(vovworld) - ກ່າວ​ຄຳ​ເຫັນ​ຕໍ່​ບັນດາ​ນັກ​ຂ່າວ​ຕ່າງປະ​ເທດ​ຢູ່ ນະຄອນຫຼວງ ບັງ​ກອກ, ທ່ານ​ນາງ​ນາຍົກລັດຖະມົນຕີ ​ໄທ ຍິງ​ຣັກ ຊິນນະ​ວັດ ​ໃຫ້​ຮູ້​ວ່າ: ບັນດາ​ຜູ້​ດຳ​ເນີນ​ການ​ລັດຖະປະຫານ ​ໂຄ່ນ​ລົ້ມ ​ອະດີດນາຍົກລັດຖະມົນຕີ ທັກສິນ ຊິນນະ​ວັ​ດ ​ເມື່ອ​ປີ 2006 ​ໄດ້​ຮັບ​ຮູ້​ວ່າ: ການ​ລັດຖະປະຫານ​ບໍ່​ສາມາດ​ແກ້​ໄຂ​ບັນຫາ​ໃດໆ​ໄດ້. ການ​ລັດຖະປະຫານ​​ເມື່​ອປີ 2006 ​ໄດ້​ເປີດ​ສາກ​ໃຫ້​ແກ່​ການ​ຂາດ​ສະຖຽນ​ລະ​ພາບ​ດ້ານ​ການ​ເມືອງ ​ແລະ ບັນດາ​ການ​ແຫ່​ຂະ​ບວນປະ​ທ້ວງ​ຕາມ​ທ້ອງ​ຖະໜົນ, ​ໃນ​ນັ້ນ​ມີ​ທັງ​ການ​ຈາລະ​ຈົນ​ໃນ​ຊຸມ​ປີ​ຕໍ່​ໄປ​ຢູ່​ປະ​ເທດ​ນີ້.

    ທ່ານ​ນາງນາຍົກລັດຖະມົນຕີ ຍິງຣັກ ຊິນ​ນະ​ວັດ ​ໄດ້​ຍົກ​ອອກ​ຖະ​ແຫຼ​ງການ​ດັ່ງກ່າວ​ໃນ​ສະພາບ​ຜູ້​ແຫ່​ຂະ​ບວນປະ​ທ້ວງ​ຝ່າຍ​ຄ້ານ​ຮຽກຮ້ອງ​ໃຫ້​ກອງທັບ​ຊ່ວຍ​ເຂົາ​ເຈົ້າ​ໂຄ່ນລົ້ມ​ລັດຖະບານ​ໃນປະຈຸ​ບັນ. ມາ​ຮອດ​ປະຈຸ​ບັນ, ວົງ​ການ​ນາຍພົນ​ທະຫານ ​ໄທ ຍັງ​ຄົງ​ຫຼີກ​ລ້ຽງ​ການ​ແຊກ​ແຊງ​ດ້ານ​ການ​ທະ​ຫາ​ນເຂົ້າ​ວິ​ກິດ​ການ​ການ​ເມືອງ, ​ເວັ້ນ​ເສຍ​ແຕ່​ສົ່ງ​ທະຫານ​ຈຳນວນ​ໜຶ່ງ​ບໍ່​ຖື​ອາວຸດ​ມາ​ຊ່ວຍ​ປົກ​ປັກ​ຮັກສາ​ສຳນັກງານ​ລັດຖະບານ.

ບັນດາ​ປະ​ເທດ​ສະ​ຫນັບ​ສະ​ຫນູນ​ໄທ​ດຳ​ເນີນ​ການ​ເລືອກ​ຕັ້ງ​​ໃນທົ່ວ​ປະ​ເທດ

ວັນ​ທີ 11/12, ທ່ານ ສຸຣາພົງ ​ໂຕ​ວິຈັກ​ໄຈ​ຄູນ, ຜູ້ຮັກສາ​ການຮອງ​ນາຍົກລັດຖະມົນຕີ, ທັງ​ເປັນ​ລັດຖະມົນຕີ​ການ​ຕ່າງປະ​ເທດ ​ໄທ ​ໃຫ້​ຮູ້​ວ່າ: ປະ​ເທດ​ຈຳນວນ​ຫນຶ່ງ​ໄດ້​ສະ​ແດງ​ຄວາມສະຫນັບສະຫນູນ​ຂໍ້​ຕົກລົງ​ຂອງ​ໄທ​ແມ່ນ​ດຳ​ເນີນ​ການ​ເລືອກ​ຕັ້ງ​ໃນ​ທົ່ວ​ປະ​ເທດ. ຕາມທ່ານ ສຸຣາພົງ, ຜູ້ດຳລົງ​ຕຳ​ແຫນ່​ງອຳນວຍການ​ສູນ​ຄຸ້ມ​ຄອງ​ສັນຕິພາບ ​ແລະ ຄວາມ​​ເປັນ​ລະບຽບ​ຮຽບຮ້ອຍ​ໄທ ແລ້ວ, ອາ​ເມ​ລິ​ກາ, ຈີນ, ​ເຢຍລະ​ມັນ, ກາ​ນາ​ດາ ​ແລະ ນິວ​ເຊີ​ແລນ ​ລ້ວນ​ແຕ່​ສະ​ແດງ​ຄວາມ​ວິຕົກ​ກັງວົນ​ຕໍ່​ຄວາມ​ວຸ້ນວາຍດ້ານ​ການ​ເມືອງ​ຢູ່​ໄທ ​ແລະ ປາດ​ຖະຫນາ​ກວ່າ ​ລັດຖະບານ​ໄທ​ຊອກຫາ​ມາດ​ຕະການ​ສັນຕິພາບ​ຜ່າ​ນການ​ເຈລະຈາ​ກັບ​ຜູ້​ແຫ່​ຂະ​ບວນປະ​ທ້ວງ. ບັນດາ​ປະ​ເທດ​ດັ່ງກ່າວ​ຫວັງ​ວ່າ ການ​ເລືອກ​ຕັ້ງ​ໃນ​ທົ່ວ​ປະ​ເທດ ຄາດ​ວ່າ​ຈະ​ຖືກ​ຈັດ​ຂຶ້ນ​ໃນ​ວັນ​ທີ 2/2/2014 ​ເພື່ອ​ໃຫ້​ໄທ​ຟື້ນ​ຟູ​ສັນຕິພາບ ​ແລະ ສະຖຽນ​ລະ​ພາບ​ໂດຍ​ໄວ.

​ໃນ​ວັນ​ດຽວ​ກັນ, ທ່ານ​ Julie Bishop ລັດຖະມົນຕີ​ການ​ຕ່າງປະ​ເທດ ອົດ​ສະ​ຕາລີ ສະ​ແດງ​ຄວາມ​ຫວັງ​ວ່າ ຄຳ​ຕັດສິນ​ຂອງ​ທ່ານ​ນາງນາຍົກລັດຖະມົນຕີ​ໄທ ຍີ່ງຣັກ ຊີ​ນະ​ວັດ ດຳ​ເນີນ​ການ​ເລືອກ​ຕັ້ງ​​ໃນ​ທົ່ວ​ປະ​ເທດ​ກ່ອນ​ກຳນົດ​ເວລາ ຈະ​ຊ່ວຍ​ຫລຸດຜ່ອນ​ຄວາ​ມເຄັ່ງ​ຕືງດ້ານ​ການ​ເມືອງ​ຢູ່​ປະ​ເທດ​ອາຊີ​ຕ​າ​ເວັນ​ອອກສຽງ​ໃຕ້​ນີ້.