ທ່ານປະທານປະເທດ ຫງວຽນຊວັນຟຸກ ໃຫ້ການຕ້ອນຮັບ ທ່ານນາງ Frances Adamson ຜູ້ວ່າການລັດ ອົດສະຕາລີໃຕ້ (ພາບ: VOV)

ຕອນເຊົ້າວັນທີ 9 ພະຈິກ, ຢູ່ທຳນຽບປະທານປະເທດ, ກ່າວຄຳເຫັນທີ່ການຕ້ອນຮັບ ທ່ານນາງ Frances Adamson ຜູ້ວ່າການລັດ ອົດສະຕາລີໃຕ້ ທີ່ພວມມີການຢ້ຽມຢາມ ແລະ ເຮັດວຽກຢູ່ ຫວຽດນາມ, ທ່ານປະທານປະເທດ ຫງວຽນຊວັນຟຸກ ຢັ້ງຢືນວ່າ ຫວຽດນາມ ຍາມໃດກໍ່ຖືເປັນສຳຄັນການຊຸກຍູ້ການພົວພັນຄູ່ຮ່ວມມືຍຸດທະສາດ ກັບອົດສະຕາລີ ເຊິ່ງແມ່ນຄູ່ຮ່ວມມືພັດທະນາສຳຄັນຂອງ ຫວຽດນາມ ຢູ່ ປາຊີຟິກໃຕ້ ແລະ ກໍ່ແມ່ນຄູ່ຮ່ວມມືຍຸດທະສາດຮອບດ້ານຂອງ ສະມາຄົມ ປະຊາຊາດ ອາຊີຕາເວັນອອກສ່ຽງໃຕ້ (ອາຊຽນ). ທ່ານປະທານປະເທດ ໄດ້ສະເໜີວ່າ ລັດ ອົດສະຕາລີໃຕ້ເປີດກວ້າງການຮ່ວມມືກັບຫຼາຍທ້ອງຖິ່ນຂອງ ຫວຽດນາມ, ພ້ອມທັງພິຈາລະນາເປີດຫ້ອງການຜູ້ຕາງໜ້າການຄ້າ - ການລົງທຶນຢູ່ ຫວຽດນາມ. ທ່ານປະທານປະເທດ ຫວັງວ່າ ຜູ້ວ່າການລັດຈະສ້າງເງື່ອນໄຂສະດວກໃຫ້ແກ່ປະຊາຄົມຊາວຫວຽດນາມ ອາໄສຢູ່ອົດສະຕາລີ, ນັກສຶກສາ ຫວຽດນາມ ມາຮຽນຢູ່ ອົດສະຕາລີ ແລະ ວິສາຫະກິດ ຫວຽດນາມ ມາລົງທຶນ, ປະກອບສ່ວນໃຫ້ແກ່ການພັດທະນາເສດຖະກິດ ສັງຄົມ ແລະ ການເຊື່ອມຈອດການພົວພັນແລກປ່ຽນລະຫວ່າງປະຊາຊົນສອງປະເທດ.

ສ່ວນຜູ້ວາການລັດ ອົດສະຕາລີໃຕ້ ໃຫ້ຮູ້ວ່າ ລັດ ອົດສະຕາລີໃຕ້ ພ້ອມແລ້ວທີ່ຈະຮ່ວມມືກັບບັນດາທ້ອງຖິ່ນ ຂອງ ຫວຽດນາມ ເພື່ອຜັນຂະຫຍາຍບັນດາການເຄື່ອນໄຫວປົກປັກຮັກສາສິ່ງແວດລ້ອມ ແລະ ຮັບມືກັບການປ່ຽນແປງຂອງດິນຟ້າອາກາດ.