(vovworld) – ວັນທີ 25/12, ທ່ານນາງນາຍົກລັດຖະມົນຕີ ໄທ ຍິງຣັກ ຊິນນະວັດ ສະເໜີສ້າງຕັ້ງສະພາປະຕິຮູບແຫ່ງຊາດເພື່ອຊອກຫາທາງອອກໃຫ້ແກ່ວິກິດການການເມືອງທີ່ພວມກໍ່ຄວາມແບ່ງແຍກໃນປະເທດ ແລະ ສົ່ງຜົນສະທ້ອນບໍ່ດີເຖິງອຳນາດການປົກຄອງຕາມຂໍ້ສະເໜີດັ່ງກ່າວ, ສະພາປະຕິຮູບແຫ່ງຊາດ ບໍ່ແມ່ນອົງການຂອງລັດຖະບານ ແລະ ຈະລວມມີສະມາຊິກ 499 ທ່ານ, ທີ່ຈະໄດ້ຮັບການເລືອກເຟັ້ນໃນຈຳນວນຜູ້ແທນປະຊາຊົນທຸກຊັ້ນວັນນະ 2000 ຄົນ. ການເລືອກເຟັ້ນບັນດາສະມາຊິກ ໂດຍຄະນະກຳມະການເອກະລາດລວມມີສະມາຊິກ 11 ຄົນທີ່ໄດ້ຮັບການບົ່ງຕົວ, ໃນນັ້ນ, ລວມມີຜູ້ບັນຊາການສູງສຸດ ຫຼືຜູ້ບັນຊາການທະຫານບົກ, ຜູ້ບັນຊາການທະຫານເຮືອ ຫຼື ຜູ້ບັນຊາການທະຫານອາກາດ, ອະທິການບໍດີ 1 ທ່ານ, ຮອງລັດຖະມົນຕີ 2 ທ່ານ, ປະທານຫ້ອງການການຄ້າໄທ, ປະທານສະຫະພັນອຸດສາຫະກຳ ໄທ, ປະທານສະຫະສະມາຄົມທະນາຄານໄທ, ຜູ້ອຳນວຍການໃຫຍ່ອົງການພັດທະນາເສດຖະກິດ ແລະ ສັງຄົມ ໄທ ແລະ ຜູ້ມີຕຳແໜ່ງອື່ນອີກ 2 ທ່ານ. ສະພາໃໝ່ຈະມີໜ້າທີ່ປັບປຸງລັດຖະທຳມະນູນ, ແກ້ໄຂບັນຫາສໍ້ລາດບັງຫຼວງ, ຮັບປະກັນປະຕິຮູບການເລືອກຕັ້ງ ແລະ ວາງແຜນປະຕິຮູບດ້ານການເມືອງ, ເສດຖະກິດກໍ່ຄືສັງຄົມຂອງປະເທດຊາດ, ຮັບປະກັນວ່າ ບັນດາແຜນການນີ້ໄດ້ຮັບການປະຕິບັດໃນທັນທີພາຍຫຼັງດຳເນີນການເລືອກຕັ້ງທົ່ວປະເທດ, ເລືອກຕັ້ງຄະນະລັດຖະບານໃໝ່ ແລະ ສະພາແຫ່ງຊາດ ເຄື່ອນໄຫວຄືນໃໝ່.
ຕຳຫຼວດໄທຕ້ອງໃຊ້ແກັດນ້ຳຕາເພື່ອເລີກການແຫ່ຂະບວນປະທ້ວງ
ຕອນເຊົ້າວັນທີ 26/12, ຕຳຫຼວດ ໄທ ຕ້ອງໃຊ້ແກດນ້ຳຕາເພື່ອສະກັດກັ້ນຜູ້ແຫ່ຂະບວນປະທ້ວງທຳລາຍບັນດາການເຄື່ອນໄຫວກະກຽມເລືອກຕັ້ງຖືກຈັດຕັ້ງຢູ່ສະໜາມກິລາ ໄທ - ຍີ່ປຸ່ນ ຢູ່ນະຄອນຫຼວງ ບາງກອກ.
ຜູ້ແຫ່ຂະບວນປະທ້ວງນັບຮ້ອຍຄົນຖືກຕຳຫຼວດໃຫ້ເລີກການເຕົ້າໂຮມເມື່ອຊອກຫາວິທີບຸກເຂົ້າຕຶກອາຄານບາງແຫ່ງຢູ່ເຂດ Dindaeng, ບ່ອນດຳເນີນພິທີຈົກສະຫຼາກເຂດຫາສຽງເລືອກຕັ້ງຂອງ 30 ພັກການເມືອງ ໄທ ເຂົ້າຮ່ວມການເລືອກຕັ້ງທົ່ວປະເທດເຊິ່ງຄາດວ່າຈະດຳເນີນໃນວັນທີ 2/2 ຈະມາເຖິງ. ທີ່ສະຖານທີ່ອື່ນຫຼາຍແຫ່ງນອກສະໜາມກິລານີ້, ຕຳຫຼວດຕ້ອງຍິງລູກປືນຢາງເພື່ອສະກັດກັ້ນຜູ້ແຫ່ຂະບວນປະທ້ວງຂ້າມຜ່ານຮົ້ວກີດຂວາງປ້ອງກັນ.
ໃນຂະນະນັ້ນ, ມີ 30 ໃນຈຳນວນ 34 ພັກຝ່າຍຢູ່ປະເທດນີ້ຈົດທະບຽນເຂົ້າຮ່ວມບັ້ນຫາສຽງເລືອກຕັ້ງ ໄດ້ສຳເລັດການຈົກສະຫຼາກເຂດຫາສຽງເລືອກຕັ້ງ.
ກ່ອນໜ້ານັ້ນ, ພັກປະຊາທິປັດຝ່າຍຄ້ານໄທ ໄດ້ຕົກລົງຄັດຄ້ານການເລືອກຕັ້ງພາຍຫຼັງຖືກປະລາໄຊໃນການຮຽກຮ້ອງໃຫ້ເລື່ອນເວລາດຳເນີນການເລືອກຕັ້ງຈົນຮອດຍາມໃດທີ່ການປະຕິຮູບການເມືອງໄດ້ຮັບການບັດຕິບັດ.