ທ່ານເລຂາທິການໃຫຍ່ ຫງວຽນຟູຈ້ອງ ເຮັດວຽກຢູ່ແຂວງ ຟູທໍ້
(ພາບ: nguyenphutrong.net)
(vovworld)- ຕອນເຊົ້າວັນທີ 25/2 ຢູ່ ນະຄອນ ຫວຽດຈີ່, ທ່ານເລຂາທິການໃຫຍ່ ພັກກອມມູນິດ ຫວຽດນາມ ຫງວຽນຟູຈ້ອງ ໄດ້ເຮັດວຽກກັບຄະນະປະຈຳພັກແຂວງ ແລະ ການນຳຫລັກແຫລ່ງຂອງແຂວງ ຟູທໍ້ ກ່ຽວກັບໝາກຜົນເບື້ອງຕົ້ນຈຳນວນຫນຶ່ງໃນການປະຕິບັດມະຕິກອງປະຊຸມໃຫຍ່ທົ່ວປະເທດຂອງພັກຄັ້ງທີ 11 ແລະ ມະຕິສູນກາງພັກຄັ້ງທີ 4 ກ່ຽວກັບບາງບັນຫາຮີບດ່ວນໃນການກໍ່ສ້າງພັກປະຈຸບັນ. ທ່ານເລຂາທິການໃຫຍ່ ຫງວຽນຟູຈ້ອງ ຢືນຢັນວ່າ: ບັນດາໝາກຜົນເບື້ອງຕົ້ນຂອງຄະນະພັກແຂວງ ຟູທໍ້ ທີ່ບັນລຸໄດ້ໃນການປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກ ແລະ ບັນດາຫນ້າທີ່ການເມືອງຢູ່ທ້ອງຖິ່ນ ແມ່ນຍ້ອນມີຄວາມເອົາໃຈໃສ່ເຖິງວຽກງານກໍ່ສ້າງພັກເປັນຢ່າງດີ, ຜ່ານນັ້ນ ສະແດງໃຫ້ເຫັນ ຄວາມຮັບຮູ້ຂອງພະນັກງານ, ສະມາຊິກພັກ ກ່ຽວກັບຄວາມສຳຄັນຂອງວຽກງານກໍ່ສ້າງພັກ. ທ່ານເລຂາທິການໃຫຍ່ ຫງວຽນຟູຈ້ອງ ກ່າວວ່າ:
“ຜ່ານການຕຳນິຕິຊົມຕົນເອງ ແລະ ຕຳນິຕິຊົມກັນ, ສິ່ງສຳຄັນ ແມ່ນພວກເຮົາເຫັນໄດ້ຈຸດດີ, ຈຸດອ່ອນ ຢ່າງເລິກເຊິ່ງ, ພິເສດ ແມ່ນຂໍ້ຈຳກັດ. ຈາກນັ້ນ ໄຈ້ແຍກເພື່ອເຫັນໄດ້ຄວາມຮັບຜິດຊອບຂອງຕົນເພື່ອປັບປຸງ ແລະ ປະຕິບັດວຽກງານກໍ່ສ້າງພັກໃຫ້ດີກວ່າເກົ່າ, ວາງອອກບັນດາມາດຕະການປະຕິບັດໃນໄລຍະຈະມາເຖິງ.”