ນາຍົກລັດຖະມົນຕີສິງກາໂປຫຼີຊຽນຫຼົງຊົມເຊີຍການກັບຄືນອາຊີຂອງອາເມລິກາ
ທ່ານນາຍົກລັດຖະມົນຕີ ຫຼີຊຽນຫຼົງ ແລະ ທ່ານຮອງປະທານາທິບໍດີ Joe Biden
(ພາບ: citinews.net)
(vovworld) – ທີ່ການພົບປະກັບທ່ານຮອງປະທານາທິບໍດີ ອາເມລິກາ Joe Biden ຢູ່ທຳນຽບຂາວໃນວັນທີ 25/6, ທ່ານນາຍົກລັດຖະມົນຕີ ສິງກາໂປ ຫຼີຊຽນຫຼົງ ໄດ້ຊົມເຊີຍນະໂຍບາຍກັບຄືນ ອາຊີ ຂອງ ອາເມລິກາ, ພິເສດແມ່ນບັນດາຄຳໝັ້ນສັນຍາຢ່າງແຮງຂອງທ່ານປະທານາທິບໍດີ Barack Obama ທີ່ມີຕໍ່ພາກພື້ນ. ໃນການພົບປະດັ່ງກ່າວ, ທ່ານນາຍົກລັດຖະມົນຕີ ຫຼີຊຽນຫຼົງ ຢັ້ງຢືນຄືນໃໝ່ການພົວພັນທີ່ໝັ້ນຄົງລະຫວ່າງ ອາເມລິກາ - ສິງກາໂປ ແລະ ແລກປ່ຽນທັດສະນະກ່ຽວກັບການເພີ່ມທະວີການພົວພັນ 2 ຝ່າຍກ່ວາອີກ. 2 ຝ່າຍກໍ່ປຶກສາຫາລືບັນດາມາດຕະການເພື່ອໃຫ້ ອາເມລິກາ ເພີ່ມທະວີການພົວພັນໃນພາກພື້ນ, ຄືສັນຍາຄູ່ຮ່ວມມືເຂດປາຊີຟິກ (TPP), ພິເສດໃນສະພາບການ ອາຊີ ນັບມື້ນັບມີທີ່ຕັ້ງບົດບາດສຳຄັນສຳລັບການພັດທະນາເສດຖະກິດ ແລະ ຍຸດທະສາດຂອງ ອາເມລິກາ. ທ່ານນາຍົກລັດຖະມົນຕີ ຫຼີຊຽນຫຼົງ ແລະ ທ່ານຮອງປະທານາທິບໍດີ Joe Biden ລ້ວນແຕ່ຖືວ່າ: ພ້ອມກັບໝາກຜົນທີ່ບັນລຸໄດ້ກ່ຽວກັບສັນຍາການຄ້າເສລີ (FTA) ອາເມລິກາ - ສິງກາໂປ, ເລື່ອງບັນລຸໄດ້ຂໍ້ຕົກລົງສຸດທ້າຍກ່ຽວກັບ TPP ມີຄວາມໝາຍສຳຄັນທີ່ສຸດຍ້ອນວ່າ TPP ສວມບົດບາດສຳຄັນໃນການພົວພັນ ອາເມລິກາ ກັບ ອາຊີ. ການນຳ 2 ທ່ານກໍ່ຮັບຮູ້ຄວາມກ້າວໜ້າໃນການຮ່ວມມື 2 ຝ່າຍໃນຂົງເຂດປ້ອງກັນຄວາມສະຫງົບ ແລະ ປະຕິບັດກົດໝາຍ, ພ້ອມທັງຢັ້ງຢືນບັນດາແຜນການບຳລຸງສ້າງບຸກຄະລາກອນຂອງ 2 ປະເທດ ໃຫ້ປະເທດທີ 3 ແມ່ນມີຜົນປະໂຫຍດໃຫ້ແກ່ການພົວພັນກັບ ອາເມລິກາ ກັບບັນດາປະເທດ ອາຊີ. 2 ຝ່າຍກໍ່ແລກປ່ຽນທັດສະນະກ່ຽວກັບສະພາບການຢູ່ພາກພື້ນ ແລະ ສາກົນ.