(VOVWORLD) - ໃນຊຸມວັນນີ້, ຢູ່ຫລາຍປະເທດໃນໂລກ, ປະຊາຄົມຊາວ ຫວຽດນາມ ຈັດຕັ້ງບັນດາການເຄື່ອນໄຫວຢ່າງຟົດຟື້ນ ເພື່ອຂ່ຳນັບຮັບຕ້ອນສະເຫຼີມສະຫຼອງ 72 ປີແຫ່ງການປະຕິວັດເດືອນສິງຫາ ແລະ ວັນຊາດທີ 2 ກັນຍາ.
 (ພາບປະກອບ) |
ກ່າວຄຳເຫັນທີ່ພິທີສະເຫຼີມສະຫຼອງໃນຄ່ຳຄືນວັນທີ 01 ກັນຍາ, ທ່ານ ຫງວຽນກວກເກືອງ ເອກອັກຄະລັດຖະທູດ ຫວຽດນາມ ປະຈຳ ຍີ່ປຸ່ນ ຫວນຄືນໄລຍະທາງ 72 ປີທີ່ສະຫງ່າລາສີຂອງຊາດ ຫວຽດນາມ, ເນັ້ນໜັກເຖິງວັນທີ 02/09/1945 ແມ່ນຂີດໝາຍສຳຄັນໃນປະຫວັດສາດສ້າງສາ ແລະ ຮັກສາປະເທດຊາດນັບພັນປີ.
ແລະກໍ່ໃນວັນດຽວກັນ, ສະຖານທູດ ຫວຽດນາມ ປະຈຳ ກຳປູເຈຍ ໄດ້ຈັດຕັ້ງງານລ້ຽງ. ທ່ານ ແທກຢື ເອກອັກຄະລັດຖະທູດ ຫວຽດນາມ ປະຈຳ ກຳປູເຈຍ ຢືນຢັນວ່າ: ຫວຽດນາມ ປະຕິບັດຢ່າງສະເໝີຕົ້ນສະເໝີປາຍແນວທາງພົວພັນຕ່າງປະເທດເອກະລາດ, ເປັນເຈົ້າຕົນເອງ, ຮ່ວມມື ແລະ ພັດທະນາ, ຫັນບັນດາການພົວພັນສາກົນເປັນຫລາຍຝ່າຍ, ຫລາຍຮູບຫລາຍແບບ, “ພ້ອມແລ້ວທີ່ຈະເປັນເພື່ອນມິດ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ແມ່ນສະມາຊິກມີຄວາມຮັບຜິດຊອບໃນປະຊາຄົມສາກົນ”.
ແລະກໍ່ໃນວັນທີ 01 ກັນຍາ, ຢູ່ນະຄອນຫລວງ Canberra, ສະຖານທູດ ຫວຽດນາມ ປະຈຳ ອົດສະຕາລີ ຈັດຕັ້ງພິທີສະເຫຼີມສະຫຼອງ 72 ປີແຫ່ງການປະຕິວັດເດືອນສິງຫາ ແລະ ວັນຊາດທີ 2 ກັນຍາ.
ທີ່ສ.ເຊັກໂກ, ສະຖານທູດ ຫວຽດນາມ ປະຈຳ ເຊັກໂກ ກໍ່ໄດ້ຈັດຕັ້ງພິທີສະເຫຼີມສະຫຼອງ 72 ປີແຫ່ງວັນຊາດຢ່າງສົມກຽດ. ກ່າວຄຳເຫັນນະທີ່ນີ້, ທ່ານ ໂຮ່ມິງຕ໋ວນ ເອກອັກຄະລັດຖະທູດ ຫວຽດນາມ ປະຈຳ ສ.ເຊັກໂກ ຢືນຢັນວ່າ: ຫວຽດນາມ ຍາມໃດກໍ່ຖືເປັນສຳຄັນການພັດທະນາສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານກັບ ສ.ເຊັກໂກ. ທ່ານເອກອັກຄະລັດຖະທູດ ກໍ່ຂອບໃຈລັດ, ລັດຖະບານ ແລະ ປະຊາຊົນ ເຊັກໂກ ໄດ້ສ້າງເງື່ອນໄຂສະດວກໃຫ້ປະຊາຄົມຊາວ ຫວຽດນາມ ດຳລົງຊີວິດ, ທຳມາຫາກິນ, ເຊື່ອມໂຍງເຂົ້າກັບສັງຄົມປະຈຳຖິ່ນຢ່າງເລິກເຊິ່ງ.
ໃນຂະນະນັ້ນ,ທີ່ພິທີສະເຫຼີມສະຫຼອງດຳເນີນໄປຢູ່ ອິນເດຍ ແລະ ອາກຊັງຕິນ, ບັນດາເຈົ້າໜ້າທີ່, ນັກຊ່ຽວຊານ ແລະ ເພື່ອນມິດສາກົນ ກໍ່ໄດ້ອວຍພອນປະຊາຊົນ ຫວຽດນາມ ຢ່າງສຸດໃຈ.