ພິທີມອບອັດຖິທະຫານ ອາເມລິກາ ທີ່ຫາຍສາບສູນປາງສົງຄາມຢູ່ ຫວຽດນາມ
(ພາບ: Văn Sơn/TTXVN)
(vovworld) – ເນື່ອງໃນໂອກາດທ່ານປະທານປະເທດ ຫວຽດນາມ ເຈືອງເຕີນຊາງ ຢ້ຽມຢາມ ອາເມລິກາ ຢ່າງເປັນທາງການ ຕາມຄຳເຊື້ອເຊີນຂອງທ່ານປະທານາທິບໍດີ Barack Obama, ວັນທີ 24/7, ບັນດານັກຮົບເກົ່າ ຫວຽດນາມ ແລະ ອາເມລິກາ ມີການພົບປະຢູ່ນະຄອນຫຼວງ ວໍຊິງຕັນ ເພື່ອແລກປ່ຽນຂໍ້ມູນຂ່າວສານພ້ອມກັນຊຸກຍູ້ວິວັດການແກ້ໄຂບັນດາຜົນເສຍຫາຍຈາກສົງຄາມ. ກ່າວຄຳເຫັນທີ່ການພົບປະ, ທ່ານພົນຕີ ຟູ່ງຄັກດັງ, ຮອງປະທານສະມາຄົມນັກຮົບເກົ່າ ຫວຽດນາມ, ຕີລາຄາສູງບັນດາການປະກອບສ່ວນຂອງບັນດາທະຫານຜ່ານເສີກ ອາເມລິກາ ໃນໄລຍະຜ່ານມາ ໃນການແກ້ໄຂຜົນຮ້າຍຢ້ອນຫຼັງຈາກສົງຄາມ ຢູ່ ຫວຽດນາມ, ພິເສດແມ່ນການສະໜອງຂໍ້ມູນຂ່າວສານເພື່ອຊອກຫາອັດຖິທະຫານ ຫວຽດນາມ ຫາຍສາບສູນ. ທ່ານພົນຕີ ຟູ່ງຄັກດັງ ສະເໜີໃຫ້ນັກຮົບເກົ່າ 2 ປະເທດຄວນເຊັນບົດບັນທຶກຊ່ວຍຈຳກ່ຽວກັບບັນດາຜົນງານການຮ່ວມມືທີ່ບັນລຸໄດ້, ຮຽກຮ້ອງໃຫ້ທະຫານຜ່ານເສີກ ອາເມລິກາ ຂົນຂວາຍ ລັດຖະບານ ແລະ ສະພາແຫ່ງຊາດ ປະເທດນີ້ ມີການປະກອບສ່ວນຫຼາຍກ່ວາອີກ ເພື່ອແກ້ໄຂຜົນຮ້າຍຢ້ອນຫຼັງຈາກສົງຄາມ... ຜູ້ອຳນວຍການໃຫຍ່ສະມາຄົມທະຫານຜ່ານເສີກ ອາເມລິກາ ທີ່ເຄີຍເຂົ້າຮ່ວມສົງຄາມ ຢູ່ ຫວຽດນາມ, ທ່ານ Rick Weidman ຖືວ່າ: ບັນດາທະຫານຜ່ານເສີກ ອາເມລິກາ ປາດຖະໜາຢາກແບ່ງປັນ ແລະ ປະກອບສ່ວນເຂົ້າໃນວິວັດການແກ້ໄຂຜົນຮ້າຍຢ້ອນຫຼັງຈາກສົງຄາມຢູ່ ຫວຽດນາມ. ທ່ານຖືວ່າ: ລັດຖະບານ ອາເມລິກາ ຄວນໜູນຊ່ວຍໃຫ້ ຫວຽດນາມ ຫຼາຍກ່ວາອີກ, ພິເສດແມ່ນໃນບັນຫາຈຳກັດທາດພິດສີສົ້ມ ແລະ ເກັບກູ້ທຳລາຍລະເບີດບໍ່ທັນແຕກ.