ກ່າວຄຳປາໄສຢູ່ກອງປະຂຸມ, ທ່ານ ຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຫວຽດນາມ ຢັ້ງຢືນເຖິງການປະກອບສ່ວນຢ່າງມີປະສິດທິຜົນຂອງ ຫວຽດນາມໃນການຮ່ວມມື MLC, ພ້ອມທັງເນັ້ນໜັກວ່າກົນໄກນີ້  ຕ້ອງປະກອບສ່ວນປັບປຸງການສົມທົບລະຫວ່າງບັນດາປະເທດໃນການແກ້ໄຂບັນດາສິ່ງທ້າທາຍລວມຂອງພາກພື້ນ ແລະ ນຳເອົາຜົນປະໂຫຍດຍາວນານ ມາໃຫ້ປະຊາຊົນ.

ກ່ຽວກັບກຳນົດທິດການເຄື່ອນໄຫວ, ທ່ານຮອງນາຍົກລັດຖະມົນຕີ ຟ້າມບິ່ງມິງ ຖືວ່າ ການຮ່ວມມື MLCຄວນມຸ່ງໄປເຖິງການຍົກສູງກຳລັງຄວາມສາມາດຕ້ານທານຂອງພື້ນຖານເສດຖະກິດ ຕໍ່ໜ້າບັນດາການຜັນປ່ຽນ ແລະ ການຂາດສະຖຽນລະພາບຍາກທີ່ຈະຄາດຄະເນໄດ້ ສຸມແຫຼ່ງກຳລັງໃຫ້ບັນດາຂົງເຂດມີຄວາມສ່ຽງສູງກ່ວາໝູ່ ແລະ ມີຄວາມໝາຍສຳຄັນຕໍ່ການພັດທະນາເສດຖະກິດບັນດາປະເທດສະມາຊິກ. ລະອຽດ: ການຮ່ວມມືກະສິກຳສຸມໃສ່ຍົກສູງກຳລັງຄວາມສາມາດດ້ານເຕັກໂນໂລຢີໃຫ້ບັນດາວິສາຫະກິດ ແລະ ປົວແປງລັກສະນະສະຖຽນລະພາບ ແລະ ຄວາມເຊື່ອໝັ້ນ ຂອງທ້ອງຕະຫຼາດທາງສົ້ນອອກໃຫ້ຜະລິດຕະພັນກະສິກຳ; ສະພາບການໄພແຫ້ງແລ້ງນັບມື້ນັບຮ້າຍແຮງຢູ່ຍ່ານລຸ່ມແມ່ນ້ຳຂອງ ຮຽກຮ້ອງໃຫ້ບັນດາປະເທດແຄມແມ່ນ້ຳຕ້ອງມີການກະທຳຢ່າງຂ້ຽວຂາດເພື່ອຮັບປະກັນການພັດທະນາແບບຍືນຍົງຂອງແມ່ນ້ຳ.

ຕອນບ່າຍວັນທີ 20 ກຸມພາ, ຢູ່ນອກກອງປະຊຸມພິເສດ ລັດຖະມົນຕີກະຊວງການຕ່າງປະເທດ ອາຊຽນ - ຈີນ ຢູ່ນະຄອນຫຼວງ ວຽງຈັນ, ທ່ານ ຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຫວຽດນາມ ໄດ້ມີການພົບປະກັບ ທ່ານລັດຖະມົນຕີກະຊວງການຕ່າງປະເທດ ມາເລເຊຍ Saifuddin Abdullah.