(vovworld) - ​​ ​ໂດຍ​ໄດ້​ຮັບ​ຄຳ​ເຊີນ​ຂອງ​ທ່າ​ນນາຍົກລັດຖະມົນຕີຝລັ່ງ Jean Marc Ayrault ​ແລະ ທ່ານ​ປະທານາທິບໍດີ​ຝລັ່ງ Francois Hollande, ທ່ານ​ນາຍົກລັດຖະມົນຕີຫວຽດນາມ ຫງວຽນ​ເຕີນ​ຢຸງ ຈະ​ໄປ​ຢ​້ຽມຢາມ​ສ.ຝລັ່ງ ໃນ​ລະຫວ່າງ​ວັນ​ທີ 24 – 26 ກັນຍາ ຢ່າງ​​ເປັນ​ທາງ​ການ . ຕາມ​ທ່ານ​ເອກ​ອັກຄະ​ລັດຖະທູດ​ຫວຽດນາມ ປະຈຳ​ຝລັ່ງ ​​ເຢືອງຈິ໋ຢຸງ ແລ້ວ, ການ​ຢ້ຽມຢາມ​ຝລັ່ງ ຄັ້ງ​ນີ້​ຂອ​ງທ່ານ​ນາຍົກລັດຖະມົນຕີ ຫງວຽນ​ເຕີນ​ຢຸງ ​ໄດ້​ດຳ​ເນີນ​ໄປ​​ກົງ​ກັບ​ໂອກາດ​ສະ​ເຫຼີມສະຫຼອງ 40 ປີ​ແຫ່ງ​ວັນ​ສ້າງສາ​ຍພົວພັນ​ທາງ​ການ​ທູ​ດລະຫວ່າງ 2 ປະ​ເທດ, ດ້ວຍການ​ເຄື່ອນ​ໄຫວ​ໃນ​ຫຼາຍ​ຂົງ​ເຂດ​ຢູ່​ຫວຽດນາມ ກໍ່​ຄື​ຢູ່​ຝລັ່ງ. ທ່ານເອກ​ອັກຄະ​ລັດຖະທູດ ເຢືອງຈິ໋ຢຸງ ຢືນຢັນ​ວ່າ.

        “ການ​ຢ້ຽມຢາມ​ຄັ້ງ​ນີ້ ​ໄດ້​ຮັບ​ການ​ປະຕິບັດ​ໃນ​ວິວັດ​ການ​ທີ່​ຫວຽດນາມ ພວມຕັ້ງໜ້າ ​ຜັນ​ຂະຫຍາຍ​ ນະ​ໂຍບາຍ​ການ​ຕ່າງປະ​ເທດ​ເອກະລາດ, ​ເປັນ​ເຈົ້າ​ຕົນ​ເອງ, ​ເຊື່ອມ​ໂຍງ​ເຂົ້າ​ກັບ​ສາກົນ, ຫັນ​ເປັນ​ຫຼາຍ​ຮູບ​ຫຼາຍ​ແບບ, ພ້ອມ​ແລ້ວ​ທີ່​ຈະ​ເປັນ​ເພື່ອນມິດ, ​ເປັນ​ຄູ່​ຮ່ວມ​ມື​ທີ່​ໄວ້​ເນື້ອ​ເຊື່ອ​ໃຈ, ມີ​ຄວາມຮັບຜິດຊອບ​ຂອງປະຊາ​ຄົມ​ສາກົນ. ການ​ຢ້ຽ​ມຢາມ​​ຖືກ​ດຳ​ເນີນ​ໄປ​ໃນ​ໄລຍະ​ທີ່ການ​ພົວພັນລະຫວ່າງ 2 ປະ​ເທດ​ບັນລຸ​ໄດ້ຜົນງານ​ຫຼາຍ​ຢ່າງ ນີ້​ແມ່ນ​ຂີດ​ໝາຍ​ສຳຄັນພາຍຫຼັງ 40 ປີ​ແຫ່ງ​ການ​ພົວພັນ​ລະ​ຫວ່າງ 2 ປະ​ເທດ ໄດ້​ຮັບ​ການພັດທະນາຢ່າງ​ເລີກ​​ເຊ​ິ່ງ, ກວ້າງຂວາງ ​ແລະ ​ເພີ່ມ​ທະວີ​​ຂຶ້ນ​ສູ່​ລະດັບ​ສູງ​ໃໝ່”.

        ຕາມ​ທ່ານ​ເອກ​ອັກຄະ​ລັດຖະທູດ ເຢືອງຈິ໋ຢຸງ ​ແລ້ວ, ​ໃນການ​ຢ້ຽມຢາມຄັ້ງ​ນີ້, ຫວຽດນາມ ​ແລະ ຝລັ່ງ ຄາດ​ວ່າ ຈະ​ຍົກການ​ພົວພັນ​ລະຫວ່າງ 2 ປະ​ເທດ​ໃຫ້​ຂຶ້ນ​ສູ່​ລະດັບ​ຄູ່​ຮ່ວມ​ມື​ຍຸດ​ທະ​ສາດ.