ບໍ່ປະໃຫ້ອິດທິກຳລັງໃດທຳລາຍການພົວພັນພິເສດ ຫວຽດນາມ - ກຳປູເຈຍ
ນັກຂ່າວ VOV ປະຈຳ ກຳປູເຈຍ -
(ໂຄສົກລັດຖະບານລາຊະອານາຈັກກຳປູເຈຍ Phay Siphan)
(vovworld) – ”ລັດຖະບານ ແລະ ປະຊາຊົນກຳປູເຈຍ ຍາມໃດກໍ່ມີແຜນນະໂຍບາຍປົກປັກຮັກສາ ແລະ ພັດທະນາການພົວພັນກັບຫວຽດນາມ ແລະ ເດັດດຽວ ບໍ່ປະໃຫ້ອິດທິກຳລັງໃດທຳລາຍການພົວພັນພິເສດຫວຽດນາມ - ກຳປູເຈຍ”. ນັ້ນແມ່ນຄຳຖະແຫຼງຂອງໂຄສົກລັດຖະບານລາຊະອານາຈັກກຳປູເຈຍ Phay Siphan ເມື່ອຕອບສຳພາກຕໍ່ນັກຂ່າວວິທະຍຸກະຈາຍສຽງຫວຽດນາມ ປະຈຳກຳປູເຈຍ ໃນວັນທີ 23/10/2014. ກ່ຽວກັບເລື່ອງໄລຍະຜ່ານມາ ໄດ້ມີບຸກຄົນຈຳນວນໜຶ່ງຈັດຕັ້ງການແຫ່ຂະບວນປະທ້ວງຢູ່ຕໍ່ໜ້າສະຖານທູດຫວຽດນາມ ປະຈຳກຳປູເຈຍ ແລະ ມີການກະທຳເກາະຜິດ, ເສກສັນປັ້ນແຕ່ງປະຫວັດສາດແຫ່ງສາຍພົວພັນລະຫວ່າງສອງປະເທດ, ທ່ານ Phay Siphan ຢືນຢັນວ່າ:
“ຂ້າພະເຈົ້າເນັ້ນໜັກວ່າ, ຫວຽດນາມ ບໍ່ແມ່ນປັດໃຈທີ່ຂົ່ມຂູ່ເຖິງຄວາມສະຫງົບປອດໄພຂອງກຳປູເຈຍ, ຫາກແມ່ນແຫຼ່ງລະດົມກຳລັງໃຈ, ເຮັດໃຫ້ພວກຂ້າພະເຈົ້າພາກພູມໃຈ ແລະ ມີຄວາມເຊື່ອໝັ້ນ. ພວກຂ້າພະເຈົ້າເດັດດຽວບໍ່ປະໃຫ້ກຸ່ມຄົນບໍ່ດີແບ່ງແຍກການພົວພັນລະຫວ່າງສອງປະເທດ. ຄວາມສະຫງົບປອດໄພ, ສັນຕິພາບ, ການພົວພັນຮ່ວມມືອັນດີງາມແມ່ນເປົ້າໝາຍອັນສູງສົ່ງຂອງທັງສອງປະເທດ. ລັດຖະບານ ແລະ ທົ່ວປວງຊົນກຳປູເຈຍ ບໍ່ສະໜັບສະໜູນ ແລະ ເດັດດຽວບໍ່ປະໃຫ້ກຸ່ມຄົນບໍ່ດີສວຍໃຊ້ໂອກາດເພື່ອທຳລາຍການພົວພັນອັນດີງາມລະຫວ່າງສອງປະເທດ“.
ໂຄສົກລັດຖະບານລາຊະອານາຈັກກຳປູເຈຍ Phay Siphan ຍັງໃຫ້ຮູ້ວ່າ, ໃນໄລຍະຈະມາເຖິງ, ລັດຖະບານກຳປູເຈຍ ຈະຍູ້ແຮງການໂຄສະນາ ເພື່ອໃຫ້ກຸ່ມຄົນບໍ່ດີເຂົ້າໃຈແຈ້ງກວ່າກ່ຽວກັບປະຫວັດສາດ, ກົດໝາຍສາກົນ ກໍ່ຄືການພົວພັນລະຫວ່າງສອງປະເທດ. ລັດຖະບານລາຊະອານາຈັກກຳປູເຈຍ ຕັດສິນໃຈປະຕິບັດຕາມກົດໝາຍສາກົນ ກໍ່ຄືກົດໝາຍຂອງປະເທດຕົນ.
ນັກຂ່າວ VOV ປະຈຳ ກຳປູເຈຍ