ທ່ານຮອງນາຍົກລັດຖະມົນຕີ ເລມິງຄ໊າຍ ພົບປະສອງຝ່າຍກັບທ່ານຮອງນາຍົກລັດຖະມົນຕີ ກຳປູເຈຍ ແລະ ທ່ານຮອງນາຍົກລັດຖະມົນຕີ ສິງກະໂປ
(VOVWORLD) - ວັນທີ 23 ພຶດສະພາ, ໃນຂອບເຂດການເດີນທາງໄປ ຍີ່ປຸ່ນ ເຂົ້າຮ່ວມກອງປະຊຸມອະນາຄົດ ອາຊີ ຄັ້ງທີ 29 ຢູ່ ໂຕກຽວ, ທ່ານ ເລມິງຄ໊າຍ ຮອງນາຍົກລັດຖະມົນຕີ ຫວຽດນາມ ໄດ້ພົບປະສອງຝ່າຍກັບທ່ານ Sun Chanthol ຮອງນາຍົກລັດຖະມົນຕີ ກຳປູເຈຍ ແລະ ທ່ານ Gan Kim Yong ຮອງນາຍົກລັດຖະມົນຕີ ສິງກະໂປ.
 ທ່ານ ເລມິງຄ໊າຍ ຮອງນາຍົກລັດຖະມົນຕີ ຫວຽດນາມ ພົບປະກັບທ່ານSun Chanthol ຮອງນາຍົກລັດຖະມົນຕີ ກຳປູເຈຍ (ພາບ: VOV) |
ທີ່ການພົບປະກັບທ່ານ Sun Chanthol ຮອງນາຍົກລັດຖະມົນຕີ ກຳປູເຈຍ, ທ່ານ ເລມິງຄ໊າຍ ຮອງນາຍົກລັດຖະມົນຕີ ຫວຽດນາມ ໄດ້ຕີລາຄາວ່າ ການຮ່ວມມືລະຫວ່າງສອງປະເທດໃນໄລຍະຜ່ານມາຍັງຮັກສາໄດ້ທ່ວງທ່າພັດທະນາເປັນປົກກະຕິ ດ້ວຍການຮ່ວມມືດ້ານເສດຖະກິດແມ່ນຈຸດເດັ່ນ, ວົງເງິນການຄ້າມີການເຕີບໂຕຢ່າງກະໂດດຂັ້ນ ໃນໄຕມາດທີ 1 ຂອງປີ 2024. ໂດຍເຫັນດີຕໍ່ການຕີລາຄາດັ່ງກ່າວ, ທ່ານ Sun Chanthol ຮອງນາຍົກລັດຖະມົນຕີ ກຳປູເຈຍ ຖືວ່າ ເພື່ອບັນລຸໄດ້ເປົ້າໝາຍຍົກວົງເງິນການຄ້າສອງຝ່າຍຂຶ້ນເຖິງ 20 ຕື້ USD, ສອງປະເທດຕ້ອງເພີ່ມທະວີການພົວພັນດ້ານເສດຖະກິດ - ການຄ້າ - ການລົງທຶນ ແລະ ລັດຖະບານ ກຳປູເຈຍ ຈະສົ່ງເສີມບັນດາວິສາຫະກິດ ຫວຽດນາມ ມາລົງທຶນຢູ່ປະເທດ ກຳປູເຈຍ ໃຫ້ຫຼາຍກວ່າອີກ.
 ທ່ານຮອງນາຍົກລັດຖະມົນຕີ ເລມິງຄ້າຍ ພົບປະກັບທ່ານ Gan Kim Yong ຮອງນາຍົກລັດຖະມົນຕີ ສິງກະໂປ (ພາບ: VOV) |
ທີ່ການພົບປະກັບທ່ານ Gan Kim Yong ຮອງນາຍົກລັດຖະມົນຕີ ສິງກະໂປ, ສອງຝ່າຍໄດ້ຕີລາຄາສູງໝາກຜົນການຮ່ວມມືຢ່າງຕັ້ງໜ້າລະຫວ່າງສອງປະເທດໃນທຸກຂົງເຂດ, ໂດຍສະເພະແມ່ນການຮ່ວມມືດ້ານເສດຖະກິດ; ເຫັນດີພິຈາລະນາຍົກການພົວພັນສອງຝ່າຍຂຶ້ນສູ່ລະດັບສູງໃໝ່, ສ້າງປະຖົມປັດໄຈນຳການພົວພັນຮ່ວມມື ຫວຽດນາມ - ສິງກະໂປ ກາຍເປັນແບບຢ່າງອະນາຄົດໃນປະຊາຄົມ ອາຊຽນ. ທ່ານ ເລມິງຄ້າຍ ຮອງນາຍົກລັດຖະມົນຕີ ຫວຽດນາມ ສະເໜີໃຫ້ທ່ານຮອງນາຍົກລັດຖະມົນຕີ ສິງກະໂປ ສືບຕໍ່ຊຸກຍູ້ການຜັນຂະຫຍາຍສັນຍາຂອບ ກ່ຽວກັບການເຊື່ອມຕໍ່ສອງພື້ນຖານເສດຖະກິດ, ການພົວພັນດ້ານເສດຖະກິດສີຂຽວ - ເສດຖະກິດດີຈີຕອນ ຢ່າງມີປະສິດທິຜົນ; ເປີດກວ້າງບັນດາໂຄງການລົງທຶນໂດຍກົງຈາກຕ່າງປະເທດ (FDI) ທີ່ມີຄຸນນະພາບສູງໃນບັນດາຂົງເຂດເຕັກໂນໂລຢີທີ່ຫາກໍພົ້ນເດັ່ນ; ຫັນປ່ຽນເຂດອຸດສາຫະກຳ ຫວຽດນາມ - ສິງກະໂປ (VSIP) ຕາມຮູບແບບອັດສະລິຍະ, ສີຂຽວ ແລະ ຍືນຍົງ; ຍູ້ງແຮງການຮ່ວມມືດ້ານການສຶກສາ, ບຳລຸງສ້າງ, ການທ່ອງທ່ຽວ ແລະ ພົບປະແລກປ່ຽນປະຊາຊົນ.