ປະທານປະເທດ Truong Tan Sang ຢ້ຽມຢາມ ແລະ ເຮັດວຽກຢູ່ແຂວງ ກວາງນິນ

ວັນອາທິດ ທີ 6 ພຶດສະພາ ຄ.ສ. 2012 | 16:35:01

ປະທານປະເທດ Truong Tan Sang ຢ້ຽມຢາມເຂດເຮືອນຢູ່ຂອງກຳມະກອນ
ບໍລິສັດຫຸ້ນສ່ວນຖ່ານຫິນ ວ່າງແຢງ - Vinacomin
(ພາບ: dantri.com.vn)

(vovworld) - ໃນວັນທີ 5 – 6/5, ທ່ານປະທານປະເທດຫວຽດນາມ Truong Tan Sang ໄດ້ມີການຢ້ຽມຢາມ ແລະ ເຮັດວຽກຢູ່ແຂວງ ກວາງນິນ. ຕອນບ່າຍວັນທີ 5/5, ທ່ານປະທານປະເທດ Truong Tan Sang ແລະ ຄະນະປະຕິບັດງານໄດ້ລົງຢ້ຽມຢາມເຂດເຮືອນຢູ່ຂອງກຳມະກອນ ບໍລິສັດຫຸ້ນສ່ວນຖ່ານຫິນ ວ່າງແຢງ - Vinacomin, ເມືອງ ວ່າງແຢງ, ນະຄອນ ອວງບີ໋. ຢູ່ທີ່ນີ້, ທ່ານປະທານປະເທດ Truong Tan Sang ໄດ້ຍ້ອງຍໍສັນລະເສີນບັນດາຄວາມມານະພະຍາຍາມຂອງ ໝູ່ຄະນະວິສາຫະກິດ ພ້ອມທັງຕອບຫຼາຍບັນຫາເຊິ່ງພະນັກງານກຳມະກອນຜູ້ອອກແຮງງານຂອງບໍລິສັດຍົກອອກມາ ທີ່ກ່ຽວຂ້ອງເຖິງບັນຫາພາສີສົ່ງອອກຖ່ານຫີນ, ລາຄາຂາຍຖ່ານຫີນພາຍໃນປະເທດ, ການລົງທຶນປ່ຽນໃໝ່ເຕັກໂນໂລຢີການຂຸດຄົ້ນ ແລະ ບັນຫາລົງທຶນປົກປັກຮັກສາສິ່ງແວດລ້ອມ... ທ່ານປະທານປະເທດເນັ້ນໜັກວ່າ: ບໍລິສັດຫຸ້ນສ່ວນຖ່ານຫີນ ວ່າງແຢງ ເວົ້າສະເພາະ, ກຸ່ມບໍລິສັດອຸດສາຫະກຳຖ່ານຫີນ - ບໍແຮ່ຫວຽດນາມ ເວົ້າລວມ ຄວນມີຄວາມກ້າຄິດກະທຳກ່ວາອີກ ໃນການເສີມຂະຫຍາຍກຳລັງພາຍໃນ, ເສີມຂະຫຍາຍພຸມປັນຍາຂອງໝູ່ຄະນະ ເພື່ອລົງທຶນປ່ຽນໃໝ່ວິທີການຄຸ້ມຄອງການຜະລິດ, ນຳໃຊ້ບັນດາເຕັກໂນໂລຢີຂຸດຄົ້ນທີ່ທັນສະໄໝ ເພື່ອພັດທະນາຂະແໜງນີ້ໃຫ້ນັບມື້ນັບໝັ້ນຄົງກ່ວາ, ປະຕິບັດການເບິ່ງແຍງດູແລຊີວິດການເປັນຢູ່ໃຫ້ແກ່ຜູ້ອອກແຮງງານດີກ່ວາອີກ. ກໍເນື່ອງໃນໂອກາດນີ້, ທ່ານປະທານປະເທດ Truong Tan Sang ໄດ້ລົງຢ້ຽມຢາມ ແລະ ມອບຂອງຂັວນໃຫ້ບັນດາຄອບຄົວທີ່ມີຫຼາຍລຸ້ນຄົນເຮັດວຽກຢູ່ບໍແຮ່.

ປະທານປະເທດ Truong Tan Sang ຢ້ຽມຢາມ ແລະ ເຮັດວຽກຢູ່ແຂວງ ກວາງນິນ - ảnh 2

ປະທານປະເທດ Truong Tan Sang ຢ້ຽມຢາມ ແລະ ມອບຂອງຂັວນ
ໃຫ້ບັນດາຄອບຄົວທີ່ມີຫຼາຍລຸ້ນຄົນເຮັດວຽກຢູ່ບໍແຮ່
(ພາບ: dantri.com.vn)

ວັນທີ 6/5, ທ່ານປະທານປະເທດ Truong Tan Sang ໄດ້ລົງຢ້ຽມຢາມ ແລະ ໂອ້ລົມກັບພະນັກງານບໍລິສັດຫຸ້ນສ່ວນຜະລິດກົນຈັກ ທີ່ຂຶ້ນກັບກຸ່ມບໍລິສັດຖ່ານຫີນບໍແຮ່ຫວຽດນາມ. ກ່າວຄຳເຫັນທີ່ການໂອ້ລົມ, ທ່ານເວົ້າວ່າ:

“ສິ່ງທີ່ໜ້າພາກພຸມໃຈທີ່ສຸດແມ່ນຢູ່ທີນີ້ຖັນແຖວພະນັກງານມີສືມືການຊ່າງດີພໍສົມຄວນ, ບ່ອນກິນບ່ອນຢູ່ເປັນປົກກະຕິ. ທາງບໍລິສັດຄວນຄິດໄລ່ເຖິງວຽກເຮັດງານທຳ, ການຜະລິດເພື່ອເພີ່ມເງິນເດືອນໃຫ້ກຳມະກອນ. ສິ່ງດັ່ງກ່າວພັກ ແລະ ລັດເຮົາກໍຕ້ອງເອົາໃຈໃສ່, ແຕ່ກ່ອນອື່ນໝົດທາງບໍລິສັດ ແລະ ຜູ້ອອກແຮງງານຄວນເອົາໃຈໃສ່ ແລະ ພະຍາຍາມ, ຜ່ານການຍົກສະມັດຕະພາບແຮງງານ ແລະ ລາຍຮັບ. ພວກຂ້າພະເຈົ້າຈະມີຄວາມຮັບຜິດຊອບພ້ອມກັບທາງບໍລິສັດຄິດໄລ່ຕື່ມອີກກ່ຽວກັບກົນໄກຜະລິດ ເພື່ອສ້າງວຽກເຮັດງານທຳໃໝ່ຫຼາຍກ່ວາໃຫ້ແກ່ກຳມະກອນຜູ້ອອກແຮງງານ”