(vovworld) – ວັນທີ 13/6, ທີ່ການປະຊຸມຂ່າວນັດສາມັນ ເດືອນ 6, ໂຄສົກກະຊວງການຕ່າງປະເທດ ຫວຽດນາມ ເລືອງແທງຫງີ້ ໃຫ້ຮູ້ວ່າ: ໂດຍໄດ້ຮັບຄຳເຊື້ອເຊີນຂອງທ່ານເລຂາທິການໃຫຍ່, ປະທານປະເທດ ສ ຈີນ ສຶຈິ້ນຜິງ, ທ່ານປະທານປະເທດ ຫວຽດນາມ ເຈືອງເຕີນຊາງ ຈະມີການຢ້ຽມຢາມທາງລັດຖະກິດ ຈີນໃນລະຫວ່າງວັນທີ 19 – 21/6/2013. ນີ້ແມ່ນການຢ້ຽມຢາມທາງລັດຖະກິດ ຈີນ ເປັນຄັ້ງທຳອິດຂອງທ່ານປະທານປະເທດ ເຈືອງເຕີນຊາງ ໃນຖານະຕຳແໜ່ງ ເປັນປະທານປະເທດ ແລະ ແມ່ນການຢ້ຽມຢາມທາງລັດຖະກິດຄັ້ງທຳອິດຂອງການນຳຂັ້ນສູງ ຫວຽດນາມ ພາຍຫຼັງທີ່ ຈີນ ມີຄະນະການນຳໃໝ່. ທ່ານ ເລືອງແທງຫງີ້ ເນັ້ນໜັກວ່າ:
“ການຢ້ຽມຢາມຂອງທ່ານປະທານປະເທດ ເຈືອງເຕີນຊາງ ມີຄວາມໝາຍສຳຄັນທີ່ສຸດ, ເພື່ອແນໃສ່ເພີ່ມທະວີຄວາມໄວ້ເນື້ອເຊື່ອໃຈທາງດ້ານການເມືອງ ແລະ ການຮ່ວມມືມິດຕະພາບລະຫວ່າງ 2 ພັກ, 2 ລັດ, ກຳນົດທິດທາງໃຫຍ່ໃຫ້ແກ່ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ 2 ປະເທດກ້າວເຂົ້າສູ່ລວງເລິກ, ພັດທະນາຢ່າງແທດຈິງໃນບັນດາຂົງເຂດ, ເພື່ອການພັດທະນາຂອງ ຫວຽດນາມ ແລະ ຈີນ, ເພື່ອສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ.”
ທ່ານລັດຖະມົນຕີການຕ່າງປະເທດ ຫວຽດນາມ ຟ້າມບິນມິນ ກໍ່ຈະມີການຢ້ຽມຢາມ, ເຮັດວຽກຢູ່ ລາວ ແຕ່ວັນທີ 14 – 16/6. ນອກຈາກນັ້ນແລ້ວ, ຍັງມີການຢ້ຽມຢາມ ຫວຽດນາມ ຂອງທ່ານຮອງປະທານຜູ້ທີ 1 ສະພາແຫ່ງລັດ ກູຍບາ Miguel Diaz – Canel ແລະ ຮອງລັດຖະມົນຕີການຕ່າງປະເທດ Ecuador Ricardo Patino.
ກໍ່ໃນເດືອນ 6, ການເຄື່ອນໄຫວພົວພັນການຕ່າງປະເທດທີ່ເປັນໜ້າສົນໃຈນັ້ນແມ່ນການສະເຫຼີມສະຫຼອງ 10 ປີແຫ່ງວັນເຊັນສົນທິສັນຍາປົກປັກຮັກສາມໍລະດົກວັດທະນະທຳບໍ່ມີຮູບຮ່າງຂອງໂລກ ຖືກຈັດຕັ້ງຂຶ້ນຢູ່ ໂຮ້ຍອານ, ແຂວງ ກວາງນາມ ແຕ່ວັນທີ 19 – 23/6.