ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ມອບຂອງຂວັນໃຫ້ໜັງສືພິມ ເຍີນເຢຶນ

ຕອນບ່າຍວັນທີ 05 ມີນາ, ເນື່ອງໃນໂອກາດສະເຫຼີມສະຫຼອງວັນໜັງສືພິມເຍີນເຢີນ ອອກສະບັບທຳອິດ ຄົບຮອບ 67 ປີ (11/03/1951 – 11/03/2018), ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ລົງຢ້ຽມຢາມ ແລະ ເຮັດວຽກກັບ ໜັງສືພິມ ເຍີນເຢີນ (ປະຊາຊົນ). ຢູ່ທີ່ນີ້, ທ່ານນາຍົກລັດຖະມົນຕີຮຽກຮ້ອງ ໜັງສືພິມ ເຍີນເຢີນ (ປະຊາຊົນ) ຕ້ອງຮັກສາທິດທາງການເມືອງໃຫ້ໝັ້ນຄົງ, ປະຕິບັດຕາມຈຸດປະສົງຂອງໜັງສືພິມພັກ, ຍົກສູງນ້ຳໃຈປະຕິວັດ, ຈົ່ງຮັກພັກດີຕໍ່ພັກ, ປະເທດຊາດ ແລະ ປະຊາຊົນ. ທ່ານນາຍົກລັດຖະມົນຕີເນັ້ນໜັ້ກວ່າ ໃນສະພາບການທີ່ໂລກ ບໍ່ພຽງແຕ່ເວົ້າເຖິງການປະຕິວັດ 4.0 ເຊິ່ງຍັງແມ່ນການປະຕິວັດ 5.0, ໜັງສືພິມ ເຍີນເຢີນ (ປະຊາຊົນ) ຕ້ອງສືບຕໍ່ເສີມຂະຫຍາຍບັນດາຜົນສຳເລັດທີ່ບັນລຸໄດ້, ເສີມຂະຫຍາຍຮູບແບບການສື່ສານຫຼາຍຮູບການທີ່ພວມມີ, ຜ່ານນັ້ນ ປະກອບສ່ວນເຂົ້າໃນການຊີ້ນຳນຳພາ, ວຽກງານແນວຄິດສື່ມວນຊົນຂອງພັກ, ລັດ.

        ທ່ານນາຍົກລັດຖະມົນຕີສະເໜີໜັງສືພິມ ເຍີນເຢີນ ສືບຕໍ່ຍົກສູງຄຸນນະພາບ, ໂດຍສະເພາະແມ່ນສື່ສິ່ງພິມອື່ນໆຂອງໜັງສືພິມ ເຍີນເຢີນ; ໃນນັ້ນ ມີການໂຄສະນາ, ການແນະນຳ, ຕ້ອງມີການປ່ຽນແປງໃໝ່ກວ່າອີກ ເພື່ອຮັບໃຊ້ຜູ້ອ່ານ,ປ່ຽນແປງໃໝ່ເນື້ອໃນບົດຂຽນ, ວິທີການສື່ສານ ແລະ ເສີມຂະຫຍາຍການສື່ສານຫຼາຍຮູບການຂອງ ໜັງສືພິມ ເຍີນເຢີນ (ປະຊາຊົນ) ຢ່າງບໍ່ຢຸດຢັ້ງ. ໜັງສືພິມ ເຍີນເຢີນ (ປະຊາຊົນ) ຕ້ອງປະຕິບັດໜ້າທີ່ຕໍ່ສູ້ປ້ອງກັນທັດສະນະ, ແນວທາງຂອງພັກ, ນະໂຍບາຍກົດໝາຍຂອງລັດຕໍ່ໜ້າການທຳລາຍຂອງບັນດາເປົ້າໝາຍເປັນປໍລະປັກ, ຄົນຊົ່ວໃຫ້ເປັນຢ່າງດີ ພິເສດແມ່ນໃນສະພາບການທີ່ປະກົດມີຫຼາຍຂໍ້ມູນຂ່າວສານທີ່ບໍ່ດີ.