ຊາວຫວຽດນາມອາໄສຢູ່ຕ່າງປະເທດພົບປະສັງສັນຕ້ອນຮັບບຸນເຕັດປີມະແມ
ພາບ:internet
|
(vovworld)-ບຸນເຕັດວົງຄະນາຍາດ ອວຍພອນປີໃຫມ່ປີມະແມ 2015 ຢູ່ ຍີ່ປຸ່ນ ໂດຍມີການເຂົ້າຮ່ວມຂອງ ທ່ານດາວຊວນຮືງ, ເອກອັກຄະລັດຖະທູດ ຫວຽດນາມປະຈຳຍີ່ປຸ່ນ ພ້ອມດ້ວຍຜູ້ຕາງຫນ້າສະມາຄົມຊາວຫວຽດນາມ, ສະມາຄົມນັກທຸລະກິດຫວຽດນາມ ແລະ ກວ່າ 300 ຄົນທີ່ຕາງຫນ້າໃຫ້ບັນດາອົງການ, ນັກສຶກສາ ແລະ ຄົນງານຫວຽດນາມ ຢູ່ ຍີ່ປຸ່ນ. ທ່ານເອກອັກຄະລັດຖະທູດ ດາວຊວນຮືງ ຕີລາຄາສູງ ວົງຄະນາຍາດຊາວຫວຽດນາມ ອາໄສຢູ່ ຍີ່ປຸ່ນ ໄດ້ປະກອບສ່ວນສ້າງສາ, ພັດທະນາປະເທດຊາດ ກໍຄືເພີ່ມພູນຄູນສ້າງສາຍພົວພັນອັນດີງາມລະຫວ່າງ ຫວຽດນາມ ແລະ ຍີ່ປຸ່ນ.
ຢູ່ ນະຄອນຫລວງ Cairo, ສະຖານທູດ ຫວຽດນາມ ໄດ້ຈັດຕັ້ງການພົບປະສັງສັນ ຕ້ອນຮັບລະດູບານໃຫມ່, ຕ້ອນຮັບບຸນປີໃຫມ່ປະຈຳຊາດ. ທ່ານ ເອກອັກຄະລັດຖະທູດ ດາວແທ່ງຈູງ ໄດ້ແຈ້ງບັນດາຜົນງານພົ້ນເດັ່ນກ່ຽວກັບສະພາບການການເມືອງ, ເສດຖະກິດ, ສັງຄົມຂອງຫວຽດນາມ, ກ່ຽວກັບສາຍພົວພັນລະຫວ່າງຫວຽດນາມ ແລະ ອີຢີບ ໃນປີຜ່ານມາ ພ້ອມທັງຮັບຮູ້ບັນດາການປະກອບສ່ວນຕັ້ງຫນ້າຂອງຊາວຫວຽດນາມ ອາໄສຢູ່ ອີຢີບ ໃນວຽກງານຂອງສະຖານທູດ. ທ່ານ ເອກອັກຄະລັດຖະທູດ ດາງແທ່ງຈູງ ເນັ້ນຫນັກວ່າ:
“ໃນປີຜ່ານມາ, ສະພາບການຜັນແປໄປຢ່າງສັບສົນ, ຊາວຫວຽດນາມ ອາໄສຢູ່ ອີຢີບ ກໍປະສົບກັບຄວາມຫຍຸ້ງຍາກ, ສິ່ງທ້າທາຍຫລາຍຢ່າງ. ສະຖານທູດ ຫວຽດນາມ ຍາມໃດກໍເຮັດຈົນສຸດຄວາມສາມາດຂອງຕົນເພື່ອຮັບປະກັນຄວາມປອດໄພໃຫ້ແກ່ວົງຄະນາຍາດຊາວຫວຽດນາມ. ເຖິງວ່າ ໃນເງື່ອນໄຂຫຍຸ້ງຍາກຄືດັ່ງກ່າວ, ແຕ່ວົງຄະນາຍາດຊາວຫວຽດນາມ ອາໄສຢູ່ ອີຢີບ ໄດ້ຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ສືບຕໍ່ມີບັນດາຜົນງານໃນຫລາຍຂົງເຂດ, ສາມັກຄີກັນ ແລະ ຫນູນຊ່ວຍເຊິ່ງກັນ ແລະກັນ, ຮັກສາວັດທະນະທຳຂອງຊາດ, ເປັນຂົວຕໍ່ຊຸກຍູ້ການພົວພັນມິດຕະພາບຮ່ວມມືລະຫວ່າງສອງປະເທດ.”
ວັນທີ 14/2, ສະຖານທູດຫວຽດນາມ ຢູ່ ປານາມາ ໄດ້ຈັດຕັ້ງການພົບປະສັງສັນຕ້ອນຮັບປີໃຫມ່ປະຈຳຊາດປີມະແມ, ໂດຍມີການເຂົ້າຮ່ວມຂອງຊາວຫວຽດນາມ ອາໄສຢູ່ ປານາມາ ເປັນຈຳນວນຫລວງຫລາຍ. ທ່ານ ຫງວຽນອານຢູຍ, ເອກອັກຄະລັດຖະທູດ ຫວຽດນາມ ປະຈຳ ປານາມາ ໄດ້ຂອບອົກຂອບໃຈ ແລະ ຕີລາຄາສູງບັນດາການປະກອບສ່ວນຂອງຊາວຫວຽດນາມ ອາໄສຢູ່ ປານາມາ ທີ່ມີຕໍ່ບ້ານເກີດເມືອງນອນ, ປະເທດຊາດ. ບຸນເຕັດວົງຄະນາຍາດແມ່ນໂອກາດເພື່ອສະແດງຄວາມເຄົາລົບ ແລະ ຂອບອົກຂອບໃຈຕໍ່ການຮ່ວມມື, ຫນູນຊ່ວຍຂອງບັນດາສ່ວນບຸກຄົນ, ສະມາຄົມ ແລະ ສົ່ງເສີມຊາວຫວຽດນາມ ອາໄສຢູ່ຕ່າງປະເທດນັບມື້ນັບສາມັກຄີກວ່າ, ອວ່າຍຫນ້າເມືອຫາບ້ານເກີດເມືອງນອນ, ປະເທດຊາດເພື່ອພາລະກິດສ້າງສາ ແລະ ປົກປັກຮັກສາປະເທດຊາດ.