(vovworld) - ວັນທີ 18/12, ທ່ານນາຍົກລັດຖະມົນຕີ ສ.ໄຮ່ຕີ Laurent Salvador ໄດ້ເດີນທາງອອກຈາກຮ່າໂນ້ຍ, ສິ້ນສຸດການຢ້ຽມຢາມຫວຽດນາມ ຢ່າງເປັນທາງການ, ຕາມຄຳເຊີນຂອງທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸ້ງ. ໃນໄລຍະຢູ່ຢ້ຽມຢາມຫວຽດນາມ, ທ່ານນາຍົກລັດຖະມົນຕີ ໄຮ່ຕີ ໄດ້ມີການເຈລະຈາກັບທ່ານນາຍົກລັດຖະມົນຕີ ຫງວຽນເຕີນຢຸ້ງ; ເຂົ້າຢ້ຽມຂໍ່ານັບ, ພົບປະເຈລະຈາກັບທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ, ທ່ານປະທານປະເທດເຈືອງເຕີນຊາງ ແລະ ທ່ານປະທານສະພາແຫ່ງຊາດ ຫງວຽນຊິງຮຸ່ງ; ໄດ້ເປັນສັກຂີພິຍານພິທີລົງນາມໃນບົດບັນທຶກຊ່ວຍຈຳສ້າງຕັ້ງການພົວພັນຄູ່ຮ່ວມມືລົງທຶນຍຸດທະສາດ ລະຫວ່າງກຸ່ມບໍລິສັດໂທລະຄົມກອງທັບຫວຽດນາມ ແລະ ລັດຖະບານ ໄຮ່ຕີ. ທີ່ບັນດາການພົບປະ, ການນຳພັກ, ລັດ ຫວຽດນາມ ຢືນຢັນວ່າ ຫວຽດນາມ ຖືເປັນສຳຄັນ ແລະ ປາດຖະໜາຢາກພັດທະນາການພົວພັນມິດຕະພາບ ແລະ ການຮ່ວມມືກັບ ໄຮ່ຕີ ໃນທຸກຄົງເຂດ, ເພື່ອຮັບໃຊ້ພາລະກິດພັດທະນາຂອງທັງ 2 ປະເທດ. ສອງຝ່າຍໄດ້ແລກປ່ຽນກ່ຽວກັບສະພາບການຂອງແຕ່ລະປະເທດ, ວາງອອກທິດທາງ ແລະ ມາດຕະການ ເພື່ອແນໃສ່ເພີ່ມທະວີການພົວພັນ 2 ຝ່າຍ, ກຳນົດບັນດາຂົງເຂດຮ່ວມມືໃຫ້ບຸລິມະສິດ, ເລີ່ມເຄື່ອນໄຫວການເຈລະຈາ ສັນຍາສຳຄັນ 6 ສະບັບ. ຫວຽດນາມ ແລະ ໄຮ່ຕີ ເຫັນດີຈະສືບຕໍ່ຮ່ວມມື ແລະ ສະໜັບສະໜູນເຊິ່ງກັນ ແລະ ກັນທີ່ບັນດາອົງການຈັດຕັ້ງສາກົນ ແລະ ເວທີປາໄສຫຼາຍຝ່າຍ ເພື່ອສັນຕິພາບ, ສະຖຽນລະພາບ ແລະ ການພັດທະນາຢູ່ທັງ 2 ພາກພື້ນ ແລະ ຢູ່ໃນໂລກ.