ປະທານປະເທດ ເຈືອງເຕີນຊາງ ເຂົ້າຮ່ວມກອງປະຊຸມ APEC 21 ຢູ່ ອິນໂດເນເຊຍ

ວັນຈັນ ທີ 7 ຕຸລາ ຄ.ສ. 2013 | 13:03:00

(ທ່ານປະທານປະເທດ ເຈືອງເຕີນຊາງ
ເດີນທາງໄປຮອດ ອິນໂດເນເຊຍ)

(vovworld) – ໂດຍໄດ້ຮັບຄຳເຊື້ອເຊີນຂອງທ່ານປະທານາທິບໍດີ ອິນໂດເນເຊຍ Susilo Bambang Yudhoyono, ຕອນຄຳ່ວັນທີ 6/10, ທ່ານປະທານປະເທດ ເຈືອງເຕີນຊາງ ແລະ ຄະນະຜູ້ແທນຂັ້ນສູງ ຫວຽດນາມ ໄດ້ໄປຍັງ ບາລີ, ປະເທດ ອິນໂດເນເຊຍ ເລີ່ມຕົ້ນການເຂົ້າຮ່ວມກອງປະຊຸມບັນດາການນຳເວທີປາໄສຮ່ວມມືເສດຖະກິດ ອາຊີ - ປາຊີຟິກ ( APEC) ຄັ້ງທີ 21 ຈັດຕັ້ງຢູ່ເກາະ ບາລີ, ແຕ່ວັນທີ 7 – 8/10. ດ້ວຍຫົວຂໍ້ວ່າ “ອາຊີ - ປາຊີຟິກ ສ້າງຄວາມເຂັ້ມແຂງດ້ວຍຕົນເອງ: ກຳລັງໜູນຂອງການເຕີບໂຕທົ່ວໂລກ”, ກອງປະຊຸມຂັ້ນສູງ APEC 21 ສຸມໃສ່ປຶກສາຫາລື 3 ບັນຫາຈຸດສຸມຄື: ສະພາບເສດຖະກິດທົ່ວໂລກໃນປະຈຸບັນ ແລະ ບົດບາດຂອງ APEC ໃນການຊຸກຍູ້ລະບົບການຄ້າຫຼາຍຝ່າຍ, ວິໄສທັດ APEC ແລະ ການເຊື່ອມຕໍ່ໃນໂຄງປະກອບສາກົນ ແລະ ພາກພື້ນທີ່ພວມສ້າງຕັ້ງຂຶ້ນ, ການເຕີບໂຕໝັ້ນຄົງຕິດພັນກັບຄວາມຍຸຕິທຳ: ຄວາມໝັ້ນຄົງດ້ານທັນຍາຫານ, ແຫຼ່ງນ້ຳ ແລະ ພະລັງງານ. ຄະນະຜູ້ແທນ ຫວຽດນາມ ໂດຍທ່ານປະທານປະເທດ ເຈືອງເຕີນຊາງ ນຳໜ້າໄດ້ເຂົ້າຮ່ວມກອງປະຊຸມຂັ້ນສູງ APEC ຄັ້ງນີ້ເພື່ອແນໃສ່ສືບຕໍ່ຜັນຂະຫຍາຍແນວທາງນະໂຍບາຍການຕ່າງປະເທດເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ, ຖືບົດບາດຂອງບັນດາກົນໄກຮ່ວມມືຢູ່ ອາຊີ - ປາຊີຟິກ ເປັນສຳຄັນ, ພ້ອມທັງຖະແຫຼງ ຫວຽດນາມ ຈະເປັນເຈົ້າພາບຈັດຕັ້ງກອງປະຊຸມຂັ້ນສູງ APEC ຄັ້ງທີ 25 ໃນປີ 2017. ໃນ 2 ວັນເຄື່ອນໄຫວຢູ່ APEC 21, ທ່ານປະທານປະເທດ ເຈືອງເຕີນຊາງ ຈະພ້ອມກັບການນຳຂອງ 21 ພື້ນຖານເສດຖະກິດສະມາຊິກ APEC ພິຈາລະນາ ແລະ ຍົກອອກບັນດາຄຳຕັດສິນກ່ຽວກັບຈຸດໝາຍເຊື່ອມຕໍຊຸກຍູ້ການເຕີບໂຕເສດຖະກິດໃນພາກພື້ນທີ່ຕ່າງຝ່າຍຕ່າງມີຄວາມສົນໃຈ. ທ່ານປະທານປະເທດ ເຈືອງເຕີນຊາງ ກໍ່ຈະມີການພົບປະ 2 ຝ່າຍກັບການນຳບັນດາພື້ນຖານເສດຖະກິດສະມາຊິກ, ເພື່ອແນໃສ່ເພີ່ມທະວີການພົວພັນ 2 ຝ່າຍລະຫວ່າງ ຫວຽດນາມ ກັບບັນດາປະເທດສະມາຊິກຫຼັກແຫຼ່ງຂອງ APEC.

ທີ່ການພົບປະ 2 ຝ່າຍກັບທ່ານປະທານາທິບໍດີ ອິນໂດເນເຊຍ Susilo Bambang Yudhoyono. ຕອນເຊົ້າວັນທີ 07 ຕຸລາ, ທ່ານປະທານປະເທດ ເຈືອງເຕີນຊາງ ໄດ້ຕີລາຄາສູງ ແລະ ອວຍພອນ ອິນໂດເນເຊຍ ໄດ້ປະຕິບັດບົດບາດເປັນປະທານ APEC 2013 ເປັນຢ່າງດີ ແລະ ຈັດຕັ້ງການເຄື່ອນໄຫວສຳຄັນຫຼາຍຢ່າງຂອງ APEC ນັບແຕ່ຕົ້ນປີມາຮອດປະຈຸບັນ ກໍ່ຄືກະກຽມຈັດຕັ້ງກອງປະຊຸມລັດຖະມົນຕີການຕ່າງປະເທດ WTO ຄັ້ງທີ 9 ຢູ່ ບາລີ ໃນເດືອນ ທັນວາ 2013. ການນຳ 2 ປະເທດເຫັນດີເປັນເອກະສັນສືບຕໍ່ສົມທົບຫຼັກໝັ້ນຢູ່ບັນດາເວທີປາໄສພາກພື້ນ ແລະ ສາກົນຢ່າງແໜ້ນແຟ້ນ, ພິເສດແມ່ນຢູ່ ອາຊຽນ ແລະ ສະຫະປະຊາຊາດ, ພ້ອມກັບບັນດາປະເທດ ອາຊຽນ ອື່ນໆຊຸກຍູ້ປະຕິບັດສຳເລັດບັນດາຈຸດໝາຍຂອງປະຊາຄົມ ອາຊຽນໃນປີ 2015, ປັບປຸງບົດບາດໃຈກາງ ແລະ ສຽງເວົ້າລວມຂອງ ອາຊຽນ ໃນບັນດາບັນຫາຄວາມໝັ້ນຄົງ ແລະ ການພັດທະນາສຳຄັນຢູ່ພາກພື້ນ. ທີ່ການພົບປະເຈລະຈາກັບພະບາດສົມເດັດພະເຈົ້າມະຫາຊີວິດບຣຸໄນ Hassanal Bolkiah, ທ່ານປະທານປະເທດ ເຈືອງເຕີນຊາງ ໄດ້ອວຍພອນບັນດາຜົນງານຂອງບຣຸໄນ ໃນຖານະຕຳແໜ່ງເປັນປະທານອາຊຽນ ປີ 2013 ເຊິ່ງໄດ້ປະກອບສ່ວນສຳຄັນໃນການເພີ່ມທະວີຄວາມສາມັກຄີ, ການຮ່ວມມືໃນອາຊຽນ ແລະ ລະຫວ່າງອາຊຽນ ກັບບັນດາຄູ່ຮ່ວມມື, ຍົກສູງອິດທິຜົນຊື່ສຽງ ແລະ ທີ່ຕັ້ງສາກົນຂອງອາຊຽນ. 2 ຝ່າຍເຫັນດີພ້ອມກັບບັນດາສະມາຊິກອາຊຽນ ອື່ນມານະພະຍາຍາມສ້າງປະຊາຄົມອາຊຽນ ໃນປີ 2015, ເສີມຂະຫຍາຍບົດບາດໃຈກາງຂອງອາຊຽນ ໃນພາກພື້ນ. 2 ຝ່າຍຢືນຢັນ ຕ້ອງຮັບປະກັນການປະຕິບັດຖະແຫຼງການ 6 ຂໍ້ຂອງອາຊຽນ, ຖະແຫຼງການຮ່ວມກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງເຂັ້ມງວດ, ສຳເລັດປະມວນຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ລະຫວ່າງອາຊຽນ ແລະ ຈີນ ໂດຍໄວ. 2 ຝ່າຍກໍ່ໄດ້ແລກປ່ຽນກ່ຽວກັບບັນດາທິດທາງໃຫຍ່ເພື່ອແນໃສ່ເສີມຂະຫຍາຍປະສິດທິຜົນການຮ່ວມມືລະຫວ່າງ 2 ປະເທດກ່ຽວກັບດ້ານເສດຖະກິດ, ການຄ້າ, ການລົງທຶນ, ກະສິກຳ... ສົມທົບກັນໃນການເຈລະຈາສັນຍາຄູ່ຮ່ວມມືເສດຖະກິດເຂດປາຊີຝີກ (TPP) ຢ່າງແໜ້ນແຟ້ນ.