ຕອນເຊົ້າວັນທີ 20 ສິງຫາ, ເນື່ອງໃນໂອກາດສະເຫຼີມສະຫຼອງ 130 ປີ ແຫ່ງວັນຄ້າຍວັນເກີດຂອງປະທານ ຕົນດຶກທັ໋ງ, ຢູ່ແຂວງອານຢາງ, ເຊິ່ງເປັນບ້ານເກີດເມືອງນອນຂອງເພິ່ນ, ໄດ້ດໍາເນີນພິທີຖະຫວາຍທູບທຽນ, ວາງພວງມາລາອາໄລຫາ ແລະ ພິທີຊຸມນຸມມິດຕິງສະເຫຼີມສະຫຼອງ 130 ປີແຫ່ງວັນຄ້າຍວັນເກີດຂອງປະທານ ຕົນດຶກທັ໋ງ. ຫຼັງຈາກນັ້ນ, ກໍໄດ້ຈັດລາຍການສະແດງສິລະປະ ເຊິ່ງມີຫວົຂໍ້ວ່າ “ປະທານ ຕົນດຶກທັ໋ງ-ລູກຮັກທີ່ຈົງຮັກພັກດີຂອງພາກກາງ”.

        ພິທີສະເຫຼີມສະຫຼອງ 130 ປີ ແຫ່ງວັນຄ້າຍວັນເກີດຂອງປະທານ ຕົນດຶກທັ໋ງ (20/8/1888 – 20/8/2018) ໄດ້ມີການເຂົ້າຮ່ວມຂອງແຂກຖືກເຊີນ ເຊິ່ງເປັນການນໍາພັກ, ລັດ, ບັນດາຂະແໜງການ, ໝູ່ຄະນະຈາກສູນກາງຕະຫຼອດຮອດບັນດາແຂວງ, ນະຄອນເຂດທົ່ງພຽງແມ່ນໍ້າຂອງທາງພາກໃຕ້ຫວຽດນາມ, ຍາດພີ່ນ້ອງໃນຄອບຄົວຂອງປະທານ ຕົນດຶກທັ໋ງ ພ້ອມດ້ວຍປະຊາຊົນພາຍໃນແຂວງ ອານຢາງ ແລະ ບັນດາແຂວງໃນທົ່ວປະເທດ ຈໍານວນກວ່າ 600 ຄົນ.

        ເນື່ອງໃນໂອກາດນີ້, ວັນທີ 19 ສິງຫາ, ຢູ່ແຂວງອານຢາງ, ສະຖາບັນການເມືອງແຫ່ງຊາດໂຮ່ຈີມິນ ໄດ້ສົມທົບກັບຄະນະໂຄສະນາສຶກສາສູນກາງ ແລະ ຄະນະພັກແຂວງອານຢາງ ຈັດຕັ້ງກອງປະຊຸມສໍາມະນາວິທະຍາສາດ ດ້ວຍຫົວຂໍ້ວ່າ “ປະທານຕົນດຶກທັ໋ງ - ນັກກອມມູນິດທີ່ເປັນແບບຢ່າງ, ການນໍາຜູ້ມີຊື່ສຽງຂອງການປະຕິວັດຫວຽດນາມ”. ເຂົ້າຮ່ວມກອງປະຊຸມສໍາມະນາດັ່ງກ່າວ ມີທ່ານປະທານປະເທດຫວຽດນາມ ເຈີ່ນດ້າຍກວາງ; ທ່ານເລຂາສູນກາງພັກກອມມູນິດຫວຽດນາມ, ຫົວໜ້າຄະນະໂຄສະນາສຶກສາສູນກາງພັກ ຫວໍວັນ ເຖືອງ. ຄະນະຈັດຕັ້ງກອງປະຊຸມສໍາມະນາໄດ້ຮັບບົດປະກອບຄໍາເຫັນ 45 ບົດຈາກບັນດາການນໍາ ແລະ ນັກວິທະຍາສາດທີ່ເຂົ້າຮ່ວມ.

        ເມື່ອກ່າວຄໍາເຫັນສະຫຼຸບກອງປະຊຸມສໍາມະນາ, ທ່ານ ສາດສະດາຈານ, ດຣ. ຫງວຽນຊວນແທັງ ເລຂາສູນກາງພັກ, ປະທານສະພາທິດສະດີສູນກາງ, ຜູ້ອໍານວນການສະຖາບັນການເມືອງແຫ່ງຊາດ ໂຮ່ຈີມິນ, ໄດ້ຕີລາຄາບັນດາການປະກອບຄໍາຄິດເຫັນ ໄດ້ສະແດງໃຫ້ເຫັນຢ່າງຈະແຈ້ງ ເຖິງການເຄື່ອນໄຫວ ແລະ ການອຸທິດສ່ວນຂອງປະທານ ຕົນດຶກທັ໋ງ ດ້ວຍບົດບາດເປັນຜູ້ສ້າງຕັ້ງ, ຈັດຕັ້ງອົງການກໍາມະບານທໍາອິດຂອງຫວຽດນາມ, ເປັນນັກຮົບປະຈັນບານ ແລະ ເປັນຜູ້ນໍາຂອງຊົນຊັ້ນກໍາມະກອນຫວຽດນາມ. ປະທານ ຕົນດຶກທັ໋ງ - ນັກກອມມູນິດທີ່ເປັນແບບຢ່າງ, ອຸທິດຕະຫຼອດຊີວິດໃຫ້ແກ່ພາລະກິດແຫ່ງການປົດປ່ອຍຊາດ, ເພື່ອເສລີພາບ ແລະ ຄວາມຜາສຸກຂອງປະຊາຊົນ.