ນາຍົກລັດຖະມົນຕີ ຫງວຽນຊວນຟຸກ ຕ້ອນຮັບຄະນະວິສາຫະກິດສະພາດຳເນີນທຸລະກິດ ອາເມລິກາ - ອາຊຽນ

ຕອນບ່າຍວັນທີ 28 ມີນາ, ເມື່ອກ່າວຄຳເຫັນໃນການຕ້ອນຮັບຄະນະວິສາຫະກິດຂຶ້ນກັບສະພາດຳເນີນທຸລະກິດ ອາເມລິກາ - ອາຊຽນ (USABC) ທີ່ສຳນັກງານລັດຖະບານ, ທ່ານນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ: ລັດຖະບານ ຫວຽດນາມ ໄດ້ເອົາໃຈໃສ່ເປັນພິເສດເຖິງການເປີດກ້ວາງການພົວພັນຮ່ວມມື ກ່ຽວກັບເສດຖະກິດ, ການຄ້າ, ການລົງທຶນກັບ ອາເມລິກາ ແລະ ພິເສດແມ່ນໃນການຊຸກຍູ້ການພົວພັນຮ່ວມມືລະຫວ່າງວິສາຫະກິດ 2 ປະເທດ ຫວຽດນາມ -  ອາເມລິກາ.

        ທີ່ການຕ້ອນຮັບ, ບັນດາວິສາຫະກິດ USABC ໄດ້ສະແດງຄວາມປາດຖະໜາຢາກໄດ້ຮັບການສະໜັບສະໜູນຂອງທ່ານນາຍົກລັດຖະມົນຕີ ແລະ ບັນດາອົງການມີໜ້າທີ່ຮັບຜິດຊອບຂອງ ຫວຽດນາມ ເພື່ອແນໃສ່ຍູ້ໄວຄວາມກ້າວໜ້າ, ແກ້ໄຂບັນດາໂຄງການຂອງບັນດາວິສາຫະກິດ ອາເມລິກາ ຢູ່ ຫວຽດນາມ ໃນຂົງເຂດຕ່າງໆ.

        ທ່ານນາຍົກລັດຖະມົນຕີ ຫງວຽນຊວນຟຸກ ຢັ້ງຢືນວ່າ: ປະຊາຄົມວິສາຫະກິດ ອາເມລິກາ ໄດ້ ແລະ ຍາມໃດກໍ່ສວມບົດບາດສຳຄັນໃນວິວັດການພັດທະນາຂອງການພົວພັນ 2 ຝ່າຍ ແລະ ຊຸກຍູ້ບັນດາຄາດໝາຍພັດທະນາຂອງ ຫວຽດນາມ. ບົນຈິດໃຈນັ້ນ, ທ່ານນາຍົກລັດຖະມົນຕີ ສະເໜີໃຫ້ USABC ແລະ ບັນດາວິສາຫະກິດ ອາເມລິກາ ສືບຕໍ່ເອົາໃຈໃສ່, ເປີດກ້ວາງການລົງທຶນຢູ່ຕະຫຼາດ ຫວຽດນາມ, ແມ່ນຂົວເຊື່ອມຕໍ່ແນະນຳ ແລະ ດຶງດູດບັນດາວິສາຫະກິດໃໝ່ຂອງ ອາເມລິກາ ເຂົ້າມາ ຫວຽດນາມ ທຳມາຫາກິນຢ່າງຍາວນານ, ເປັນປົກກະຕິ.