ປະຊາຊົນລໍຖ້າການອຸປະຖຳ ຢູ່ ໂຊມາລີ (ພາບ:AFP/TTXVN)

ບັນດາຄູ່ຮ່ວມມືພັດທະນາໃຫ້ຄຳໝັ້ນສັນຍາອຸປະຖຳບ້ວງເງິນມີມູນຄ່າ 30 ຕື້ USD ແນໃສ່ຊຸກຍູ້ການຜະລິດສະບຽງອາຫານຢູ່ ອາບຟຣີກາ ໃນ 5 ປີຈະມາເຖິງ - ນັ້ນແມ່ນຂໍ້ມູນໂດຍທ່ານ Akinwumi Adesina , ປະທານທະນາຄານພັດທະນາ ອາບຟຣີກາ (AFDB) ຍົກອອກມາທີ່ວາລະອັດກອງປະຊຸມສຸດຍອດສະບຽງອາຫານ ອາບຟຣີກາ  ໃນວັນທີ 27 ມັງກອນ, ຢູ່ນະຄອນຫຼວງ Dakar, ຂອງປະເທດ ເຊເນການ.

ກອງປະຊຸມສຸດຍອດສະບຽງອາຫານ ອາບຟຣີກາ ດຳເນີນໃນເວລາ 3 ວັນດ້ວຍການເຂົ້າຮ່ວມຂອງບັນດາການນຳ ອາບຟຣີກາ, ຜູ້ຕາງໜ້າບັນດາທະນາຄານພັດທະນາ ແລະ ຄູ່ຮ່ວມມືສາກົນ, ໃນນັ້ນ ມີອາເມລິກາ, ສະຫະພາບເອີລົບ (EU) ແລະ ອັງກິດ. ເຫດການໂດຍທະນາຄານພັດທະນາ ອາບຟຣີກາ ແລະ  ເຊເນການ ຮ່ວມກັນຈັດຕັ້ງ ເພື່ອແນໃສ່ລະດົມການອຸປະຖຳ ແລະ ຮຽກຮ້ອງບັນດາຄຳໝັ້ນສັນຍາທາງດ້ານການເມືອງ. ກອງປະຊຸມໄດ້ເນັ້ນໜັກເຖິງການປຶກສາຫາລືກ່ຽວກັບເລື່ອງບັນດາປະເທດ ອາບຟຣີກາ ຄວນເພີ່ມທະວີກຳລັງການຜະລິດສະບຽງອາຫານ, ແທນໃຫ້ການເອື່ອຍອີງໃສ່ການນຳເຂົ້າຫຼາຍເກີນໄປ.

ຕາມການຄາດຄະເນຂອງ ສປຊ ແລ້ວ, ອາບຟຣີກາ ພວມປະເຊີນໜ້າກັບວິກິດການສະບຽງອາຫານຢ່າງໜັກໜ່ວງທີ່ສຸດນັບແຕ່ກ່ອນຈົນມາຮອດປະຈຸບັນ. ປະຊາກອນ ອາບຟຣີກາ ກ່ວາ 20% (ເທົ່າກັບ 278 ລ້ານຄົນ), ຕ້ອງປະເຊີນໜ້າກັບໄພອຶດຫິວ.