າໃຈກັນບົນພື້ນຖານມີຄວາມເຫັນດີເຫັນພ້ອມໃນຫຼາຍບັນຫາ ບໍ່ວ່າດ້ານສອງຝ່າຍ ຫຼື ຫຼາຍຝ່າຍ ແລະ ໄລ່ມາຮອດປັດຈຸບັນ, ສອງຝ່າຍໄດ້ກາຍເປັນຄູ່ຮ່ວມມືສຳຄັນຂອງກັນ. ໃນການຢ້ຽມຢາມຄັ້ງນີ້ຂອງຄະນະຜູ້ແທນຂັ້ນສູງ ຫວຽດນາມ, ສອງຝ່າຍໄດ້ມີການແລກປ່ຽນສຳຄັນ ແລະ ມີປະສິດທິຜົນ, ເຕື້ອງເຖິງຫຼາຍຫົວຂໍ້ຮ່ວມມືສອງຝ່າຍ, ກໍຄືບັນດາບັນຫາຂອງພາກພື້ນ ແລະ ສາກົນ ເຊິ່ງສອງຝ່າຍມີຄວາມສົນໃຈ. ການນຳສອງທ່ານກໍໄດ້ມີການສົນທະນາຢ່າງເປີດອົກເປີດໃຈ ເພື່ອແນໃສ່ຊອກຫາບັນດາທິດທາງການຮ່ວມມືໃໝ່ເພື່ອຜົນປະໂຫຍດຂອງປະຊາຊົນສອງປະເທດ.

        ຕອນເຊົ້າຂອງວັນດຽວກັນ, ທ່ານປະທານປະເທດ ເລືອງເກື່ອງ ກໍ່ໄດ້ພົບປະກັບທ່ານປະທານສານສູງສຸດ Javier Arévalo Vela.