(VOVWORLD) -ວັນທີ 28 ມັງກອນ, ນາຍົກລັດຖະມົນຕີຫວຽດນາມ ໄດ້ປະກາດຄຳສັ່ງກ່ຽວກັບບາງມາດຕະການຮີບດ່ວນໃນການປ້ອງກັນ, ຕ້ານໂລກລະບາດໂຄວິດ-19.
 (ພາບປະກອບ: baochinhphu.vn)
|
ເພື່ອຄວບຄຸມໂລກລະບາດໂຄວິດ-19 ຢ່າງໄວ ແລະ ມີປະສິດທິຜົນ ເຊິ່ງຫາກໍ່ເກີດຂຶ້ນຢູ່ບາງທ້ອງຖິ່ນ. ວັນທີ 28 ມັງກອນ, ນາຍົກລັດຖະມົນຕີຫວຽດນາມ ໄດ້ປະກາດຄຳສັ່ງກ່ຽວກັບບາງມາດຕະການຮີບດ່ວນໃນການປ້ອງກັນ, ຕ້ານໂລກລະບາດໂຄວິດ-19.
ຄຳສັ່ງໄດ້ຮຽກຮ້ອງວ່າ: ແຂວງ ຫາຍເຢືອງ - ປິດລ້ອມນະຄອນ ຈິ໊ລິງ ຂຶ້ນກັບແຂວງ ຫາຍເຢືອງ ແລະ ນຳໃຊ້ບັນດາມາດຕະການປ້ອງກັນຢ່າງເຂັ້ມງວດ, ໃນນັ້ນປະຕິບັດການແຍກຫ່າງສັງຄົມທົ່ວນະຄອນ ເປັນເວລາ 21 ວັນ, ນັບແຕ່ເວລາ 12 ໂມງຂອງວັນທີ 28 ມັງກອນ 2021.
ແຂວງ ກວາງນິງ - ຢຸດຕິການເຄື່ອນໄຫວຂອງທ່າອາກາດສະຍານສາກົນ ເວີນດົ່ນ ນັບແຕ່ເວລາ 12 ໂມງຂອງວັນທີ 28 ມັງກອນ 2021.
ປະທານຄະນະກຳມະການປະຊາຊົນບັນດາແຂວງ, ນະຄອນຂຶ້ນກັບສູນກາງ ສຸມໃສ່ຊີ້ນຳ: ກວດກາ, ຮັດແໜ້ນການປະຕິບັດບັນດາມາດຕະການປ້ອງກັນ, ຕ້ານໂລກລະບາດໃນບໍລິເວນ; ຮຽກຮ້ອງໃຫ້ປະຊາຊົນປະຕິບັດບັນດາມາດຕະການກ່ຽວກັບການໃຊ້ຜ້າອັດປາກ-ອັດດັ່ງ, ຈຳກັດການເຕົ້າໂຮມຫຼາຍຄົນ, ຢືນຫ່າງກັນຢູ່ເຂດສາທາລະນະ…
ຂໍ້ມູນຈາກຄະນະຊີ້ນຳແຫ່ງຊາດກ່ຽວກັບການປ້ອງກັນ, ຕ້ານໂລກລະບາດໂຄວິດ - 19 ໃຫ້ຮູ້ວ່າ, ນັບແຕ່ເວລາ 18 ໂມງຂອງວັນທີ 28 ມັງກອນ ຮອດເວລາ 6 ໂມງຂອງວັນທີ 29 ມັງກອນ, ຫວຽດນາມ ມີຜູ້ຕິດເຊື້ອພະຍາດໂຄວິດ-19 ໃໝ່ຕື່ມອີກ 9 ຄົນ. ສະນັ້ນ, ຫວຽດນາມ ມີຜູ້ຕິດເຊື້ອພະຍາດໃນຊຸມຊົນລວມທັງໝົດແມ່ນ 786 ຄົນ, ໃນນັ້ນຈຳນວນຜູ້ຕິດເຊື້ອພະຍາດໃໝ່ນັບແຕ່ວັນທີ 25 ກໍລະກົດ ປີ 2020 ມາຮອດປະຈຸບັນແມ່ນ 647 ຄົນ.
ຕອນເຊົ້າວັນທີ 29 ມັງກອນ, ທ່າອາກາດສະຍານສາກົນ ເກີ່ນເທີ ໄດ້ຮັບຖ້ຽວບິນນຳຜົນລະເມືອງຫວຽດນາມ 281 ຄົນເດີນທາງຈາກຝລັ່ງ ກັບເມືອປະເທດ ແລະ ຄະນະຊີ້ນຳການປ້ອງກັນ, ສະກັດກັ້ນໂລກລະບາດໂຄວິດ-19 ກອງບັນຊາການທະຫານເຂດ 9 ໄດ້ສົ່ງໄປເຂດແຍກຕົວລວມໝູ່ຢູ່ ຕ່ຽນຢາງ ແລະ ເຮົ້າຢາງ ຖືກຕາມຂໍ້ກຳນົດ.
ໃນເຫດການທີ່ກ່ຽວຂ້ອງ, ກະຊວງອຸດສາຫະກຳ ແລະ ການຄ້າຫວຽດນາມ ຫາກໍ່ສົ່ງໂທລະເລກເຖິງພະແນກອຸດສາຫະກຳ ແລະ ການຄ້າບັນດາແຂວງ, ນະຄອນຂຶ້ນກັບສູນກາງ ແລະ ລະບົບຮ້ານຄ້າໃຫຍ່ ເພີ່ມວີການຮັບປະກັນແຫຼ່ງສະໜອງສິນຄ້າຢູ່ທ້ອງຖິ່ນເພື່ອຮັບມື, ປ້ອງກັນ, ສະກັດກັ້ນໂລກລະບາດໂຄວິດ-19.