ທ່ານ ນາຍົກລັດຖະມົນຕີ ຫງວຽນຊວນຟຸກ ຖະຫວາຍທູບທຽນຢູ່ເຂດປູຊະນີຍະຊະຖານປະຫວັດສາດອະນຸສອນກອງພັນໃຫຍ່ 52 ໄຕຕ໋ຽນ

ຕອນບ່າຍວັນທີ 16 ກໍລະກົດ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ມາຖະຫວາຍທູບທຽນ, ອາໄລຫາບັນດານັກຮົບວິລະຊົນ, ນັກຮົບເສຍສະຫຼະຊີວິດເພື່ອຊາດຢູ່ເຂດປູຊະນີຍະສະຖານປະຫວັດສາດອະນຸສອນກອງພັນໃຫຍ່ 52 ໄຕຕ໋ຽນ ທີ່ໂນນ ນາບໍ, ເທດສະບານ ມົກເຈົາ ແຂວງ ເຊີນລາ. ກອງພັນໃຫຍ່ 52 ໄຕຕ໋ຽນ ເຄີຍເອີ້ນວ່າ ກອງພັນໃຫຍ່ ໄຕຕ໋ຽນ ໄດ້ຮັບການສ້າງຕັ້ງແຕ່ວັນທີ 27/02/1947. ໃນການຕໍ່ສູ້ຕ້ານລ່າເມືອງຂຶ້ນ ຝະລັ່ງ (1945 - 1954), ມົກເຈົາ ແມ່ນສະຖານທີ່ເຕົ້າໂຮມຂອງກອງພັນໃຫຍ່ ໄຕຕ໋ຽນ. ຈາກແຫ່ງນີ້,  ບັນດານັກຮົບຂອງກອງພັນໃຫຍ່ ໄຕຕ໋ຽນ ໄດ້ອອກເດີນທາງໄປສູ່ບັນດາສະໜາມຮົບທາງທິດຕາເວັນຕົກສ່ຽງເໜືອ ແລະ ພາກເໜືອຂອງ ລາວ, ສ້າງໄຊຊະນະທີ່ສະຫງ່າລາສີ, ປະກອບສ່ວນເຂົ້າໄຊຊະນະລວມຂອງການປະຕິວັດ ຫວຽດນາມ ແລະ ເຮັດລ້ອນພັນທະສາກົນອັນສູງສົ່ງກັບປະເທດເພື່ອນມິດ ລາວ. ເຂດປູຊະນີຍະສະຖານປະຫວັດສາດ ໄຕຕ໋ຽນ ໄດ້ຮັບການເປີດສະຫຼອງເມື່ອວັນທີ 20 ສິງຫາ 2016. ແຫ່ງນີ້ ກາຍເປັນເຂດປູຊະນີຍະສະຖານປະຫວັດສາດຈຸດສຸມໃຫ້ແກ່ວຽກງານສຶກສາມູນເຊື້ອ, ແມ່ນກິດຈະກຳປະຫວັດສາດວັດທະນະທຳດີເດັ່ນໃນແຜນສັງລວມເຂດທ່ອງທ່ຽວແຫ່ງຊາດ ມົກເຈົາ. ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ສະແດງຄວາມຮູ້ບຸນຄຸນ, ອາໄລຫາຄຸນງາມຄວາມດີຂອງບັນດານັກຮົບວິລະຊົນທີ່ເສຍສະຫຼະຊີວິດເພື່ອຊາດຂອງກອງພັນໃຫຍ່ 52 - ໄຕຕ໋ຽນ ເຊິ່ງຍອມເສຍເລືອດເນື້ອ, ຊີວິດ, ໄວໜຸ່ມຂອງຕົນ ປະກອບສ່ວນເຂົ້າການຕໍ່ສູ້ປົດປ່ອຍຊາດ. ທ່ານນາຍົກລັດຖະມົນຕີ ຢືນຢັນວ່າ ກອງພັນໃຫຍ່ ໄຕຕ໋ຽນ ລຸ້ນຕ່າງໆໄດ້ເປັນແບບຢ່າງໃຫ້ບັນດາລຸ້ນໜຸ່ມ ຫວຽດນາມ.