 |
(vovworld) – ເນື່ອງໃນໂອກາດບຸນປີໃໝ່ປະຈຳຊາດປີວອກ 2016, ສະຖານທູດ ຫວຽດນາມ ປະຈຳ ອິດສະຣາແອນ ໄດ້ຈັດຕັ້ງງານພົບປະສັງສັນຂຳ່ນັບຮັບຕ້ອນລະດູບານໃໝ່ປີວອກ 2016 ໃນວັນທີ 31/1. ເຂົ້າຮ່ວມງານພົບປະສັງສັນມີພໍ່ແມ່ປະຊາຊົນຊາວ ຫວຽດນາມ, ຜູ້ຕາງໜ້ານັກສຶກສາ, ຄົນງານ, ນັກສຳມະນາກອນພວມທຳມາຫາກິນ, ດຳລົງຊີວິດ, ຮຳ່ຮຽນຢູ່ ອິດສະຣາແອນ ເກືອບ 250 ຄົນ. ກ່າວຄຳເຫັນທີ່ງານພົບປະສັງສັນ, ທ່ານເອກອັກຄະລັດຖະທູດ ກາວເຈີນກວກຫາຍ ແນະນຳບັນດາຜົນງານເຊິ່ງ ຫວຽດນາມ ບັນລຸໄດ້ໃນປີ 2015, ພິເສດແມ່ນການຈັດຕັ້ງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດ ຫວຽດນາມ ສຳເລັດຜົນ ແລະ ເນັ້ນໜັກວ່າບັນດາຜົນງານນັ້ນໄດ້ປະກອບສ່ວນຍົກສູງທີ່ຕັ້ງບົດບາດ ແລະ ອິດທິພົນຊື່ສຽງຂອງ ຫວຽດນາມ ໃນພາກພື້ນ ແລະ ໃນໂລກ.
ໃນບັນຍາກາດປະຊາຊົນທົ່ວປະເທດຂຳ່ນັບຊົມເຊີຍຜົນສຳເລັດຂອງກອງປະຊຸມໃຫຍ່ຄັ້ງທີ 12 ແລະ ຕ້ອນຮັບລະດູບານໃໝ່, ວັນທີ 28/1, ສະຖານທູດ ຫວຽດນາມ ປະຈຳ ອານເຊຣີ ໄດ້ຈັດຕັ້ງງານບຸນຕ້ອນຮັບປີໃໝ່ປະຈຳຊາດປີວອກ 2016. ກ່າວຄຳເຫັນທີ່ການພົບປະ, ທ່ານເອກອັກຄະລັດຖະທູດ ຫວູເທ໋ຮຽບ ໄດ້ຊີ້ແຈ້ງບັນດາຜົນງານສຳຄັນຊຶ່ງ ຫວຽດນາມ ບັນລຸໄດ້ໃນພາລະກິດສ້າງສາ, ພັດທະນາ ແລະ ເປັນເຈົ້າການເຊື່ອມໂຍງເຂົ້າກັບສາກົນປີ 2015, ທົບທວນຄືນບັນດາຜົນງານໃນການພັດທະນາການພົວພັນຮ່ວມມືລະຫວ່າງ ຫວຽດນາມ - ອານເຊຣີ, ພ້ອມທັງຍ້ອງຍໍຊົມເຊີຍບັນດາຜົນງານຂອງສະຖານທູດ ແລະ ປະຊາຄົມຊາວ ຫວຽດນາມ ຢູ່ທີ່ນີ້ໃນປີຜ່ານມາ.
ກໍເນື່ອງໃນໂອກາດນີ້, ສະມາຄົມຊາວກະສິກອນ ຫວຽດນາມ ປະຈຳ Adelaide, ລັດ ອົດສະຕາລີໃຕ້, ຫາກໍ່ສະຫລຸບ 30 ປີແຫ່ງການເຄື່ອນໄຫວສ້າງປະຊາຄົມ ຫວຽດນາມ ແລະ ຈັດຕັ້ງການຕ້ອນຮັບບຸນປີໃໝ່ປະຈຳຊາດປີວອກ 2016. ກ່າວຄຳເຫັນທີ່ພິທີ, ຜູ້ຕາງໜ້າອຳນາດການປົກຄອງລັດໃຫ້ຮູ້: ໄດ້ຮັບຮອງບັນດາການປະກອບສ່ວນສຳຄັນຂອງປະຊາຄົມຊາວ ຫວຽດນາມ ເຂົ້າໃນການກໍ່ສ້າງພື້ນຖານເສດຖະກິດຂອງລັດໃຫ້ນັບມື້ນັບພັດທະນາ. ເປັນໜ້າສົນໃຈແມ່ນ, ມີງົບປະມານຂອງລັດປະມານ 5% ແມ່ນມາຈາກການປະກອບສ່ວນຂອງປະຊາຄົມຊາວ ຫວຽດນາມ ອາໄສຢູ່ອົດສະຕາລີ.