(VOVWORLD) - ທ່ານຮອງປະທານສະພາແຫ່ງຊາດ ຫງວຽນດຶກຫາຍ ໄດ້ຕີລາຄາສູງສານສະເໝີຕົ້ນສະເໝີປາຍຂອງ ອາເມລິກາ ສະໜັບສະໜູນ ຫວຽດນາມ ເຂັ້ມແຂງ, ເອກະລາດ, ກຸ້ມຕົນເອງ, ວັດທະນາຖາວອນ.
 ນາຍົກລັດຖະມົນຕີ ຫວຽດນາມ ຟ້າມມິງຈິງ ຕ້ອນຮັບຄະນະສະມາຊິກລັດຖະສະພາອາເມລິກາ(ພາບ: TTXVN)
|
ຕອນບ່າຍວັນທີ 4 ສິງຫາ, ຢູ່ຮ່າໂນ້ຍ, ໃນການຕ້ອນຮັບຄະນະສະມາຊິກລັດຖະສະພາ ອາເມລິກາ ໂດຍທ່ານ Jason Smith, ປະທານກຳມາທິການພາສີ ສະພາຕ່ຳ ເປັນຫົວໜ້າຄະນະ ພວມຢ້ຽມຢາມ ແລະ ເຮັດວຽກຢູ່ ຫວຽດນາມ, ທ່ານນາຍົກລັດຖະມົນຕີ ຟ້າມມິງຈິງ ໄດ້ຢັ້ງຢືນວ່າ ຫວຽດນາມ ຍາມໃດກໍ່ຖືເປັນສຳຄັນ ການພົວພັນຄູ່ຮ່ວມມືຮອບດ້ານກັບ ອາເມລິກາ, ຊົມເຊີຍເລື່ອງອາເມລິກາ ເພີ່ມທະວີການຮ່ວມມືກັບ ຫວຽດນາມ, ເຄົາລົບລະບອບການເມືອງ ແລະ ສະໜັບສະໜູນ ຫວຽດນາມ “ເຂັ້ມແຂງ, ເອກະລາດ, ເປັນເຈົ້າຕົນເອງ ແລະ ວັດທະນາຖາວອນ”. ໄລຍະຈະມາເຖິງ, ທ່ານນາຍົກລັດຖະມົນຕີ ໄດ້ສະເໜີໃຫ້ສອງປະເທດ ສືບຕໍ່ຊຸກຍູ້ການຢ້ຽມຢາມຂັ້ນສູງ ແລະ ຂັ້ນຕ່າງໆ, ແລກປ່ຽນຄະນະສະມາຊິກລັດຖະສະພາສອງຝ່າຍ, ຍູ້ແຮງການຮ່ວມມືໃນບັນດາຂົງເຂດເສດຖະກິດ, ການຄ້າ, ການລົງທຶນ, ວິທະຍາສາດ ເຕັກໂນໂລຊີ, ການສຶກສາບຳລຸງສ້າງ, ນະວັດຕະກຳ, ຫັນເປັນດີຈີຕອນ, ຫັນປ່ຽນພະລັງງານ, ການເຕີບໂຕສີຂຽວ…
ບັນດາສະມາຊິກລັດຖະສະພາ ອາເມລິກາ ໄດ້ສະແດງຄວາມປະທັບໃຈອັນດີງາມກ່ຽວກັບປະເທດ, ປະຊາຊົນ ຫວຽດນາມ, ຕີລາຄາສູງການເຕີບໂຕເສດຖະກິດຂອງ ຫວຽດນາມ ໃນສະພາບການຄວາມຫຍຸ້ງຍາກຂອງເສດຖະກິດໂລກ, ພິເສດແມ່ນການຮັບປະກັນຄວາມໝັ້ນຄົງດ້ານສະບຽງອາຫານ, ພະລັງງານ, ສາທາລະນະສຸກ ແລະ ການເງິນສາທາລະນະແບບຍືນຍົງ.
 ການຕ້ອນຮັບຄະນະຢູ່ຫໍສະພາແຫ່ງຊາດ |
ຕອນເຊົ້າວັນທີ 4 ສິງຫາ, ທີ່ຫໍສະພາແຫ່ງຊາດ, ທ່ານຮອງປະທານສະພາແຫ່ງຊາດ ຫວຽດນາມ ຫງວຽນດຶກຫາຍ ໄດ້ຕ້ອນຮັບຄະນະສະມາຊິກລັດຖະສະພາ ອາເມລິກາ ເຊັນດຽວກັນ.
ນະທີ່ນີ້, ທ່ານຮອງປະທານສະພາແຫ່ງຊາດ ຫງວຽນດຶກຫາຍ ໄດ້ຕີລາຄາສູງສານສະເໝີຕົ້ນສະເໝີປາຍຂອງ ອາເມລິກາ ສະໜັບສະໜູນ ຫວຽດນາມ ເຂັ້ມແຂງ, ເອກະລາດ, ກຸ້ມຕົນເອງ, ວັດທະນາຖາວອນ. ທ່ານຮອງປະທານສະພາແຫ່ງຊາດ ຫວຽດນາມ ໄດ້ສະແດງການສະໜັບສະໜູນເລື່ອງຍົກລະດັບການພົວພັນສອງຝ່າຍພັດທະນາຢ່າງສະຖຽນລະພາບ, ຍາວນານ ແລະ ແທດຈິງ, ເພື່ອຜົນປະໂຫຍດຂອງສອງປະເທດ, ສັນຕິພາບ, ມິດຕະພາບ ແລະ ການຮ່ວມມືຢູ່ພາກພື້ນ ແລະ ຢູ່ໃນໂລກ.
ສ່ວນ ທ່ານປະທານກຳມາທິການພາສີ ສະພາຕ່ຳ Jason Smith ຖືວ່າ: ໄລຍະຈະມາເຖິງ, ສອງປະເທດຄວນສືບຕໍ່ຊຸກຍູ້ການພັດທະນາການພົວພັນໃນຂົງເຂດເສດຖະກິດ, ການຄ້າ; ສະແດງຄວາມປາດຖະໜາຢາກໜູນຊ່ວຍ ຫວຽດນາມ ໃນລະບົບການສະໜອງທົ່ວໂລກ; ໜູນຊ່ວຍກ່ຽວກັບພາສີ ແລະ ປະຕິບັດບັນດາມາດຕະການໃນຂົງເຂດກະສິກຳຜ່ານການໂອ້ລົມສົນທະນາເພື່ອແນໃສ່ຮັບປະກັນຜົນປະໂຫຍດສູງສຸດໃຫ້ແກ່ປະຊາຊົນສອງປະເທດ.