ທ່ານນາຍົກລັດຖະມົນຕີ ຫງວຽນຊວນຟຸກ ພົບປະກັບບັນດາວິສາຫະກິດ ໂຮນລັງ

ກ່າວຄຳເຫັນທີ່ເວທີປາໄສ, ທ່ານນາຍົກລັດຖະມົນຕີ ຫງວຽນຊວນຟຸກ ໃຫ້ຮູ້ວ່າ: ຫວຽດນາມ ໄດ້ຮັບການຕີລາຄາ ແລະ ຈັດອັນດັບສູງກ່ຽວກັບສະພາບແວດລ້ອມແຫ່ງການລົງທຶນ ດຳເນີນທຸລະກິດ ຈາກບັນດາອົງການສາກົນ. ມີຫຼາຍວິສາຫະກິດ ຫວຽດນາມ ຖືກຈັດເຂົ້າໃນບັນຊີລາຍຊື່ 1.000 ວິສາຫະກິດແຖວໜ້າຂອງ ອາຊີ. ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ: ຕໍ່ໜ້າການທ້າທາຍຈາກການປ່ຽນແປງຂອງດິນຟ້າອາກາດ, ຫວຽດນາມ ຫວັງວ່າ ບັນດາພາກສ່ວນເສດຖະກິດເອກະຊົນ ໂຮນລັງ ເອົາໃຈໃສ່ລົງທຶນ, ໜູນຊ່ວຍ ຫວຽດນາມ ແກ້ໄຂບັນດາສິ່ງທ້າທາຍນີ້. ນີ້ແມ່ນໂອກາດໃຫຍ່ໃຫ້ບັນດາວິສາຫະກິດ ໂຮນລັງ, ນັບທັງບັນດາວິສາຫະກິດຂະໜາດກາງ ແລະ ນ້ອຍ:

        “ຖ້າຮູ້ໝູນໃຊ້ກາລະໂອກາດ, ເສີມຂະຫຍາຍທ່າແຮງທາງການທູດ, ພິເສດແມ່ນໃນສະພາບການສັນຍາການຄ້າເສລີ ຫວຽດນາມ - ອີຢູ ຈະໄດ້ຮັບການລົງນາມໃນໄວໆນີ້, ໂຮນລັງ ແລະ ຫວຽດນາມ ອາດສາມາດບັນລຸໄດ້ຫຼາຍຜົນງານກ່ວາ ແລະ ກາຍເປັນການເຊື່ອມຕໍ່ເສດຖະກິດເລິກເຊິ່ງ, ຮອບດ້ານລະຫວ່າງ ອາຊຽນ ແລະ ອີຢູ, ລະຫວ່າງຝ່າຍໜຶ່ງແມ່ນພາກພື້ນມີລະດັບເຕີບໂຕເສດຖະກິດແຖວໜ້າຂອງໂລກ ແລະ ຝ່າຍໜຶ່ງແມ່ນຕະຫຼາດມີຄວາມຕ້ອງການ, ເຕັກໂນໂລຢີ ແລະ ບັນດາບໍລິສັດໂດ່ງດັງແຖວໜ້າຂອງໂລກ”

        ພາຍຫຼັງການກ່າວຄຳເຫັນ, ທ່ານນາຍົກລັດຖະມົນຕີ ຫງວຽນຊວນຟຸກ ເປັນສັກຂີພິຍານ ພິທີແລກປ່ຽນເອກະສານຮ່ວມມື 11 ສະບັບລະຫວ່າງວິສາຫະກິດ 2 ປະເທດດ້ວຍຍອດມູນຄ່າປະມານ 700 ລ້ານ USD.

ທ່ານນາຍົກລັດຖະມົນຕີ ຫງວຽນຊວນຟຸກ ເຂົ້າຮ່ວມກອງປະຊຸມໂຕະມົນ

        ພາຍຫຼັງເຂົ້າຮ່ວມເວທີປາໄສວິສາຫະກິດ ຫວຽດນາມ - ໂຮນລັງ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ເຂົ້າຮ່ວມກອງປະຊຸມວິສາຫະກິດໂຕະມົນ ດ້ວຍການເຂົ້າຮ່ວມຂອງຫຼາຍວິສາຫະກິດແຖວໜ້າໂຮນລັງ, ສຸມໃສປຶກສາຫາລືກ່ຽວກັບຫົວຂໍ້ນະຄອນສະຫຼາດ ແລະ ນະຄອນ ສະໜາມບິນ.

        ພາຍຫຼັງກອງປະຊຸມວິສາຫະກິດໂຕະມົນ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ຕ້ອນຮັບການນຳບາງກຸ່ມບໍລິສັດໃຫຍ່ຂອງ ໂຮນລັງ.

        ກ່ອນໜ້ານັ້ນ, ຕອນເຊົ້າວັນທີ 10 ກໍລະກົດ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ໄປຢ້ຽມຢາມ ມະຫາວິທະຍາໄລ Wageningen. ນີ້ແມ່ນມະຫາວິທະຍາໄລ ມີອິດທິພົນຊື່ສຽງຂອງ ໂຮນລັງ ກໍ່ຄືຢູ່ໃນໂລກ, ພິເສດແມ່ນກ່ຽວກັບຂະແໜງ ກະສິກຳເຕັກໂນໂລຢີສູງ, ຄຸ້ມຄອງນ້ຳ, ຮັບມືກັບການປ່ຽນແປງຂອງດິນຟ້າອາກາດ.