(VOVWORLD) - 4 ຫ້ອງວ່າການດັ່ງກ່າວຕ້ອງປະຕິບັດໜ້າທີ່ເປັນເສນາທິການເປັນຢ່າງດີ. ເປັນເສນາທິການຕ້ອງເພື່ອຜົນປະໂຫຍດລວມ, ຫຼີກລ້ຽງຜົນປະໂຫຍດພັກພວກຢ່າງເດັດຂາດ, ເດັດດ່ຽວຕ້ານການສໍ້ລາດບັງຫຼວງ.
 ທ່ານ ຫງວຽນຊວນຟຸກ ກ່າວຄຳເຫັນທີ່ກອງປະຊຸມ |
ຕອນບ່າຍວັນທີ 23 ມັງກອນ, ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ເຂົ້າຮ່ວມ ແລະ ກ່າວຄຳເຫັນຊີ້ນຳກອງປະຊຸມຕີລາຄາວຽກງານສົມທົບກັນປີ 2017, ກຳນົດທິດວຽກງານປີ 2018 ແລະ ລົງນາມ ໃນລະບຽບການສົມທົບທາງວຽກງານລະຫວ່າງຫ້ອງວ່າການສູນກາງພັກ, ຫ້ອງວ່າການປະທານປະເທດ, ຫ້ອງວ່າການສະພາແຫ່ງຊາດ ແລະ ຫ້ອງວ່າການລັດຖະບານ. ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ສະເໜີວ່າ: 4 ຫ້ອງວ່າການດັ່ງກ່າວຕ້ອງປະຕິບັດໜ້າທີ່ເປັນເສນາທິການເປັນຢ່າງດີ. ເປັນເສນາທິການຕ້ອງເພື່ອຜົນປະໂຫຍດລວມ, ຫຼີກລ້ຽງຜົນປະໂຫຍດພັກພວກຢ່າງເດັດຂາດ, ເດັດດ່ຽວຕ້ານການສໍ້ລາດບັງຫຼວງ.
ຫວນຄືນໜຶ່ງປີຜ່ານມາ, ທ່ານນາຍົກລັດຖະມົນຕີ ຕີລາຄາວ່າ 4 ຫ້ອງວ່າການຂັ້ນສູນກາງ ໄດ້ມານະພະຍາຍາມປະຕິບັດບັນດາໜ້າທີ່ໄດ້ຮັບມອບໝາຍ, ພ້ອມທັງມີການສົມທົບກັນເປັນຢ່າງດີ, ແໜ້ນແຟ້ນ, ເປັນປະຈຳ. ມູນເຊື້ອແຫ່ງການຮ່ວມມືນີ້ຄວນໄດ້ສືບຕໍ່ເສີມຂະຫຍາຍ.
ໂດຍຖືວ່າ, ປີ 2018 ແມ່ນປີບານພັບ, ມີຄວາມໝາຍສຳຄັນໃນການປະຕິບັດແຜນການ 5 ປີ 2016 – 2020, ທ່ານນາຍົກລັດຖະມົນຕີ ສະເໜີໃຫ້ 4 ຫ້ອງວ່າການຂັ້ນສູນກາງ ສືບຕໍ່ປະຕິບັດວຽກງານເປັນເສນາທິການໃຫ້ດີ ເພື່ອຮັບປະກັນທຸກຂົງເຂດຂອງປະເທດລ້ວນແຕ່ໄດ້ຮັບການຊີ້ນຳ, ບໍລິຫານ, ຄຸ້ມຄອງເປັນຢ່າງດີ, ຮັບປະກັນລັກສະນະວິທະຍາສາດ, ມີປະສິດທິຜົນ, ປະກອບສ່ວນປະຕິບັດສຳເລັດບັນດາໜ້າທີ່ໄດ້ຮັບມອບໝາຍຢ່າງມີໄຊ.