ບຸນປີໃໝ່ປະຈຳຊາດຂອງຊາວ ຫວຽດນາມ ອາໄສ ຢູ່ຕ່າງປະເທດ
(VOVWORLD) -ວັນທີ 15 ມັງກອນ, ມີພໍ່ແມ່ພີ່ນ້ອງເຊື້ອຊາດ ຫວຽດນາມ ຢູ່ Chennai, ປະເທດ ອິນເດຍ ເກືອບ 100 ຄົນ ໄດ້ເຂົ້າຮ່ວມລາຍການ “ບຸນເຕັດວົງຄະນະຍາດ - ລະດູບານໃໝ່ແຫ່ງບ້ານເກີດເມືອງນອນ” ໂດຍສະຖານທູດ ຫວຽດນາມ ປະຈຳ ອິນເດຍ ສົມທົບກັບ ຄະນະບໍລິຫານງານສະມາຄົມຊາວ ຫວຽດນາມ ອາໄສ ຢູ່ Chennai ຈັດຂຶ້ນ.
 ທ່ານເອກອັກຄະລັດຖະທູດ ຫວຽດນາມ ປະຈຳ ອິນເດຍ ຫງວຽນແທັງຫາຍ (ພາບ: ນັກຂ່າວ VOV ປະຈຳ New Delhi) |
ກ່າວຄຳເຫັນໄຂລາຍການ, ທ່ານເອກອັກຄະລັດຖະທູດ ຫວຽດນາມ ປະຈຳ ອິນເດຍ ຫງວຽນແທັງຫາຍ ເນັ້ນໜັກວ່າ:
“ປະຊາຄົມຊາວ ຫວຽດນາມ ອາໄສຢູ່ຕ່າງປະເທດ ແມ່ນພາກສ່ວນທີ່ບໍ່ອາດຕັດແຍກອອກຈາກຊາດ ຫວຽດນາມ ໄດ້ ແລະ ແມ່ນແຫຼ່ງກຳລັງພາຍໃນອັນໜຶ່ງຂອງຊາດ ຫວຽດນາມ, ແມ່ນປັດໄຈສຳຄັນປະກອບສ່ວນເຂົ້າໃນການເພີ່ມທະວີການພົວພັນຮ່ວມມືມິດຕະພາບລະຫວ່າງ ຫວຽດນາມ ກັບບັນດາປະເທດ. ສະຖານທູດ ຫວຽດນາມ ປະຈຳ ອິນເດຍ ຖືວຽກງານຊາວ ຫວຽດນາມ ອາໄສຢູ່ ອິນເດຍ ແມ່ນເສົາຄ້ຳໃນການເຄື່ອນໄຫວຂອງຕົນ. ພວກຂ້າພະເຈົ້າກໍມານະພະຍາຍາມເພື່ອໜູນຊ່ວຍພໍ່ແມ່ພີ່ນ້ອງ ເຮັດວຽກ, ດຳລົງຊີວິດ ກໍຄື ຍົກສູງຖານະນິຕິກຳຢູ່ ອິນເດຍ ແລະ ຈັດກິດຈະກຳເຄື່ອນໄຫວຕ່າງໆ ເພື່ອເຊື່ອມຕໍ່ພໍ່ແມ່ພີ່ນ້ອງຊາວ ຫວຽດນາມ ອາໄສ ຢູ່ຕ່າງປະເທດ ກັບບ້ານເກີດເມືອງນອນ ແລະ ປະກອບສ່ວນເຂົ້າໃນການພັດທະນາຂອງປະເທດຊາດ”.
ກໍໃນວັນດຽວກັນ, ສະຖານທູດ ຫວຽດນາມ ປະຈຳບັນດາປະເທດ ຄື ຍີ່ປຸ່ນ, ກູບາ, ບຣູໄນ ກໍໄດ້ຈັດບຸນເຕັດວົງຄະນະຍາດປີ 2023 ເຊັ່ນດຽວກັນ.
 ທ່ານ ຫງວຽນດຶກມິງ, ອຸປະທູດຊົ່ວຄາວ ສະຖານທູດ ຫວຽດນາມ ປະຈຳ ຍີີ່ປຸ່ນ ກ່າວຄຳເຫັນທີ່ວັນບຸນ (ພາບ: TTXVN) |
ສະຖານກົງສູນ ຫວຽດນາມ ປະຈຳ Vancouver, ການາດາ, ວັນທີ 14 ມັງກອນ ກໍໄດ້ຈັດລາຍການ ລະດູບານໃໝ່ແຫ່ງບ້ານເກີດເມືອງນອນ ປີ ແມວ ດ້ວຍການເຂົ້າຮ່ວມຂອງພໍ່ແມ່ພີ່ນ້ອງຊາວ ຫວຽດນາມ ປະມານ 400 ຄົນທີ່ພວມ ອາໄສ ຢູ່ເຂດຕາເວັນຕົກ ປະເທດນີ້ ພ້ອມດ້ວຍເພື່ອນມິດສາກົນ.