(ກອງປະຊຸມສະຫຼຸບ 5 ປີ ແຫ່ງການປະຕິບັດໂຄງການຈຸດໝາຍ
ແຫ່ງຊາດກ່ຽວກັບການກໍ່ສ້າງຊົນນະບົດໃໝ່ໄລຍະ 2010-2015)
(vovworld) - ວັນທີ 8/12, ຄະນະຊີ້ນຳສູນກາງໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ ໄດ້ຈັດຕັ້ງກອງປະຊຸມສະຫຼຸບ 5 ປີ ແຫ່ງການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ໄລຍະ 2010-2015, ວາງທິດທາງ, ໜ້າທີ່ໄລຍະ 2016-2020.
ບົດລາຍງານທີ່ກອງປະຊຸມຢືນຢັນວ່າ, ໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່ ໄລຍະ 2010 – 2015 ໄດ້ປ່ຽນໃໝ່ຄວາມຮັບຮູ້ຂອງປະຊາຊົນສ່ວນຫຼາຍທີ່ເຂົ້າຮ່ວມການກໍ່ສ້າງຊົນນະບົດໃໝ່. ຍ້ອນເຫດນັ້ນ, ລະບົບໂຄງລ່າງຊົນນະບົດໄດ້ຮັບການພັດທະນາຢ່າງແຮງ, ເຮັດໃຫ້ໂສມໜ້າເຂດຊົນນະບົດຫຼາຍແຫ່ງມີການປ່ຽນແປງ. ເງື່ອນໄຂດຳລົງຊີວິດທັງດ້ານວັດຖຸ ແລະ ຈິດໃຈຂອງຊາວກະສິກອນໄດ້ຮັບການຍົກສູງຂຶ້ນຢ່າງຈະແຈ້ງ, ປະກອບສ່ວນຍົກສູງລາຍຮັບໃຫ້ຊາວກະສິກອນ.
ກ່າວຄວາມເຫັນທີ່ກອງປະຊຸມ, ທ່ານນາຍົກລັດຖະມົນຕີຫງວຽນເຕິ໋ນຢຸງ ເນັ້ນໜັກວ່າ, ໜ້າທີ່ຈຸດສຸມຈຳເປັນຕ້ອງສຸມໃສ່ປະຕິບັດໃນໄລຍະຈະມາເຖິງແມ່ນກວດກາ, ອັບເດັດ, ເພີ່ມເຕີມ, ປັບປຸງກົນໄກ, ນະໂຍບາຍໃຫ້ແກ່ການປະຕິບັດໂຄງການ, ຕ້ອງຖືນີ້ແມ່ນໜ້າທີ່ການເມືອງຈຸດສຸມ ແລະ ເປັນປະຈຳ. ທ່ານນາຍົກລັດຖະມົນຕີຫງວຽນເຕິ໋ນຢຸງ, ຊີ້ແຈ້ງວ່າ:
“ຍົກສູງຄວາມຮັບຮູ້, ຄວາມຮັບຜິດຊອບຂອງທັງລະບົບການເມືອງຢູ່ຂັ້ນສູນກາງ ກໍ່ຄືຢູ່ທ້ອງຖີ່ນກ່ຽວກັບການກໍ່ສ້າງຊົນນະບົດໃໝ່. ພວກເຮົາຮັບຮູ້ການກໍ່ສ້າງຊົນນະບົດໃໝ່ຕາມມະຕິສູນກາງ, ນັ້ນແມ່ນການຫັນກະສິກຳ, ຊົນນະບົດເປັນອຸດສາຫະກຳ ແລະ ທັນສະໄໝ, ເຊິ່ງຄາດໝາຍແມ່ນເຮັດໃຫ້ ຫວຽດນາມກາຍເປັນປະເທດອຸດສາຫະກຳ ຕາມທິດທັນສະໄໝ”.
ທີ່ກອງປະຊຸມ, ທ່ານນາຍົກລັດຖະມົນຕີຫງວຽນເຕິ໋ນຢຸງ ໄດ້ມອບທຸງແຂ່ງຂັນຂອງລັດຖະບານໃຫ້ 41 ໝູ່ຄະນະຂັ້ນເມືອງທີ່ໄດ້ນຳໜ້າໃນຂະບວນການກໍ່ສ້າງຊົນນະບົດໃໝ່. ທ່ານຮອງນາຍົກລັດຖະມົນຕີ ຫວູວັນນິງ ໄດ້ມອບໃບຍ້ອງຍໍຂອງນາຍົກລັດຖະມົນຕີ ໃຫ້ 51 ຕາແສງ, ເທດສະບານທີ່ດີເດັ່ນໃນຂະບວນການແຂ່ງຂັນທົ່ວປະເທດຮ່ວມແຮງຮ່ວມໃຈກໍ່ສ້າງຊົນນະບົດໃໝ່.