ປະທານປະເທດ Truong Tan Sang ສິ້ນສຸດການຢ້ຽມຢາມ ທາງລັດຖະກິດ Kazakhstan

ວັນອັງຄານ ທີ 11 ກັນຍາ ຄ.ສ. 2012 | 21:11:02

ທ່ານປະທານາທິບໍດີ Kazakhstan Nursultan Nazarbayev ຊົມເຊີຍການມາຢ້ຽມຢາມ ຂອງທ່ານປະທານປະເທດຫວຽດນາມ Truong Tan Sang( ພາບ: internet)

(vovworld) - ຕອນບ່າຍວັນທີ 11/9 ຕາມເວລາທ້ອງຖິ່ນ, ທ່ານປະທານປະເທດ Truong Tan Sang ພ້ອມດ້ວຍຄະນະ ໄດ້ເດີນທາງອອກຈາກນະຄອນຫຼວງ Astana ສິ້ນສຸດການຢ້ຽມຢາມທາງລັດຖະກິດ Kazakhstan ຢ່າງດີງາມ .

ກ່ອນໜ້ານັ້ນ ຄືໃນຕອນເຊົ້າວັນທີ 11/9, ທ່ານປະທານປະເທດຫວຽດນາມ Truong Tan Sang ໄດ້ມີ ການ ພົບປະເຈລະຈາກັບທ່ານນາຍົກລັດຖະມົນຕີ Kazakhstan Karim K.Massimov. ການນຳທັງສອງທ່ານໄດ້ແລກປ່ຽນ ແລະ ເປັນເອກະພາບນຳກັນມາດຕະການຕ່າງໆເພື່ອເພີ່ມທະວີການພົວພັນຮ່ວມມືດ້ານເສດຖະກິດ, ການຄ້າລະຫວ່າງສອງປະເທດ ຄື ໜູນຊ່ວຍການສົ່ງອອກ ແລະ ນຳເຂົ້າຢ່າງຕັ້ງໜ້າ, ດຳເນີນການເຈລະຈາ ແລະ ລົງນາມໃນສັນຍາການຄ້າເສລີຫວຽດນາມ - ພັນທະພາບພາສີ Kazakhstan - ລັດເຊຍ - ເບລາຣຸດ ໂດຍໄວ, ສືບຕໍ່ເປັນເອກະພາບນຳກັນ ແລະ ລົງນາມໃນບັນດາສັນຍາສ້າງພື້ນຖານນິຕິກຳໃຫ້ແກ່ການຮ່ວມມືໃນຂົງເຂດເສດຖະກິດ, ການຄ້າ. ສອງຝ່າຍໄດ້ເຫັນດີຮ່ວມມືໃນຂົງເຂດພະລັງງານຢ່າງຍາວນານ, ໂດຍສະເພາະແມ່ນການຮ່ວມມືສຳຫຼວດ ແລະ ຂຸດຄົ້ນນ້ຳມັນອາຍແກດຢູ່ Kazakhstan ແລະ ຫວຽດນາມ ກໍຄືຢູ່ປະເທດທີ 3.

ພາຍຫຼັງການພົບປະເຈລະຈາ, ທ່ານປະທານປະເທດ Truong Tan Sang ແລະ ທ່ານນາຍົກລັດຖະມົນຕີ Karim K.Massimov ພ້ອມກັນເຂົ້າຮ່ວມເວທີປາໄສວິສາຫະກິດຫວຽດນາມ - Kazakhstan ແລະ ພິທີ່ສະເໜີຕົວສະພາວິສາຫະກິດ ຫວຽດນາມ - Kazakhstan. ທີ່ເວທີປາໄສ, ການນຳສອງທ່ານໄດ້ແລກປ່ຽນ ແລະ ເປັນເອກະພາບນຳກັນບັນດາມາດຕະການຊຸກຍູ້ການພົວພັນສອງຝ່າຍ, ໃນນັ້ນມີບັນດາມາດຕະການມີລັກສະນະປຸກທະລຸ ຊຸກຍູ້ການພົວພັນຮ່ວມມືຕາມລວງເລິກ, ມີິປະສິດທິຜົນ ແລະ ຫຼາຍຮູບຫຼາຍແບບ, ເປີດຊອງໃຫ້ແກ່ບັນດາການລົງທຶນໃນຂົງເຂດທີ່ມີທ່າແຮງຄື; ໃຫ້ບຸລິມະສິດພັດທະນາພື້ນຖານໂຄງລ່າງ, ຂຸດຄົ້ນແຮ່ທາດ, ຜະລິດເຄື່ອງຕໍ່າແຜ່ນຕັດຫຍິບ, ເກີບໜັງ… ທ່ານປະທານປະເທດ Truong Tan Sang ຢືນຢັນວ່າ ຈະສ້າງທຸກເງື່ອນໄຂສະດວກ, ຮັບປະກັນສິດຜົນປະໂຫຍດອັນຊອບທຳໃຫ້ແກ່ປະຊາຄົມວິສາຫະກິດ Kazakhstan ເຂົ້າມາລົງທຶນ, ດຳເນີນທຸລະກິດຢູ່ຫວຽດນາມ.

ສ່ວນທ່ານນາຍົກລັດຖະມົນຕີ Kazakhstan ເນັ້ນໜັກວ່າ ໄດ້ກຽມພ້ອມ ການສ້າງເງື່ອນໄຂສະດວກໃຫ້ແກ່ຫວຽດນາມ ລົງທຶນເຂົ້າໃນບັນດາໂຄງການຍຸດທະສາດຢູ່ Kazakhstan. ເລື່ອງສອງຝ່າຍເຈລະຈາມຸ່ງໄປເຖິງລົງນາມໃນສັນຍາການຄ້າເສລີລະຫວ່າງຫວຽດນາມ ກັບ ພັນທະພາບພາສີ ກໍແມ່ນໂອກາດທີ່ດີໃຫ້ທັງສອງປະເທດແຊກຊຶມເຂົ້າຕະຫຼາດທີ່ກວ້າງໃຫຍ່ຂອງສອງປະເທດກໍຄືພາກພື້ນ.

ກ່ອນໜ້ານັ້ນ, ທ່ານປະທານປະເທດ Truong Tan Sang ໄດ້ໃຫ້ການຕ້ອນຮັບ ບາງວິສາຫະກິດ Kazakhstan ທີ່ມີໂຄງການລົງທຶນຢູ່ຫວຽດນາມ, ຢ້ຽມຢາມ ແລະ ເຮັດວຽກຢູ່ບໍລິສັດໃຫຍ່ນ້ຳມັນອາຍແກັດແຫ່ງຊາດ Kazakhstan KazMunaiGaz . ທ່ານປະທານປະເທດ Truong Tan Sang ສະເໜີ້ການນຳບັນດາອົງການທີ່ກ່ຽວຂ້ອງຂອງ Kazakhstan , ໃນນັ້ນມີ ບໍລິສັດ KazMunaiGaz ຈົ່ງສ້າງເງື່ອນໄຂສະດວກໃຫ້ແກ່ກຸ່ມບໍລິສັດນ້ຳມັນອາຍແກັດຫວຽດນາມໃນການເຄື່ອນໄຫວຮ່ວມມື, ມີໂຄງການຮ່ວມມືລະອຽດ, ມີຄວາມສາມາດເປັນໄປໄດ້, ພິເສດແມ່ນບັນດາໂຄງການພວມພັດທະນາ ຫຼືພວມຂຸດຄົ້ນນ້ຳມັນອາຍແກັດຢູ່ Kazakhstan . ເນື່ອງໃນໂອກາດນີ້, ທ່ານປະທານປະເທດ Truong Tan Sang ແລະ ຜູ້ຕ່າງໜ້າລັດຖະບານ Kazakhstan ໄດ້ເປັນສັກຂີພິຍານພິທີລົງນາມໃນບົດບັນທຶກຊ່ວຍຈຳລະຫວ່າງ ກຸ່ມບໍລິສັດນ້ຳມັນອາຍແກັດຫວຽດນາມ ແລະ ບໍລິສັດ KazMunaiGaz ກ່ຽວກັບການເຈລະຈາ ກ້າວໄປເຖິງການເຊັນສັນຍາກ່ຽວກັບນ້ຳມັນອາຍແກັດຢູ່ເຂດທີ່ທັງ 2 ຝ່າຍພວມປະຕິບັດວຽກງານຄົ້ນຄ້ວາໃນໄວໆນີ້.

ແລະ ກໍໃນຕອນເຊົ້າຂອງວັນດຽວກັນ, ທ່ານປະທານປະເທດ Truong Tan Sang ໄດ້ໄປຢ້ຽມຢາມ ແລະ ໂອ້ລົມກັບຄູອາຈານ, ນັກສຶກສາຢູ່ມະຫາວິທະຍາໄລ Nadabaev . ທ່ານປະທານປະເທດ Truong Tan Sang ສະແດງຄວາມເຊື່ອໝັ້ນວ່າ ຫວຽດນາມ ແລະ Kazakhstan ຈະສືບຕໍ່ມູນເຊື້ອການຮ່ວມມືໃນຂົງເຂດນີ້, ປະກອບສ່ວນຊຸກຍູ້ການພົວພັນຮ່ວມມື 2 ຝ່າຍໃຫ້ດີຍິ່ງໆຂຶ້ນ.