ທ່ານລັດຖະມົນຕີການຕ່າງປະເທດ ຈີນ ຫວາງອີ່ ກະກຽມ ເດີນທາງໄປຢ້ຽມຢາມບາງປະເທດ ອາຊີຕາເວັນອອກສ່ຽງໃຕ້ ແລະ ສ.ເກົາຫຼີ.
(VOVWORLD) - ໃນລະຫວ່າງວັນທີ 10 – 15 ກັນຍາ, ທ່ານລັດຖະມົນຕີການຕ່າງປະເທດ ຈີນ ຫວາງອີ່ ຈະເລີ່ມດຳເນີນການຢ້ຽມຢາມບາງປະເທດໃນພາກພື້ນ ອາຊີຕາເວັນອອກສ່ຽງໃຕ້ ເຊິ່ງລວມມີ ຫວຽດນາມ, ກຳປູເຈຍ, ສິງກະໂປ ພ້ອມດ້ວຍ ສ.ເກົາຫຼີ. ການຢ້ຽມຢາມຄັ້ງນີ້ແມ່ນເພື່ອແນໃສ່ເພີ່ມທະວີການຮ່ວມມືລະຫວ່າງ ຈີນ ກັບບັນດາປະເທດ ຄູ່ຮ່ວມມືໃນຫຼາຍດ້ານ.
 ທ່ານລັດຖະມົນຕີການຕ່າງປະເທດ ຈີນ ຫວາງອີ່ (ພາບ: TTXVN) |
ໃນການເດີນທາງຢ້ຽມຢາມຄັ້ງນີ້, ທ່ານລັດຖະມົນຕີການຕ່າງປະເທດ ຫວາງອີ່ ຈະຢ້ຽມຢາມ ຫວຽດນາມ ໃນລະຫວ່າງວັນທີ 10 – 12 ກັນຍາ ແລະ ຈະພ້ອມກັບທ່ານຮອງນາຍົກລັດຖະມົນຕີ ຫວຽດນາມ ຟ້າມບິ່ງມິນ ເປັນປະທານຮ່ວມກອງປະຊຸມຄັ້ງທີ 13 ຄະນະກຳມະການຊີ້ນຳການຮ່ວມມືສອງຝ່າຍ ຫວຽດນາມ - ຈີນ. ຖັດຈາກນັ້ນ, ທ່ານ ຫວາງອີ່ ຈະເດີນທາງໄປຢ້ຽມຢາມ ກຳປູເຈຍ ແລະ ສິງກະໂປ ດ້ວຍເນື້ອໃນຈຸດສຸມແມ່ນປຶກສາຫາລືກ່ຽວກັບການຮ່ວມມືເສດຖະກິດ.
ແລະ ສຸດທ້າຍ, ທ່ານຫວາງອີ່ ຈະເດີນທາງໄປຢ້ຽມຢາມ ສ.ເກົາຫຼີ. ເຊິ່ງຄາດວ່າ, ທ່ານຈະມີການປຶກສາຫາລືກັບຄູ່ຕຳແໜ່ງ ສ.ເກົາຫຼີ Chung Eui – yong ແລະ ພົບປະກັບທ່ານປະທານາທິບໍດີ ສ.ເກົາຫຼີ Moon Jae – in, ປຶກສາຫາລືກ່ຽວກັບການພົວພັນສອງຝ່າຍ, ສະພາບການຢູ່ແຫຼມເກົາຫຼີ, ບັນດາບັນຫາໃນພາກພື້ນ ແລະ ສາກົນ ເຊິ່ງຕ່າງຝ່າຍຕ່າງມີຄວາມສົນໃຈ.
ນີ້ກໍແມ່ນຂໍ້ມູນຂ່າວ ເຊິ່ງທ່າ ຫວາງວິນບິນ ໂຄສົກກະຊວງການຕ່າງປະເທດ ຈີນ ແຈ້ງໃຫ້ຊາບໃນວັນທີ 07 ກັນຍາ.
ຕ໊ວນດາດ - ນັກຂ່າວ VOV ປະຈຳ ປັກກິ່ງ.