ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ກ່າວຄຳເຫັນທີ່ກອງປະຊຸມ

ວັນທີ 17 ກຸມພາ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ, ຫົວໜ້າຄະນະຊີ້ນຳແຫ່ງຊາດ ກ່ຽວກັບການແກ້ໄຂຜົນຮ້າຍຢ້ອນຫຼັງຈາກລູກລະເບີດບໍ່ທັນແຕກ ແລະ ທາດພິດເຄມີ ພາຍຫຼັງສົງຄາມຢູ່ ຫວຽດນາມ, ເຂົ້າຮ່ວມ ແລະ ຊີ້ນຳກອງປະຊຸມສະຫຼຸບການປະຕິບັດໂຄງການເຄື່ອນໄຫວແຫ່ງຊາດກ່ຽວກັບການແກ້ໄຂຜົນຮ້າຍຢ້ອນຫຼັງຈາກລູກລະເບີດບໍ່ທັນແຕກ ພາຍຫຼັງສົງຄາມ ຢູ່ ຫວຽດນາມ ໄລຍະ 2010 – 2020 ແລະ ກຳນົດທິດໜ້າທີ່ວຽກງານໄລຍະ 2021 – 2025 (ໂຄງການ 504).

     ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີຫວຽດນາມ ຟ້າມມິງຈິງ ຢັ້ງຢືນວ່າ ພັກ, ລັດ ແລະ ປະຊາຊົນ ຫວຽດນາມ ມີຄວາມເຂົ້າໃຈຢ່າງເລິກເຊິ່ງຕໍ່ຜົນຮ້າຍຢ້ອນຫຼັງທີ່ໜັກໜ່ວງ ຈາກສົງຄາມ. ເພາະສະນັ້ນ, ໃນໄລຍະຫຼາຍປີຜ່ານມາ, ຫວຽດນາມ ໄດ້ຕັ້ງໜ້າ, ເປັນເຈົ້າການໃນວຽກງານແກ້ໄຂຜົນຮ້າຍຢ້ອນຫຼັງຈາກສົງຄາມເວົ້າລວມ ແລະ ຜົນຮ້າຍຢ້ອນຫຼັງຈາກລູກລະເບີດບໍ່ທັນແຕກເວົ້າສະເພາະ.

     ໃນໄລຍະຈະມາເຖິງ, ທ່ານນາຍົກລັດຖະມົນຕີ ຟ້າມມິງຈິງ ສະເໜີໃຫ້ສືບຕໍ່ມີມາດຕະການແກ້ໄຂຜົນຮ້າຍຢ້ອນຫຼັງຈາກລູກລະເບີດບໍ່ທັນແຕກໃຫ້ດີກວ່າອີກ.

     “ຕ້ອງກຳນົດວຽກງານແກ້ໄຂຜົນຮ້າຍຢ້ອນຫຼັງຈາກລູກລະເບີດບໍ່ທັນແຕກ ແລະ ທາດພິດເຄມີທີ່ຕົກຄ້າງຈາກສົງຄາມ ແມ່ນໜ້າທີ່ຮີບດ່ວນ ແລະ ຈຳເປັນ, ປະກອບສ່ວນເຂົ້າໃນການປະຕິບັດເປົ້າໝາຍປົກປ້ອງຊີວິດອິນຊີ, ສຸຂະພາບ, ຄວາມປອດໄພໃຫ້ແກ່ປະຊາຊົນ, ທຳຄວາມສະອາດສິ່ງແວດລ້ອມ, ອຳນວຍຄວາມສະດວກແກ່ການພັດທະນາເສດຖະກິດ - ສັງຄົມແບບຍືນຍົງ. ສືບຕໍ່ຕີລາຄາຄວາມອັນຕະລາຍຂອງລູກລະເບີດບໍ່ທັນແຕກນັ້ນ ໃຫ້ເປັນຢ່າງດີ ເພື່ອວາງອອກໜ້າທີ່ໃຫ້ແກ່ໄລຍະຈະມາເຖິງ; ສືບຕໍ່ສຳຫຼວດກວດຄືນ, ສ້າງລະບົບລະບອບ, ນະໂຍບາຍ, ກອບນິຕິກຳກ່ຽວກັບວຽກງານນີ້ໃຫ້ສົມບູນແບບ, ຮັບປະກັນຄວາມເປັນເອກະພາບ ແລະ ຮອບດ້ານ”.