(vovworld) - ຕອນຄ່ຳວັນທີ 13/4, ຢູ່ເຂດປູຊະນີຍະສະຖານປະຫວັດສາດວິຫານຮຸ່ງ ຢູ່ແຂວງຟູທໍ້ໄດ້ຈັດພິທີເຊີດຊູ, ຮັບໃບຮັບຮອງ“ການເຫລື້ອມໄສໄຫວ້ບູຊາເຈົ້າຊີວິດຮຸ່ງຢູ່ ຟໍທໍ້” ເປັນມໍລະດົກວັດທະນະທຳບໍ່ມີຮູບຮ່າງຕາງຫນ້າຂອງມວນມະນຸດ ແລະ ໄຂງານບຸນວິຫານຮຸ່ງ 2013. ເຂົ້າຮ່ວມພິທີ, ມີທ່ານປະທານປະເທດເຈືອງເຕີນຊາງ, ຜູ້ຕາງຫນ້າການນຳບັນດາກະຊວງ, ຂະແຫນງການ, ທ້ອງຖິ່ນຕ່າງໆ ແລະ ອົງການຈັດຕັ້ງສາກົນພ້ອມດ້ວຍຜູ້ຕາງຫນ້າຊາວຫວຽດນາມອາໄສຢູ່ຕ່າງປະເທດ ແລະ ນັກທ່ອງທ່ຽວເປັນຈຳນວນຫລວງຫລາຍ. ກ່າວຄຳເຫັນນະທີ່ນີ້, ທ່ານປະທານປະເທດເຈືອງເຕີນຊາງ ເນັ້ນຫນັກວ່າ:
“ພິທີໄຫວ້ບູຊາບັນດາເຈົ້າຊີວິດຮຸ່ງບໍ່ພຽງແຕ່ແມ່ນການເຄື່ອນໄຫວດ້ານຈິດວິນຍານພາວະນາປະເທດຊາດມີຄວາມສະຖຽນລະພາບ, ວັດທະນາຖາວອນເທົ່ານັ້ນ ຫາກມີຄວາມໝາຍຢາກໃຫ້ວົງຄະນາຍາດບັນດາເຜົ່າຢູ່ຫວຽດນາມ ມີຄວາມສາມັກຄີ, ອຸ້ມຊູຊ່ວຍເຫລືອເຊິ່ງກັນ ແລະ ກັນອີກດ້ວຍ. ສະນັ້ນຜ່ານປະຫວັດສາດນັບພັນປີ, ການເຫລື້ອມໃສໄຫວ້ບູຊາເຈົ້າຊີວິດຮຸ່ງຍັງຄົງສືບທອດຈາກຄົນລຸ້ນນີ້ໄປສູ່ຄົນລຸ້ນອື່ນ. ນີ້ແມ່ນແຫລ່ງສ້າງກຳລັງແຮງເພື່ອໃຫ້ປະເທດຫວຽດນາມຜ່ານຜ່າຄວາມຫຍຸ້ງຍາກ, ສິ່ງທົດສອບ ແລະ ພັດທະນາຢ່າງບໍ່ຢຸດຢັ້ງ.”
ໄຂພິທີໄຫວ້ບູຊາບັນດາເຈົ້າຊີວິດຮຸ່ງ
ພາບ:internet
|
ແລະໃນໂອກາດໄຂງານບຸນວິຫານຮຸ່ງ 2013, ຕອນເຊົ້າວັນທີ 14/4 ຢູ່ ນະຄອນຫວຽດຈີ່, ສະຫະພັນສິລະປະວັນນະຄະດີ ຟູທໍ້ ສົມທົບກັບສູນວັດທະນະທຳ ສເກົາຫລີ ຢູ່ ຫວຽດນາມ ໄດ້ຈັດຕັ້ງງານວາງສະແດງຮູບພາບສິລະປະ. ມີຮູບພາບ 120 ແຜ່ນ ແລະ ພາບແຕ້ມ 50 ແຜ່ນໄດ້ຮັບການຄັດເລືອກນຳເອົາວາງສະແດງໃນຄັ້ງນີ້ ແມ່ນຮູບພາບແນະນຳກ່ຽວກັບປະຫວັດສາດ, ວັດທະນະທຳທີ່ເປັນມູນເຊື້ອ ແລະ ງານບຸນພື້ນເມືອງເຂດດິນແດນບັນພະບຸລຸດ. ທ່ານ ໂດ໋ງອກຢູງ, ປະທານສະຫະພັນສິລະປະວັນນະຄະດີແຂວງ ຟູທໍ້ ຢືນຢັນວ່າ:
“ນີ້ແມ່ນການເຄື່ອນໄຫວວັດທະນະທຳທີ່ແທດຈິງເພື່ອຮັບໃຊ້ນັກທ່ອງທ່ຽວມາເຂົ້າຮ່ວມພິທີໄຫວ້ບູຊາເຈົ້າຊີວິດຮຸ່ງ. ນີ້ກໍແມ່ນການເຄື່ອນໄຫວມີຄວາມໝາຍເຮັດໃຫ້ທຸກຄົນມີຄວາມເຂົ້າໃຈກ່ຽວກັບສິລະປະວັດທະນະທຳເວົ້າລວມ ແລະ ຂົງເຂດສິລະປະ, ຖ່າຍຮູບຂອງຫວຽດນາມ ແລະ ສເກົາຫລີ.”