ທ່ານລັດຖະມົນຕີກະຊວງຕຳຫຼວດ ຫວຽດນາມ ໂຕເລິມ ກ່າວຄຳເຫັນທີ່ພິທີ

ຕອນເຊົ້າວັນທີ 14 ມິຖຸນາ, ສະພາແຫ່ງຊາດ ຫວຽດນາມ ເຮັດວຽກຢູ່ຫໍປະຊຸມ, ຮັບຟັງບົດລາຍງານອະພິປາຍ, ຮັບເອົາຄຳເຫັນ ແລະ ດັດປັບຮ່າງກົດໝາຍປັບປຸງ, ເພີ່ມເຕີມບາງມາດຕາຂອງກົດໝາຍວ່າດ້ວຍກາຍຍະກຳ, ກິລາ ແລະ ລົງຄະແນນສຽງຮັບຮອງເອົາກົດໝາຍສະບັບນີ້; ສະພາແຫ່ງຊາດກໍ່ຈະປຶກສາຫາລືກ່ຽວກັບຮ່າງກົດໝາຍຕຳຫຼວດປະຊາຊົນ (ສະບັບປັງປຸງ) ແລະ ຮັບຟັງທ່ານລັດຖະມົນຕີກະຊວງຕຳຫຼວດ ໂຕເລິມ ອະພິປາຍຄຳເຫັນຂອງສະມາຊິກສະພາແຫ່ງຊາດ.

        ກົດໝາຍວ່າດ້ວຍຕຳຫຼວດປະຊາຊົນສະບັບປັບປຸງສຸມໃສ່ດັດປັບ, ເພີ່ມເຕີມບາງເນື້ອໃນຄື: ໂຄງປະກອບ ແລະ ແບ່ງປະເພດກຳລັງໃນຕຳຫຼວດປະຊາຊົນ; ຕຳຫຼວດຕາແສງ, ເທດສະບານໃນລະບົບການຈັດຕັ້ງຂອງຕຳຫຼວດປະຊາຊົນ… ທ່ານລັດຖະມົນຕີກະຊວງຕຳຫຼວດ ຫວຽດນາມ ໂຕເລິມ, ຖືວ່າ:

        “ການປະກາດໃຊ້ກົດໝາຍວ່າດ້ວຍຕຳຫຼວດປະຊາຊົນ (ສະບັບປັບປຸງ) ແມ່ນຈຳເປັນ, ຮີບດ່ວນ. ປັບປຸງພື້ນຖານດ້ານນິຕິກຳໃຫ້ສົມບູນແບບກ່ຽວກັບພາລະໜ້າທີ່, ສິດອຳນາດຂອງຕຳຫຼວດປະຊາຊົນໃນວຽກງານຄຸ້ມຄອງລັດ ກ່ຽວກັບຄວາມສະຫງົບ, ຄວາມເປັນລະບຽບຮຽບຮ້ອຍ, ປ້ອງກັນ ຕ້ານອາດຊະຍາກຳ ແລະ ລະເມີດກົດໝາຍ; ແກ້ໄຂການຊ້ຳຊ້ອນກ່ຽວກັບພາລະໜ້າທີ່, ບໍລິເວນ, ເປົ້າໝາຍຄຸ້ມຄອງ.”

        ກໍ່ໃນວາລະເຮັດວຽກໃນຕອນເຊົ້າວັນດຽວກັນ, 93,84% ສສຊ ໄດ້ເຫັນດີໃຫ້ສະພາແຫ່ງຊາດຮັບຮອງເອົາຮ່າງກົດໝາຍປັບປຸງ, ເພີ່ມເຕີມ ບາງມາດຕາຂອງກົດໝາວ່າດ້ວຍກາຍຍະກຳ, ກິລາ.

ກົດໝາຍວ່າດ້ວຍການລ້ຽງສັດ - ເອກະສານນິຕິກຳຊ່ວຍໃຫ້ຂະແໜງກະສິກຳ ຫວຽດນາມ ພັດທະນາແບບຍືນຍົງ

       ຕອນບ່າຍວັນທີ 14 ມິຖຸນາ, ສະພາແຫ່ງຊາດ ຫວຽດນາມ ໄດ້ເຮັດວຽກຢູ່ຫໍປະຊຸມ, ຮັບຟັງການລາຍງານ, ອະພິປາຍ, ຮັບເອົາຄຳເຫັນ ແລະ ດັດປັບຮ່າງກົດໝາຍວ່າດ້ວຍການວັດແທກ ແລະ ແຜນທີ່ ແລະ ລົງຄະແນນສຽງຮັບຮອງເອົາກົດໝາຍສະບັບນີ້; ປຶກສາຫາລືກ່ຽວກັບຮ່າງກົດໝາຍວ່າດ້ວຍການລ້ຽງສັດ ແລະ ຮັບຟັງທ່ານ ຫງວຽນຊວນເກື່ອງ, ລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມ ອະພິປາຍ ຄຳເຫັນຂອງ ສສຊ.

        ຂະແໜງລ້ຽງສັດລວມມີ ສອງຂົງເຂດຕົ້ນຕໍ ແມ່ນບັນດາການເຄື່ອນໄຫວລ້ຽງສັດ; ການຜະລິດ, ດຳເນີນທຸລະກິດ ກ່ຽວກັບຫົວອາຫານ, ໃນຂະນະທີ່ກົດໝາຍວ່າດ້ວຍການຄຸ້ມຄອງຂະແໜງນີ້ຍັງບໍ່ທັນມີເທື່ອ.

        ກ່ອນໜ້ານັ້ນ, 92,61% ສສຊ ແມ່ນເຫັນດີໃຫ້ສະພາແຫ່ງຊາດ ລົງຄະແນນສຽງ ຮັບຮອງເອົາກົດໝາຍວ່າດ້ວຍການວັດແທກ ແລະ ແຜນທີ່.