(vovworld) - ຕອນເຊົ້າວັນທີ 27/02, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ມີການເຮັດວຽກກັບສະຫະພັນໃຫຍ່ແຮງງານຫວຽດນາມ ເພື່ອແນໃສ່ຕີລາຄາໝາກຜົນແຫ່ງການປະຕິບັດກົດລະບຽບກ່ຽວກັບການພົວພັນລະຫວ່າງລັດຖະບານກັບສະຫະພັນໃຫຍ່ແຮງງານຫວຽດນາມ. ກ່າວຄຳເຫັນຢູ່ນີ້, ທ່ານນາຍົກລັດຖະມົນຕີ ຫງວຽນເຕີນຢຸງ ສະເໜີວ່າ, ລັດຖະບານ ແລະ ສະຫະພັນໃຫຍ່ແຮງງານຫວຽດນາມ ໄດ້ສຸມໃສ່ສົມທົບກັນຊີ້ນຳການຈັດຕັ້ງກອງປະຊຸມໃຫຍ່ກຳມະບານຂັ້ນແຂວງ, ຂະແໜງການສູນກາງ ແລະ ກອງປະຊຸມໃຫຍ່ກຳມະບານຫວຽດນາມ ຄັ້ງທີ 11; ເພີ່ມທະວີການສົມທົບກັນໃນການສ້າງກົດໝາຍ, ນະໂຍບາຍທີ່ກ່ຽວຂ້ອງໂດຍດົງເຖິງກຳມະກອນ, ພາລະກອນຜູ້ອອກແຮງງານ ຕິດພັນກັບການກວດກາ, ຕິດຕາມກວດກາ, ປົກປັກຮັກສາສິດ ແລະ ຜົນປະໂຫຍດຖືກຕ້ອງຕາມກົດໝາຍຂອງກຳມະກອນ, ພາລະກອນ ແລະ ຄົນງານ. ທ່ານນາຍົກລັດຖະມົນຕີ ຫງວຽນເຕີນຢຸງ ຊີ້ແຈ້ງວ່າ.
“ຂ້າພະເຈົ້າສະເໜີໃຫ້ສະຫະພັນໃຫຍ່ແຮງງານຫວຽດນາມ ສົມທົບກັບບັນດາກະຊວງ, ຂະແໜງການທີ່ກ່ຽວຂ້ອງ ເປັນເຈົ້າການແກ້ໄຂບັນຫາຢຸດງານຂອງກຳມະກອນ... ບັນຫານີ້ຈະຊ່ວຍໃຫ້ກຳມະກອນມີສິດອັນເປັນທຳຂອງຕົນ, ເຮັດຄືແນວນັ້ນ, ເລື່ອງຢຸດງານ, ປະທ້ວງຂອງກຳມະກອນສຳລັບວິສາຫະກິດຈະບໍ່ເກີດຂຶ້ນ. ທີ່ 2 ແມ່ນ, ບັນດາສັນຍານວິສາຫະກິດທີປະສົບກັບຄວາມຫຍຸ້ງຍາກ, ລົ້ມລະລາຍ ຫຼື ເຈົ້າຂອງວິສາຫະກິດປະລະວິສາຫະກິດ.. ຈະແກ້ໄຂໄດ້”.
ແລະກໍ່ໃນການເຮັດວຽກ, ທ່ານນາຍົກລັດຖະມົນຕີ ໄດ້ພ້ອມກັບບັນດາກະຊວງ, ຂະແໜງການສູນກາງກຳນົດທິດແນະນຳ, ແກ້ໄຂບັນດາຂໍ້ສະເໜີຂອງສະຫະພັນໃຫຍ່ແຮງງານຫວຽດນາມ ເພື່ອຜັນຂະຫຍາຍແຜນຮ່າງ “ຂະຫຍາຍຮູບແບບກອງທຶນໜູນຊ່ວຍທຶນໃຫ້ແກ່ຄົນງານທີ່ທຸກຍາກ ເພື່ອສ້າງວຽກເຮັດງານທຳດ້ວຍຕົນເອງ, ໂດຍມີການໜູນຊ່ວຍຈາກງົບປະມາແຫ່ງລັດ” ໂດຍໄວ.